Read Central Asmat GALATIA 5 Bible Online

GALATIA 5 - Central Asmat bible

GALATIA 5

¹Bare, Kristus asurumtamforow. Aramat ipic, dar asurumtamforow ow anakat, inim mememawar, akat aemama. Inimas car inim mamakajiremey. Caram e jutur Yahudi Jirmec aman boemap arapok.

²Bare, dor Paulus ara. E surat aeapomamin atakam jen pajiey. Ow sunat car aetiwcannew, bare Kristus, asan akat, car bwemtetam asan opok.

³Doram atakam fak car aotawmin. E sunat epcom ow takas, e Jirmec surat atakam takas ji baekurumces.

⁴Car Kristus akoremfokom. Car, “Allah e Jirmec surat atakam ji bwe ow, ow tarowat ara, inim atakam asakamtiwma,” inim atakam asicimamokom. Bare, car, e Kristus mami atetamama asan akat, bakan ajiosfokom.

⁵Dar ara nat, e jirey aemomas manmok afemom. E Roh Kudusam eras bwem jak fak atetamamarow. Bare, dar, Allah, dar ow tarowat ara, inim atakam basakamtiw, jirey aemom ara. Er e Kristus asicimamomas ara.

⁶E Kristus Yesus ajamkawimom ow aman, sunat owam, sunat opok owam, bare awcawor ara. Kristus basicim nat, anakatas ara. E asicimames owam, ow damos ajiomames.

⁷Bap ara, car Kristus mamkawi akatipic aemfokom. E car akekemtawfan ow nat, cam?

⁸Allah car ajateman. E car acajijimtawfan ipic nat, Allah opok.

⁹Caramaman ipic cowoknakap pwicakas aecow, caram takas pwicak aemapcomokom.

¹⁰Doram, caram, bare Tuhan aras ara. Inimas dor car asicimcimin. Dobi binip ara, car e dobi binip cawor aoceceremcomokom. E car ajurusumaman ipicam, jipic awut aranew, mami ipic aranew, bare Allah e ipic siksa aemcema.

¹¹Wun ow nat, “E Paulus atakam, ‘Sunat opok ow bwemjorem asan opok,’ inim atakam wow ajiwaram acacapiomama.” Inim aemes. Do nat, inim atakam opok. Dor inim atakam opok masirin, ow, wow ajiwar dor ajurusumamenes. Dor inim atakam acacapiomamin ayaw, ow dor e Kristus salib os op damir aafef atakam atawciminas, bifan do bafayom opok.

¹²Bare, e sunat atakam car aotawman ow, arop bisak basakamosomtotorces.

¹³Dojowow akatonokom. Kristus, car e Yahudi Jirmec aman boemap opok, inim ajatefan. Car e Jirmec aman boemap opok nat, caram e asmat jak basinomas jipu bwem arapok. Ca nat, damos aamjiomey. Wunam asan akat aamomey.

¹⁴E Jirmec surat atakam takas, bare jirmec cowoknakap awcawor ara. E jirmec cowok ara, “Or kawey ow, e damos orma ajiomamemas, inim awcawor damos ajiomey.” Allah inim jirmec ajirimama.

¹⁵E nat, car juwur cimin e caramaman aamjurusumcokomnew, pimicima. Car mamjurusumkurumasin.

¹⁶E atawmin atakam ara: Car e Roh Kudus atakam jipu mamemawarey. Inimas car e carasmat jak basinimas jipu bwem opok aemcomokom.

¹⁷E asmat jak basinomas, e Roh Kudus aototomerma. E Roh Kudusam e asmat jak basinomas aototomerma. Bare, e jamnuk aamajujumames. Inimas ara, car e akat apormokomas jipu bwem opok ara.

¹⁸Car e Roh Kudus atakam ji aecokomnew, bare car e Yahudi Jirmec aman boemap opok ara.

¹⁹E asmat jak basinomas, bare umuton ara. Er okore ara. Jursumecas bwem jak basinom ara.

²⁰Ēco basicim ara. Araw pok bwem ara. Bifan ara. Bwe atakam mamtaw ara. Icim ara. Jak amop bapepe ara. Ow arop akatas jipu cowok ara. Owen atakam ara. Suw agama atakam mamememtam ara.

²¹Kaweyas jak basinom ara. Jokmen bwi jayic ara. Pwicak pokbwi bwem ara. E wun inim pwicakasam bwem ara. Inima. Bare, bap ara, dor atjen car aowfin. Wow ara, doram atjen car aoowmin: E inimas bwem ow, e Allah Pemerintah Asan akatas basam bwemat asan opok ow ara.

²²E nat, e Roh Kudus, ow damos bajiom jak atetamama. Ar jak akatam, omar opok jakam, jak jirowam, ow asan akat bom jakam, akatas bwem jakam, atakamnak botaw jakam, inimas atetamama.

²³Aram ow arma batawsicim opok jakam, jak fakam, atetamama. Bare, inimas bwem, e Jirmec surat atakam bopowas opok ara.

²⁴Wun ow, Kristus Yesus arow ara. E ow e arasmat jak e salib os op atewtopomtotorfes inim cimin ara. Bare, e asmat jak, jursumecas bwemam, pwicakas bwemam, asinomama.

²⁵E Roh Kudus ay jiwneas atetamtotorforownew, dar e Roh Kudus atakam jipu emkurumamoc.

²⁶Dar darma batawsicim arapok. Daram daramaman atakam mamototomer arapok. Daram daramaman icim mamfes arapok.