Read Central Asmat EFESUS 1 Bible Online

EFESUS 1 - Central Asmat bible

EFESUS 1

¹Dor Paulus ara. Kristus Yesus dor aratakam botaw atewosomfan. Allaham inimas akat aporef. Car masirin, kota Efesus ow tarowat ara. Caram Kristus Yesus asicimamokom ow ara.

²Bare, daricipic Allaham, Yesus Kristus daTuhanam, asan akat car baomcan. Aram jak akat car batetamcan.

³Allah e Yesus Kristus daTuhan, arAllah ara. Aram aricipic ara. Bare, daram Allah basicimamoc. Dar Kristus ajamkawifom. Inimas Allah e onam op asan akatas takas aomforow. E asan akatas nat, ban bosomas opok. Ar jipiras ara.

⁴Ametnak ara, Allah a capinmi bakenemapom opok ara, aramat ipic dar Kristus mamkawi aereremtawforowen. Aram dar e abipu, ow tarowatam, salah opokam, inim memem aereremtawforowen. Aram damos ajiomforowen.

⁵Inimas ar dar Yesus Kristus mamkawi, atakam bap asakamtiwefen. Aram dar atiperes batawem, atakam bap asakamtiwefen. Ar inimas bwem akat aporefen. Aram inimas bwem, at aetiwefen.

⁶Bare, Allah e atiw damos ajiomama. Daram e atiw ajamkawimom. Inimas Allah asan akatnakut mami aomforow. Bare, aramat ipic basicimamoc.

⁷Kristus e ares airimnemef. Er dar e dosa fakas basurumtamas ara. Eras dadosa bakokoromosomas ara. Bare, Allah asan akatnakut aomforow.

⁸Ar e asan akat dar takas aomforow. Bare, aramat ipic bi binip umutonnakut ara. Aram amsomnakut ara. Inimas ar e at aetiwefas jipu aemef. Ar e at bwetiw, bap atakam asakamtiwefen. Aram e amannakut at aetiwefas aporomtamforow. E at aetiwefas, bare e Kristus aemamaras ara.

¹⁰Allaham asan akat aporcow, ar e at aetiwefas aemkurumcema. E at aetiwefas ara, ar e onam op akenemapomefas takasam, a capinmi akenemapomefas takasam, cowokut atatiwcema. Ar masirin, Kristus eras takas akepala ipic atewemcema. Ar inim at aetiwef.

¹¹Allah e takas, e at aetiwefas jipuam, e atakam bap asakamtiwefas jipuam, aemcema. Bare, aramat ipic dar Kristus mamkawi aereremtawforowen. Inimas ar dar arow memem aereremtawforowen. Er e ametnak atakam asakamtiwef at bwetiwas jipu ara.

¹²Bare, dar jirey Kristus bap takam aefom ow, Allah arakatnakutas basicimamoc.

¹³Caram ara. Caram e atakamnak jen ajifokom. E atakam, bare e Atakam Akat ara. E atakamam car bajortewas ara. Bare, car Kristus asicimfokom. Allah masirin, e atayi aeef Roh Kudus, car atetamfan. Er car Allah arow aememfokom, inim baporomtamas ara.

¹⁴Allah e at aetiwefas e arow atetamcema. E Roh Kudus eras aporomtamamarow. Bare, Allah dar e dosa fakas asurumtamkurumcemarow. E Roh Kudusam eras atakam aotawtotormarow. Bare, Allah arakatnakutas basicimamoc.

¹⁵Bare, car Tuhan Yesus asicimamokom. Caram damos e ow tarowat ajiomamokom. E inim atakam jen ajiof jofayam, wow ajiwaram, dor car terima kasih atakam Allah botaw bakari opok aemamin. Doram janim Allah car aanimtamamin.

¹⁷Allah, e Yesus Kristus daTuhan, aricipic akatnakut ara. Aram arAllah ara. Bare, dor Allah, bi binip umutonam, aratakam umuton botaw cescuwasam, car batetam, inim janim aramat ipic aanimamin. Inimas car aramat ipic camson aemcomokom.

¹⁸Bare, Allah car ajatefan. Car masirin, Allah asan akat car batetam jirey aemokom. Aram asan akatnakut e ow tarowat batetam, atayi aeef. Dor car eras baporkurumam, Allah bi binip umuton car batetamam, janim aramat ipic aanimamin.

¹⁹Aram faknakut ara. Aram e afakas, e dar aramat ipic asicimamom ow, atetamamarow. E fakas, bare e Allah e Kristus aojaworomsumutumef fakas cowok ara. E fakasam, e Allah e Kristus e onam op aban bo jamampu atewapomef fakas cowok ara. Dor, Allah, car eras baporkurum, inim bi binip umuton car batetam, janim aanimamin.

²¹Bare, Kristus e onam op aemapmar ara, ar jirmec e malaikat pemerintah owam, e malaikat kepala owam, e fak malaikatam, e jirmec ajirimames malaikatam, ajirimama. Aramat ipic awutnakut ara. E nat, a wow awapom ow takasam, e aenawcow jofay aemapces ow takasam, bare kanim ara.

²²Bare, Allah, Kristus, e takas momomkurum atetamef. Aram aramat ipic, e a basicim barewsiap ow takas aTuhan, atewemef.

²³E owam Kristus adam inim cimin ara. E owam jak akat anakat e Kristus aemapomames. Aramat ipicam jak akat anakat e asanin asanin ow aemapomama.