Read Central Asmat GALATIA 4 Bible Online

GALATIA 4 - Central Asmat bible

GALATIA 4

¹E atawmin atakam ara: Asmat ow ara, atiw e aricipic pok atowopcema. E pok takas aras ara. E nat, e ipic jiwinakap aememamarnew, ow ar mami kerja bwemtam ipic awcawor aomcemes.

²E jiwi, e amanmok batiw ow, atakam ji aecema— eras e aricipic atakam asakamtiwef jofay ajiwar ara.

³Daram inimas aemfom. Dar jiwinakap inim cimin aememfom. Inimas dar awames capinmi dat atakam ji aefom.

⁴E nat, Allah asan akat aporef, ar atiw atewnemef. Asmat cowoc e atiw ajispetiwef. Atiwam e Yahudi Jirmec aman aemapawiri.

⁵Eras aemef, er e Jirmec aman bemap ow bajortewas ara. Eram dar Allah atiperes mememas ara.

⁶Car Allah atiperes ara. Inimas aramat ipic, e atiw aRoh, e cajak bafiwaptotor atewnemef. E Roham, “Diwi Doricipic akatenem,” Inim aema.

⁷Inimas ara, car mami kerja bwemtam ow inim cimin boemap opok. Car Allah atiperes aemapmokom. Allah masirin, e atiperes atetamamaras car atetamaman.

⁸E nat, bap ara, Allah camsom opok aemapawirukum. Car dat atakam ji aekurumawirukum. E datam Allah opok.

⁹Wow nat, Allah camsom ara. (E cowok opok. Allaham car amsom ara.) Inimas ara, car awames capinmi dat aojamkawimokom ucimaram? E dat kumit ara. Aram pwicak ara. Car e dat atakam ji boekurum akat aemamokom ucimaram?

¹⁰Car agama hari awut, atakam ji aekurumamokom. Caram agama pir awut atakamam, agama tahun awut atakamam, ji aekurumamokom.

¹¹Dor e aemamokomas apormin ara, dor jak pwicak aememamin. Dor car Yesus Kristus mamkawim, kerja awutnakut aemawiru. E nat, eras desenas ara openow.

¹²Bare, dor car inim cimin aememof. Inimas car dor inim cimin ememey. Dor car inimas bwem janim fak aanimamin. Bare, car pwicakas do bwem opok aemfenokom.

¹³Bap ara, dor dam pwicak ajurusapof. Inimas ara, dor e cacapinmi aemapof. Inimasam, dor e Atakam Akat car acacapiomfin. Caram inimas camsom.

¹⁴E do dam pwicak aemapofas, car ajurusumfan. E nat, car bifan do bafayom opok aemfenokom. Caram dor botpem opok aemfenokom. Car, dor malaikat inim cimin atowomiwfenokom. Caram dor Kristus Yesus inim cimin atowomiwfenokom.

¹⁵Doram e aemfenokomas atemen aemin: car e camanmok basumtew wunam dor batetam, aememfokom inim cimin ara. E nat, car inimas bwemem asan opok. Wow nat, e jak akat aememfokomas wace?

¹⁶Dor atakamnak car aotawfin. Inimas dor cajewew ipic aememofnew?

¹⁷E suw atakam mamememtam ow nat, damos pas car ajiomaman. E ow nat, ow tarowat opok. E ow, car damos a bajiom, jak aseremomames. Inimas ar car do mamkawi pwicaken.

¹⁸Ow, damos, kawey ow bajiomnak, bare akat ara. Eras bwem join join atamfafaymar akat ara. Eras bwem, dor car cowkon memem jofay cowok arapok.

¹⁹Tiperesa. Jiwi bapeap cepes dam asesak aemapcemes. Doram inim cinim ara. Dor car Kristus mamkawinak opok apormin ara. Inimas dor jak pwicak aemapcimin. E nat, car Kristus mamkawinak aemcokom, e jofay dor jak akat aemapcimin.

²⁰E aemamokomas, bare dor bi binip arke ara. Inimas dor car, wow cowkon memem ayaw, bare akat ara. Dor a atakam surat bweapom pwicak. Dor atakam bipu mamtaw, bare akat ara.

²¹Car e Jirmec aman bemapji owa. Atakam mamotawcan. Car e Jirmec surat atakam jen baji opoknew?

²²E Jirmec surat atakam: Abraham ower jiwi jamnuk afimefen. E wun cowok, e mami kerja bwemtam cowoc ajispetiwefen. E wun masirin, e arop kerja aemef cowoc ajispetiwefen.

²³Bare, e mami kerja bwemtam cowoc, mami jiwi ajispetiwefen. E nat, bap ara, Allah, jiwi, Abraham batetam, inim atayi aeefen. Bare, e arop kerja aemef cowoc e Allah atayi aeef jiwi ajispetiwefen.

²⁴A atakam, baposomtew atakam awcawor ara. E cepes jamnuk e Allah atayi aeefas jamnuk awcawor ara. Aramat ipic e wun atayi e sikon juwas Sinai op aeefen. Er e cowoc juwas Hagar inim cimin ara. E ajispetiwmar jiwi, mami kerja bwemtam ow aememcemes.

²⁵E Hagar e Arab capinmi sikon juwas Sinai inim cimin ara. Aram awames kota Yerusalem inim cimin ara. E Yerusalem ow, bare mami kerja bwemtam ow inim cimin ara.

²⁶E arop kerja aemef cowoc nat, e onam op Yerusalem inim cimin ara. Ar darosowoc inim cimin ara.

²⁷Bare, e Alkitab atakam: “Ema cowoca. Or jiwi bajispetiw opok ara. E nat, jak akat ememey. Or ju bajitim opok ara. E nat, si asiey. Bare, armipic e cowoc bakan ajief. E nat, ar jiwi arke ajispetiwcema. E ower epcom cowoc masirin, jiwi arke opok ajispetiwcema.” E Alkitab inim aema.

²⁸Dojowow akatonokom. Allah, e Ishak, e Abraham batetam, atayi aeefen. Bare, daram e Ishak inim cimin ara. Allah dar atiperes memem atayi aeef.

²⁹E jofayam ara, e mami ajisamesef jiwi, e Roh Kudus atetamef jiwi ajurusumefen. Wowam e ow inimas cowok dar aemamarowos.

³⁰E nat, e Alkitab ucim atakam atawma? E Alkitab atakam: “E mami kerja bwemtam cowocam, e atiwam, bafimisimey. E mami kerja bwemtam cowoc atiwam, e arop kerja bwem cowoc atiwam, e aricipic pok akac batowop arapok.” E Alkitab inim aema.

³¹Dojowow akatonokom. Dar mami kerja bwemtam cowoc atiperes opok. Dar e arop kerja bwem cowoc atiperes ara.