Read Central Asmat EFESUS 3 Bible Online

EFESUS 3 - Central Asmat bible

EFESUS 3

¹Inimas ara, dor janim Allah car aanimtamcimin. Bare, dor Paulus ara. Dor e Atakam Akat e car Yahudi opok samat ow aotawfin. Ow masirin, dor penjara cem aman ajiwtewapomfenes. Kristus Yesusam dor e penjara cem aman bemap at aetiwef.

²Bare, Allah asan akat dor aomfan, wunam atakam car bacacapiomtam atewemfan. Caram eras jen emcajifokom openow.

³Allah e aramannakut at aetiwefas aporomtamfan. Doram e atakam, surat jipin emcaeapomof.

⁴Caram e surat aeapomofas baca aemcokom, car dor Kristus aramannakut atakam nomsom aporcomokom.

⁵Ametnak ara, Allah e amannakut atakam, asmat ow botaw opok aemawiri. E nat, jepen ara, Allah e atakam e aratakam botaw atewesomef ow tarowatam, e aratakam botaw ow tarowatam, aporomtamef. E Roh Kudus eras aporomtamef.

⁶E amannakut atakam inim ara: E Yahudi opok samat ow, e Atakam Akat asicimces, Allah, asan akat, e owam, e Yahudi samat owam, akac aomcema. E Yahudi opok samat ow, e Yahudi samat ow akac, e Kristus adamas inim cimin aemapcemes. Aram e Allah atayi aeefas akac atowopcemes. E takas, bare e Kristus Yesus aemefas ara. Bare, e amannakut atakam inim ara.

⁷Bare, Allah fak ara. Inimas ar asan akat dor mami aomfan. E asan akat ara, ar dor akerja bwemtam ipic atewemfan. Aram dor e Atakam Akat bacacapiom ipic atewemfan.

⁸E wun ow tarowat, bare ow awut ara. Dor masirin, kanimnakap ara. E nat, Allah e Atakam Akat e Yahudi opok samat ow bacacapiomtam atewemfan. E Atakam Akat, e Kristus arakatnakutas atakam ara. Bare, dar e arakatnakutas bwemporkurum asan opok.

⁹Allah e aramannakut at aetiwefas jipu aemama. Aram dor eras, atakam ow takas umuton botaw atewemfan. Bare, Allah pok takas akenemapomkurumefen. Aram e at aetiwefas, tareynakut acukumtiwawirien.

¹⁰Ar eras aemawiri nat, ucimaram? Bare, e onam op malaikat pemerintah owam, e onam op malaikat kepala owam, e Kristus basicim barewsi ow apormes ara, ar e Allah abi binip umutonas takas apormes. Allah, e ow, inimas wow cowok bapor, akat aemefen. Inimas ar eras aemawirien.

¹¹Allah eras aemawiri ara, ar e ametnak at aetiwefas jipu aemawirien. E at aetiwefas, bare e Kristus Yesus daTuhan aemefas cowok ara.

¹²Dar e Kristus ajamkawimom ara. Daram aramat ipic asicimamom ara. Inimas dar Allah bipu memem jak fak aememamom. Daram Allah atakam mamtaw, asan akat aemamom.

¹³Inimas ara, dor janim fak car aanimamin. Car e ajurusemaminas aporcokom, car jak opok memem arapok. Bare, dor e Atakam Akat car aotawfin. Inimas ajurusemamin. Er asan akat car bomas ara.

¹⁴Dor, e daricipic Allah, e akatnakut at aetiwefas bi binip aceceremcey, dor aramat ipic bipu jine onok aneyotapcimin.

¹⁵Aramat ipic, e onam op atiperesam, awames capinmi atiperesam, bare aricipic ara.

¹⁶Allah arakatnakutas bare awutut ara. Inimas ara, dor, aramat ipic Kristus mamkawi fak jak car batetam, inim janim aanimcimin. Bare, e Allah Roh inim jak car atetamceman.

¹⁷Inimas car Kristus asicimcokom, Kristus e cajak aman aemapceman. Doram, car ow damosnak bajiomkurum, inim janim Allah aanimcimin.

¹⁸Dor Allah, bi binip umuton, caram, e ow tarowat takasam, batetam, inim janim aanimcimin. Inimas car e Kristus damos awutnakut ajiomamarowas aporcomokom.

¹⁹E damos, bare awutnakut ara. Inimas ara, dar e damos bwemporkurum asan opok. E nat, dor car e damos bapor, janim Allah aanimcimin. Inimas aemcokom, Allah car aomomkurumtotorceman.

²⁰Allah, bare faknakut ara. Ar e fakas, e dajak aman, akatnakutas bwem aememama. Dar ar inim akatnakutas bwem, janim aramat ipic bwemanimkurum asan opok. Daram eras bi binip bwemceceremkurum asan opok.

²¹Allah, ow, Kristus Yesus basicim barewsiapawar, at aetiwefen. Aram aramat ipic asmat bajortew ipic atewemefen. Inimas ow, “Allah akatnakut ara,” inim atakam baatamotawawarces. A atakam, bare atakamnak ara.