Read Central Asmat FILIPI 1 Bible Online

FILIPI 1 - Central Asmat bible

FILIPI 1

¹Dor Paulus ara. Doram, Timotiusam, Kristus Yesus akerja bwemtam ow ara. Dar a surat, e car kota Filipi ow tarowat takas aeapomtamamenom— e car Kristus Yesus ajamkawimokom mami owam, e gereja bap ewamcokom owam, e gereja pembantu owam, inima.

²Daricipic Allaham, Tuhan Yesus Kristusam, asan akat car baomcan. Aram jak akat car batetamcan.

³Dor car bi binip acomomcey, dor car terima kasih atakam e dorAllah aotawcimin.

⁴Ametnakam ara, wow ajiwaram ara, dor e Atakam Akat acacapiomawiru, caram e kerja akac aemawirum, inim aporawiru. Inimas ara, dor janim Allah car aanimtamcey, dor jak akat epcom janim aanimcimin.

⁶Ametnak ara, Allah, a akatas, car asusumemtamtotorfan. Aramat ipicam, a akatas, e Kristus Yesus aofasienawcow jofay ajiwar, aemtamkurumceman. Dor inimas nomsom ara.

⁷Bare, dor damos awutnakut car ajiomamin. Inimas ara, dor inim bi binip car bacecerem, bare akat ara. Allaham asan akat doram, caram, akac aomamarow. Dor a penjara cem aman aemapmin, ar asan akat dar akac aomamarow. Bapam ara, dor a penjara cem aman bemap opok aemawiru, doram atakam e atakam bopow ow aotawawiru. “A Atakam Akat, suw opok. Er atakamnak ara,” inim ajiawiru. Doram ow a Atakam Akat ji bwekurum, inim atakam aotawawiru. Dor inimas takas aeawiru, Allah, asan akat dar akac aomawiruw.

⁸Bare, dor damos awutnakut car ajiomamin. Kristus Yesusam inim damos jak dor atetamfan. A atawmin atakam, bare atakamnak ara. Allaham inimas amsom.

⁹Doram janim aramat ipic aanimamin: “E Filipi ow, damos, ow bajiom, kayimin bakakayiomces. Aram e oratakam amsom baemces. Aram bi binip umuton baceceremces.” Inim janim aanimamin.

¹⁰Car e Allah janim aanimaminas jipu aemcokom, car e akatasnak bwem aereremtawcomokom. Caram jursumec opok owam, pwicakas bwem opok owam, aememcomokom— e Kristus aofasienawcow jofay ajiwara.

¹¹Caram e tarowatas jipu cowok aemkurumcomokom. E tarowatas bare, e Yesus Kristus car aemtamcemanas ara. Inimas takas aemcokom, Allah an afufuoscema. Owam aramat ipic asicimcemes.

¹²Dojowow akatonokom. Dor car inimas baporkurum akat aemamin: E ow dor aemfenesas, ow arke e Atakam Akat jen bajias ara.

¹³Dor Kristus kerja bwemtam ipic ara. Inimas ara, ow dor penjara cem aman ajiwtewapomfenes. Bare, e manmok do batiw tentara ow takasam, e wun ow takasam, inimas apormes.

¹⁴E wun dajowow takas, dor a penjara cem aman aemapmin aporfes. Tuhan masirin, jak fak awut e ow aotatamtotoref. Inimas ara, ar e Allah atakam bacacapiom, jak fak kayimin akakayimfes. Aram omar opok aememfes.

¹⁵E wun ow, bare icim afesmes araman. Aram bifan dor afayomamenes. Inimas ar e Kristus atakam acacapiomames. E wun ow nat, e Kristus atakam, bi binip akat epcom acacapiomames.

¹⁶E ow damos dor ajiomamenes. Bare, e Atakam Akat suw atakam opok. Allah dor inim atakam botawtam ipic atewemfan. E owam inimas apormes.

¹⁷E wun ow nat, e Kristus atakam acacapiomames, bare bi binip pwicak aceceremames. Abi binip ara, “Ow arke daratakam jen ajices, e Paulus icim afescema. Bare, ar e penjara cem aman, jak pwicak awutut aoemapcema.” Inim bi binip pwicak aceceremames.

¹⁸Bare, inima. Ow, e Kristus atakam bacacapiomkurumces. Ar e atakam bacacapiom, bi binip pwicak epcomnew, bi binip akat epcomnew, bare jak akat aemapmin. Doram jak akat aatamemapawarcimin.

¹⁹Bare, car janim Allah dor aanimtamamenokom. Wunam e Yesus Kristus aRoham akac dor aemaman. Inimas ara, dor asan akat aemapcimin. Dor inimas nomsom ara.

²⁰Dor namke bakayem pwicak anakat aemamin. Doram atakam umuton wow botaw jak fak bomop, jak aseremomkurumamin— e atakam umuton aotawa ajimop awcawora. Inimas tetakay ememceynew, damir aafceynew, bare e aemceyas takas, Kristus basicimkurumas ara.

²¹Dor tetakay aememamin, dor Kristus atakam ji aeawarmin. E nat, damir aafcey, asan akat aemapcimin.

²²Dor tetakay aememawarcey, dor Kristus kerja akat aemtamawarcimin. Inimas ara, dor tetakay mememawar akatnew, damir baf akatnew, bare dor inim atakam bwemsakamtiw asan opok.

²³Dor bi binip arke ara. Dor damir baf, wunam Kristus cowkon bemap, jak aseremomamin. Inimas aemcey, bare akat ara. Dor tetakay memem, bare pwicak inim.

²⁴E nat, dor tetakay aememamin, er car asan akat bomas ara.

²⁵Dor eras nomsom ara. Inimas dor damir sarim opok apormin ara. Dor car cowkon aememcimin. Inimas car Kristus basicim fak kayimin akakayimcomokom. Car Kristus basicim jak akat epcom kayimin akakayimcomokom.

²⁶Inimas ara, dor car cowkon aoememcey, e ca Kristus Yesus ajamkawimokom ow, aramat ipic basicim awutut, asan akat aememcomokom.

²⁷Bare, e join join aemamokomas, car e Kristus Atakam akat jipu bwemji. Eras bwem, bare anakatas ara. Inimas aemcokom, car inim akajiremcomokom. Caram takas atakam cawor atawcomokom. Caram bi binip cawor epcom, ow e Atakam Akat basicim, inim botaw, kerja fak aemcomokom. Dor masirin, car bi bapor ajinawomceynew, dor car bajinawom opok emceynew, dor e akat aemamokomas jen ajicimin.

²⁸Car e cajewew ow omar arapok. E ow car omar opok aporcan, ar e daniwis aemamescesas, umuton aporcemes. Aram car ajoremcomokom, umuton aporcemes. Allah eras e ow aporomcema.

²⁹Bare, Allah, car e Kristus basicim, inim asan car átetamfan. E nat, e cowok opok. Car Kristus ajamkawimokom. Inimas ow car ajurusumceman. Allaham car bajurusem, inim asan car atetamfan.

³⁰Doram ow Kristus basicim atakam aotawawiru. Wun ow masirin, ajurusumfan. Caram inimas aporfokom. Wowam ow ajurusumamenes. Caram inim atakam jen ajimokom. Bare, ow caram inim cowok ajurusumaman.