Read Central Asmat FILIPI 2 Bible Online

FILIPI 2 - Central Asmat bible

FILIPI 2

¹Bare, car Kristus ajamkawifokom. Aramat ipic masirin, jak fak car atetamfan. Aram damos car ajiomaman. Inimas car jak akat aemapmokom. Caram e Roh Kudus ajowow aememamokom. Caram caramaman damos aamjiomamokom. Caram caramaman sawes akat aamoworpormokom.

²Inimas ara, caram bi binip cawor baceceremey. Caram damosnak aamjiomey. Atakam cawor aotawey. Aporsipor arop atakam arapok. Inimas aemcokomnew, caram jak akatnakut dor aomcemenokom.

³Car, carop asan akatas, bi binip bacecerem cowok arapok. Carop akat, wun ow pwicak, inim bi binipam bacecerem arapok. E nat, car pwicak inim, wun ow akat inim, inim bi binip baceceremey.

⁴Caram, car asan akat aemapmokomnew, asan pwicak aemapmokomnew, inim bi binip cowok bacecerem arapok. Ca nat, e kawey owam, asan akat aemapmesnew, asan pwicak aemapmesnew, inim bi binipam baceceremey.

⁵E Kristus bi binip aceceremefas jipu, bi binip carma baceceremtotorey.

⁶Bare, aramat ipic Allah ara. E nat, ar, e aricipic Allah, awcawornak mememkurum, jak baseremom opok.

⁷Bare, aramat ipic e Allah awcawor memem aokoromtiwef. Ar masirin, kerja bwemtam ipic aememef. Ar asmat ipic dar cimin ajaworemef. Ar asmat ipic biam, damam, atowomef.

⁸Aramat ipic asmat ipic aememef, ar ow pwicak cimin aememef. Aram aricipic atakam jipu cowok aemef. Inimas ar damir aafef. Er e salib os op damir bafas ara.

⁹Inimas Allah, aramat ipic op aotomettewemef. Aram e akutnakut juwas e aramat ipic aamef. Bare, e wun juwas takas e juwas awcawor opokut.

¹⁰E onam op ow takasam, awames capinmi ow takasam, e cenes capinmi ow takasam, e juwas jen ajices, bare Allah e ow jine onok baneyotaptotor akat aemama.

¹¹Aram, ow takas, “E Yesus Kristus, bare Tuhan ara,” inim atakam umuton botawtotor, akat aemama. Ow inimas aeces, aram daricipic Allah, asicimcemes.

¹²Dojowow akatonokom. Dor car cowkon aemapawirum, car doratakam ji aeawirukum. Wowam dor car cowkon memap opok aemamin. E nat, caram doratakam ji ekurumey. Allah mamkawi fak aatameawarey. Aramat ipicam aatamsicimkurumey. Inimas aecokom, caram asan akat aemapcomokom.

¹³Bare, Allah, car e akat apormaras jipu bwem, inim jak car atetamaman. Aram e akat apormaras jipu bwem, inim fakas car atetamceman.

¹⁴E aemamokomas takas, jak akat epcom emey. Jirpu bapuputaw arapok. Atakam mamtawam arapok.

¹⁵Inim atakam jipu aecokom, ow car salah ow ara, inim atakam bwemotaw asan opok. Caram jursumec opok ow aememcomokom. Caram Allah atiperes tarowatnak aememcomokom. E nat, car awames capinmi fasi owam, jokmen owam, awasec aemapmokom. Car a jiwne atakam e ow aotawcokom, car e onam op bayar inim cimin, e ow wasec asereyapcomokom. Inimas aemcokom, e Kristus aofasienawcow jofay, dor e aemfokomas, jak akatnakut aememcimin. Dor e kerja awutnakut aemawirias desen opok aporcimin.

¹⁷E Kristus asicimcokomas, pok Allah bacatiwtamas inim cimin ara. Doram, car Kristus basicimkurum mamememtam, damir aafcimin openow. Ow acatiwcenes, e dores e pok ton bokokomapomas inim cimin ara. Bare, dor inimas bwem jak akat aemapmin. Doram car akac jak akat aemapmom.

¹⁸Bare, caram inim cimin cowok jak akat aemapey. Daram jak akat akac aemapmoc.

¹⁹Bare, dor caratakam jen ajicey, jak fak aemapcimin. Inimas, Tuhan Yesus akat aporcow, dor Timotius car atiwinamtamcimin.

²⁰E wun dor akac ow, e aramat ipic awcawor opok. Aramat ipicam, doram, bi binip cowkon aceceremamom. Aram car asan akat bemap, jak aserememkurumama.

²¹E wun ow takas aropas cowok bi binip aceceremames. Ar Yesus Kristus bi binip opok.

²²Ca nat, e Timotius, ow akat cowok emeporfokom. Ar dotiw inim cimin ara. Doram aricipic inim cimin ara. Dar masirin, e Atakam Akat akac acacapiomfom.

²³Inimas ara, dor e taw aatfenes ow e aemcenesas aporkurumcey, dor aramat ipic sarimnakap car atiwinamtamcimin.

²⁴Doram Tuhan jirey aemin. Aramat ipic akat aporcow, dor sarim inim car ajinawomcimin.

²⁵Dor, dajowow ipic juwas Epafroditus, car bofasimtam, atakam asakamtiwof. Bap ara, car aramat ipic atiwinamfokom. Aramat ipic masirin, kerja dor akac aemawirum. Daram Kristus ajewew ow owec akac aamoawirum inim cimin ara.

²⁶Bare, aramat ipic car bi bopor jak aserememawiri. Caram e aramat ipic dam ajowefas jen emejifokom. Ar inimas aporef ara, jak pwicak aemapef.

²⁷Bare, aramat ipic dam ajowef araman. Ar damir bafken aemamesef. E nat, Allah saw akat aramat ipic aoworporef. Ar saw akat e aramat ipic cowok boworpor opok. Aram saw akat dor aoworporfan. Dor e jak pwicak aemapofas bokawimasin.

²⁸Inimas ara, dor aramat ipic car asarimtiwinamtamcimin. Car aramat ipic bi aoporcokom, jak akat aememcomokom. Doram jak akat aoememcimin.

²⁹Car aramat ipic atowomiwcokom, jak akat aememey. Ar Tuhan car cowkon ajamkawimokom. E inim cimin ow takasam mamsicimey.

³⁰Bare, e aramat ipic Kristus kerja aemtamef ara, ar damir bafken aemamesef. Caram arasan kerja dor akac bwemem asan opok. Aramat ipic nat, juw car auwuemfan. Inimas aram asan pwicak aememef.