Read Central Asmat EFESUS 6 Bible Online

EFESUS 6 - Central Asmat bible

EFESUS 6

¹Jiwia. E carisepes atakam ji mameey. Inimas bwem, bare Tuhan mamkawi owas ara. Er akatas ara.

²Bare, e Alkitab atakam: “E oricipicam, e orosowocam, mamsicimey. Inimas aecem, or asan akat aemapcemem. Oram a capinmi jiwne jirow aemcemem.” Inim aema. E jirmec, bare atayi epcom jirmec ara. E atayi epcom jirmec aman, e jirmec, bare bap a takam ara.

⁴Ducur owa. E cajiwi jak amop bwem arapok. Ca nat, e jiwi Tuhan atakam mammememtamey. Caram e jiwi Tuhan mamkawi atjen mamowey.

⁵Kerja bwemtam owa. Car e cakerja aramat ow atakam ji mameey— car Kristus atakam ji aemokom inim cimina. Caram e ow mamsicimkurumey. Omaram mameey. E atakam ji bwe, pir bwe arapok.

⁶Car aratakam ji bwe, e abipu cowok arapok. Car asmat owin jak akat bwem arapok. Bare, car Kristus akerja bwemtam ow ara. Inimas car Allah e akat apormaras bwem jec awut mamwuey.

⁷Car asmat owin kerja bwemtam arapok. Car Tuhan kerja aemtamamokom. Inimas e kerja jak akat epcom mamemey.

⁸Caram camsom ara. Tuhan, ow e kerja akat aemtamces jipu, asan akat e ow aporsipor atetamcema. Ar e asan akat e mami kerja bwemtam ow atetamcema. Aram e asan akat e arop kerja aemames ow atetamcema.

⁹Kerja aramat owa. Caram inim asan akat e cakerja bwemtam ow mamomey. Jokmen atakam e ow botaw mamkariemey. E ow aTuhanam, e caTuhanam, onam op awap. Aramat ipic ow takas awcawor aporma. Car inimas camsom ara.

¹⁰Bare, dor a atakamnakap car aotawmin: Car Tuhan ajamkawimokom ara. Inimas fak mamememawarey. E Tuhan atetamcemar fakas mamtowomatkurumawarey.

¹¹Car e Allah atetamcemar owec pok takas mamtowomkurumey. Iblis car bakumimosomasin. E Iblis pir car bwe, at aetiwma.

¹²Bare, dar owec asmat ow bamo opok. Dar owec, dat pemerintah owam, dat kepala owam, aamomom. Daram owec a wow emapmom jiwic capinmi jirmec ajirimames dat owam aamomom. Daram owec e onam op jursumec dat owam aamomom.

¹³Inimas ara, e Allah atetamcemar owec pok takas mamtawey. Inimas aemcokom, e pwicak jofay aenawcow, car e jewew ow amatam aemcomokom. Caram owec aamokurumcokom, car tiw aotemcomokom.

¹⁴Bare, car inim mamakajiremkurumey. Car e Allah atakamnak mamtewetey. Er car ase manam pok bajikem inim cimin ara. Caram ow tarowat mamememey. Er car sey baju bajumom inim cimin ara.

¹⁵Ow e Atakam Akat ji aeces, aram ow damos aamjiomcemes. Caram e Atakam Akat botaw jak akat mamemey.

¹⁶Wunam, Kristus mamsicimey. Er car jemes bawuom inim cimin ara. Inimas aemcokom, car Jursumec Ipic, e ajiwimar jismak epcom ces takas, asapimapomkurumcomokom.

¹⁷Kristus car bajortew aememama. Caram e bajortewas mamtowopey. Er car owec topi bajimapomas inim cimin ara. E Allah atakam, bare e Roh atetamef atakam ara. E atakam, owec parang inim cimin ara. Caram e atakam mamtewetey.

¹⁸Janim Allah mamanimawarey. Allah tolong car bwem, inim janim mamanimawarey. E Roh Kudus bi binip car atetamamanas jipu, janim Allah mamanimawarey. Inimas ara, janim fak mamanimawarey. Bakorompim arapok. Janim Allah e ow tarowat takas mamanimtamawarey.

¹⁹Janim Allah doram mamanimtamcan. Atakam botaw ememcey, Allah aratakam binip dor batetam, inim janim mamanimtamcan. Caram dor e Atakam Akat amannakutas, omar opok jak epcom, umuton botaw, inim janim mamanimtamcan.

²⁰Doram e Atakam Akat bajomattam ipic ara. Inimas ow rantai e dobanam, e dobweyam, manam ajikapomfenes. Inimas ara, dor e atakam, omar opok jak epcom botaw, inim janim Allah mamanimtamcan— e Kristus dor e atakam botaw akat apormaras jipu ara.

²¹Bare, Tikikus damos ajiomamin ipic ara. Aram Tuhan kerja anakat bwemtam ipic ara. Aramat ipic doratakam car aotawceman. Inimas car, dor asan akatnew, asan pwicaknew, jen ajicomokom.

²²Dor aramat ipic inimas car atewenamtamof. Dor aramat ipic, daratakam car botawam, jak fak car bemapomam, car atewenamtamof.

²³Bare, daricipic Allaham, Tuhan Yesus Kristusam, jak akat e dajowow batetamces. Aram, ow damos bajiomam, Kristus basicimkurumam, inim bi binip e ow batetamces.

²⁴Wun ow, damos, e Yesus Kristus daTuhan, bakari opok ajiomames. Bare, Allah asan akat e ow baomcow.