Read Central Asmat GALATIA 6 Bible Online

GALATIA 6 - Central Asmat bible

GALATIA 6

¹Dojowow akatonokom. Ow dosa aemces, e car Yesus mamkawinak ow, e ow, e Yesus bokotpu anakat mamofasimomisey. Eras aemcokom nat, demesnakapa. Caram aporsipor pamicima. Iblis caram dosa bwem bacajijimtawasin.

²Ow asan pwicak aemapcesnew, car asan akat e ow mamomey. Inimas aemcokom, car Kristus jirmec ji aekurumcomokom.

³Ow abi binip, “Dor ow akatnakut ara,” inim bi binip aceceremces, e ow tot arma aotcemes. E ow, ow akat opok.

⁴Ow aporsipor e aemtotormesas baoworportotorces. E aemamesas akat aporces, jak akat baemapces. Inimas ar e aemamesas, e kawey ow aemamesas awcawornew, awcawor opoknew, inim bi binip bacecerem arapok.

⁵Ow aporsipor Allah bipu aememcemes. Aram e aemtotorawirisas bwempacin asan opok. Aram eras atakam arma aotawcemes.

⁶Wun ow Allah atakam amememtamames. E jen ajimes ow, e arakat pok, sey, e atakam mamememtam ow baseyeawarces.

⁷Tot carma bot arapok. Car suw atakam Allah bwemotaw asan opok. Ow akatas aemces, asan akat aemapcemes. Wunam, pwicakas aemces, asan pwicak aemapcemes.

⁸Ow e asmat jak jipuas aemces, ar daniwis aemamescemes. Ow e Roh Kudus akat apormaras jipu aemces, e Roh Kudus, jiwnenak batamemawaras, e ow atetamcema.

⁹Bare, e akatas aemamom, dam jipi opok ememawarmoc. Dar bakorompim opok aemcom, Allah asan akat aomcemarow.

¹⁰Inimas ara, e asan akat aporcomas takas, dar akatas e ow takas emamoc. Bare, dar akatnakutas, e Yesus dar akac asicimames ow, emamoc.

¹¹Bare, awap atakamnakap surat dorma aeapomamin. A huruf, bare awutut baporey.

¹²Wun ow, e Kristus salib os op damir aafef, inim atakam asicimames. A nat, kawey ow ar Kristus ajamkawimes bapor, omar aemes. Aram e ow a bajurusum, omar aemes. Aram kawey ow, a basicim, jak aserememames. Inimas ar takas, car sunat bwetiw, jen opok aatamcicimompormes.

¹³E nat, e sunat epcom ow, e Jirmec surat atakam ji bwe opok aemames. Ar, “E Galatia ow sunat tayir,” inim atakam awut botaw, jak aseremomames. Inimas ar ow car sunat bwetiw jak aseremomames.

¹⁴Dor ara nat, e Yesus Kristus daTuhan e salib os op damir aafefas, atakam awut aotawmin. Dor wun atakam awut botaw opok aemamin. Dor aramat ipic e salib os op damir aafef apormin. Inimas awames capinmias dor boomom opok aemaman. Er awames capinmias takas damir aafef inim cimin ara. Doram awames capinmias bi binip opok. Er dor damir aafof inim cimin ara.

¹⁵Ow, sunat epcomnew, sunat epcom opoknew, bare awcawor ara. E nat, ow ay jak batowop, bare anakatas ara.

¹⁶Allah, inim atakam ji bwe ow, jak akat baomcow. Aram e ow serow bajiomcow. Bare, e ow, e Allah ar Israel ow anakat ara.

¹⁷Bare, dor Yesus kerja aemtamawiru. Inimas ow e dodam doso aemfenes. E dam doso baji awapes. Inimas wow jofay ajiwar, ow awap surat atakam dor boamtaw arapok.

¹⁸Dojowow akatonokom. Yesus Kristus daTuhan, asan akat car baomcan. Awames atakam, bare atakamnak ara.