Read Central Asmat EFESUS 4 Bible Online

EFESUS 4 - Central Asmat bible

EFESUS 4

¹Bare, dor Tuhan kerja bwemtam ipic ara. Inimas ow penjara cem aman ajiwtewapomfenes. Doram atjen car aowmin: Allah car ajatetotorfan ara, ar asan akatnakut car aomfan. Bare car inim asan akat momom ow awcawor emey.

²Car carma batawsicim arapok. Caram ow demesnakap ememey. Jakam fano arapok. Caram damos aamjiomey. Jak jirowam omomey.

³E Roh Kudus, bi binip cawor atetamcema. Bare, caramaman asan akat mamomporey. Inimas aemcokom, car e binip cawor aceceremawarcomokom.

⁴Bare, dar a takas dam cowokut ara. E Roham, cowokut ara. Allaham, dar jireyas cowokut bwe ajatetotorforow.

⁵Tuhanam cowokut ara. E asicimamomas cowokut ara. E bwi babwimas cowokut ara.

⁶Allaham cowokut ara. Daram takas daricipic cowokut ara. Ar dar takas aomomamarow. Daram takas akerja bwemtam ow ara. Aram dar takas e dajak aman aemaptotormarow.

⁷E nat, Kristus, kerja a bwemtam cescuwas, dar atetamtotorforow. Er Kristus dar batetam akat aporefas jipu ara.

⁸Inimas ara, e Alkitab atakam: “Aramat ipic onam opnakut asan aaptometef ara, ar e taw aatef ow arke atowotometef. Aram cescuwas, ow atetamtotoref.” Inim aema.

⁹E atakam, “Aramat ipic op aaptometef,” ucimaram? Er e aramat ipic bap cenes aneyef atakam ara. Bare, aramat ipic a cenesnakut capinmi aneyef.

¹⁰E cenes aneyef ipic, bare e opnakut aaptometef ipic cowok ara. E onam opas, bare cenes inim. E aramat ipic aaptometef asan nat, opnakut ara. Eras aemef, ar e asanin asanin takas aememef.

¹¹E aramat ipic, cescuwas, ow atetamtotoref ipic ara. Ar wun ow, atakam botaw batewosom ow atawemef. Wun masirin, Allah atakam botaw ow atawemef. Wun masirin, e Atakam Akat bacacapiom ow atawemef. Wun misirin, gembalaam, Allah akatam mamememtamam, inim ow atawemef.

¹²E ow atugas masirin, e ow tarowat, Allah kerja akat bwemtam inim mamememapom ara. Eras e Kristus basicim barewsi ow e Kristus mamkawi fak bemapom ara.

¹³Inimas ara, dar takas, e asicimamomas, bi binip cowkon aceceremcomom. Bare dar Allah atiw namsom. E namsomas, bi binip cowkon aceceremcomom. Dar masirin, sur aotemkurumcomom. Dar Kristus inim cimin tarowat aememcomom.

¹⁴Inimas dar jiwi cimin boemem opok aemcomom. Waam dar bajirwawacimtaw inim cimin boem opok aemcemarow. Foam dar erepem berfufumtiwa, arasan enawfufumtiwa, inim cimin boem opok aemcemarow. Bare, e suw atakam bapwipwikimtaw ow, suw atakam at aetiwcemes. Aram e atakam amememtamcemes. Da nat, e atakam jen boji opok aemcomom.

¹⁵Dar masirin, atakamnak ajamkawicomom. Daram ow damos ajiomcomom. Daram Kristus ajamkawicomom. Inimas dar sur aotemcomom inim cimin ara. Bare, Kristus, kus inim cimin ara.

¹⁶Dar masirin, adam anakatas inim cimin ara. Dar aporsipor adam anakat pomanas inim cimin ara. E adam anakatas bare fim epcom. E fim e adam anakat pomanas takas akekemtawma. Bare, e dam anakat epcom, jirey Kristus cowok aema. E dam anakat pomanas aporsipor, akatas aemtotorces, e dam anakat epcom, sur aotemcema. E dam anakat pomanas takasam damos aamjiomcemes.

¹⁷Bare, dor Tuhan ajamkawimin. Inimas dor inim atakam fak car aotawmin: car e Allah amsom opok ow inim cimin boemem arapok. E ow abi binip bare desen.

¹⁸Abi binipam jiwic ara. Aram amsom opok. Aram jen fak ara. Inimas ar e Allah atetamcemar jiwneas amsom opok.

¹⁹Aram namke bokay opok aemcemes. Aram e pwicaknakutas bwem, ji aemcemes. Aram e jursumecas jukpiri aemkurumcemes.

²⁰Car Kristus mamkawi, inimas bwem mamemem opok aemfokom.

²¹Car aramat ipic atakam jen emcajifokom araman. Camam aramat ipic ajamkawifokom. Ow masirin, e Yesus atakamnak car amememtamfan.

²²Inimas e bap aemawirukumas mamkoromtiwkurumtotorey. E catarey jak mamfamtiwtotorey. E catarey jak basinomas, bare tot car aotman.

²³Allah e cajakam, e cabi binipam, ay bajaworomtamawarcan.

²⁴Car aporsipor ay jak batowoptotorey. Bare, Allah e ay jak e arop jak jipu aemtamef. E ay jak atowopces ow, ow tarowatnakam, ow akatnakam, aememcemes.

²⁵Caram suw atakam bootaw arapok. Dar aporsipor, Kristus adam anakat pomanas inim cimin ara. Inimas caramaman, atakamnak cowok mamamtawey.

²⁶Car jak amop aememcokom, dosa bwem arapok. Jak amop, jo basapiney ajiwar arapok.

²⁷Iblis car dosa bwem acajijimtawcan, caram eras mamotpemkurumey.

²⁸E osom ow, osom boe arapok. Ar kerja fak baemces. Aram kerja akat baemetces. Inimas ar pok e pok opok ow boporseyetam ara.

²⁹Caram jursumec atakam bataw arapok. Ca nat, ow atakam akat mamotawey. E oratakam jen ajices ow asan akat bomas jipu cowok mamotawey. E ow masirin, asan akat aemapcemes.

³⁰Car, e Allah aRoh Kudus, jak pwicak bemapom arapok. Aramat ipic, car Allah arow ara, inim aporomtamama. Inimas ara, Allah car asep jofay ajortewkurumceman apormokom ara.

³¹Car e ow bifanasam, e jokmen mememasam, e jak amopasam, e owen atakamam, e cemew atakamam, e pwicakas takasam, mamjiwitiwey.

³²E nat, caramaman asan akat mamamjiomey. Damosam mamamjiomey. Bare, car Kristus ajamkawifokom. Inimas Allah e aemfokom dosa, binip ajiwosomef. Inimas caram, e caramaman ow, e car aemfan salah, binip mamjiwosomey.