Read Central Asmat EFESUS 5 Bible Online

EFESUS 5 - Central Asmat bible

EFESUS 5

¹Car Allah atiperes ara. Aramat ipicam damos car ajiomaman. Inimas car aramat ipic cimin mamememey.

²Caram ow damos mamjiomey— e Kristus damos dar ajiomforow inim cimina. Aram damir aaftamforow. E damir aaftamforowas, bare, pinim akatipic pok, Allah jis bafamtamas inim cimin ara.

³Bare, car Allah arow ara. Inimas car cen cemen osom emcokom. Jursumecas emcokom. Pok batewet bi binip bacecerem cowok arapok. Car inimas bwem opok cowok mamemey.

⁴Caram jursumec atakam arapok. Desen atakamam arapok. Jursumec uc atakamam arapok. Ca nat, terima kasih atakam Allah mamotawawarey.

⁵Bare, car inimas mamporkurumey: Cen cemen osom owam, jursumec owam, pok batewet bi binip bacecerem cowok owam, e Kristusin Allah Pemerintah Asan bwemfiw asan opok. (Pok batewet bi binip bacecerem cowok, bare ēco basicim inim cimin ara.)

⁶Inimas bwem ow, Allah atakam aopowmes. Inimas ara, Allah e ow siksa aemcema. Bare, ow eras desen atakam car botaw arapok. Aram eras tot car bot arapok.

⁷Caram e pwicakas bwem ow, bakawiem arapok.

⁸Bap ara, car jiwic ow aememawirukum. Wow nat, car Tuhan aras ara. Car sere ow aememfokom. Inimas ara, car sere ow jipuas mamemey.

⁹Bare, sere ow, akatas takasam, tarowatas takasam, aemames. Aram atakamnak aotawkurumames.

¹⁰Bare, caram e Tuhan akat apormaras mamporkurumporey.

¹¹E jiwicas bwem, caram arapok. E jiwicas, bare desenas ara. Caram e jiwicas umuton mamporomey.

¹²Ow e jiwicas aemames, eras curuw aemames. Eras namkeasnakut ara. Daram eras atakam batawji opok.

¹³E nat, ow e jiwicas umuton aporomces, ow e jiwicas pwicaknakut aporcemes.

¹⁴Bare, e umuton aporomcesas takas, sereas ajaworemcemes. Inimas ara, Allah inim atakam atawma: “E car isi bwes ow, mamjitey. E car damir ow, mamojaworsitey. Kristusam sereas e capu aseremtiwcema.” Inim aema.

¹⁵Inimas ara, aemamokomas pimicim mamemkurumey. Car bi binip umuton ow mamememey. Bi binip jiwic ow memem arapok.

¹⁶Awames jofayin jofayin, ow pwicaknakutas aemames. Inimas ara, car akatas bwem asan akat aporcokom, bare e akatas mamemey.

¹⁷Caram jen bemap arapok. Car Tuhan e akat apormaras mamporkurumporey.

¹⁸Caram jokmen bwi jayic arapok. E jokmen bwi jayic ow, jursumec aememcemes. E nat, e Roh Kudus car baomomkurumtotorcan.

¹⁹Car Tuhan basicim soam, Tuhan atakam soam, e Roh atetamcemar soam, caramaman mamatawey. E Tuhan atakam soam, e a basicim soam, jak akat epcom e Tuhan mametamey.

²⁰Caram e daricipic Allah, e atetamamanas takas terima kasih atakam aramat ipic mamatamotawey. Car e Yesus Kristus daTuhan ajamkawimokom apormokom ara.

²¹Car Kristus asicimamokom. Inimas caramaman, atakam ji mamamey.

²²Cepesa. E camiwis atakam ji mameey— car Tuhan atakam ji aemokom inim cimina.

²³Bare, arem e armipic ban ton ara— e Kristus basicim barewsiap ow e Kristus ban ton aemapmes inim cimin ara. Aramat ipic e ow abajortew ipic ara. E owam Kristus adam cimin ara.

²⁴E Kristus basicim barewsiap ow, aramat ipic atakam ji aecemes. Cepesam e amiwis atakam ji inim cimin baekurumces.

²⁵Owerowa. Damos e cacepes mamjiomey— Kristus, damos, e abasicim barewsiap ow ajiomama inim cimina. Bare, aramat ipic e ow damir aaftamef.

²⁶E damir aafefas, e ow, tarowat bemapomtamas ara. Aramat ipicam e ow bwi abwimef inim cimin ara. Aram aratakam e ow aotawef. Inimas ar e ow orom aetamef.

²⁷Eras takas, e abasicim barewsiap ow, ow akatnakut e abipu batewemas ara. Er, ar e ow ponowas epcom opokam, kokom epcom opokam, wun pwicakas epcom opokam, e abipu batewemas ara. Bare, er e ow, ow tarowatam, salah opok owam, e abipu batewemas ara.

²⁸Owerowam, damos e acepes inim cimin bajiomces. Ar e acepes, e adam inim cimin damos bajiomces. E arem damos bajiom ipic, damos arma ajiomama.

²⁹Ow e arop dam bifan bafayom opok cowok aemcemes. Ar e adam jakay ajicemes. Aram e adam asan akat aomcemes. Er Kristus e abasicim barewsiap ow asan akat aomcemar inim cimin ara.

³⁰Bare, dar aramat ipic e adam anakat pomanas jukpiri inim cimin awapom ara.

³¹E Alkitab atakam: “Inimas, jipic e aricipicam, arosowocam, bakan bajioscow. Ar e arem cowkon baemapcow. E ow jamnuk, dam cowok bajaworemces.” Inim aema.

³²Inim atakam, amannakut atakam akat ara. Dobi binip ara, e atakam Kristusin e abasicim barewsiap ow atakam ara.

³³E nat, e atakam car aporsipor atakamam ara. Car damos carma ajiomtotormokom. Bare caram e cacepes damos inim cimin bajiomtotorey. Cepesam e amiwis basicimces.