Read Central Asmat FILIPI 4 Bible Online

FILIPI 4 - Central Asmat bible

FILIPI 4

¹Dojowow akatonokom. Dor damos car ajiomamin. Doram cato ara. Caram jak akat dor aemapomamenokom. Doram caratakam, kawey ow takas botaw, bare jak akat aemapmin. Bare, car a atawmin atakam ji mameey. Car Tuhan ajamkawimokom ara. Car masirin, inim akajiremcomokom. Bare, car damos ajiomamin ow ara.

²Euodia. Sintike. Dor janim fak car aanimamin. Car Tuhan ajamkawimokom cepes jamnuk ara. Inimas bi binip cowoka.

³Sunsugos. Or dojowow ipicnak ara. Doram janim or aanimamin. E cepes jamnuk, e Atakam Akat botaw, dor akac kerja faknakut aemfes. Inimas ar bi binip cowok bececerem, inim atjen mamowey. Bare, Klemensam, e wun dorakac kerja ow takasam, kerja faknakut aemfes. E ow juwas e jiwnenak epcom ow buku aman awapes.

⁴Bare, car Tuhan ajamkawimokom. Inimas jak akat aememawarey. Dor a atakam aotasimamin. Jak akat, aememawarey.

⁵Ow takas, car asan akat kawey ow aomamokom baporces. E Tuhan aofasienawcow jofay, bare sotop ara.

⁶Caram fa jakay baji arapok. E nat, janim Allah manim cowoka. Janim Allah aanimcokom, terima kasih atakamam aramat ipic mamotawey.

⁷Allah masirin, jak akat car atetamceman. Inimas car jak pwicak bemap opok aemcomokom. Caram bi binip pwicak bacecerem opok aemcomokom. Car Kristus Yesus ajamkawimokom. Inimas Allah eras aomceman. Bare, dar asmat ow cowok ara. Inimas dar e Allah atetamcemarow jak akat, bi binip bwemceceremkurum asan opok.

⁸Dojowow akatonokom. A asep atakam ara: E atakamnakam, e akatasam, e fasi opokasam, e jursumec opokasam, e damosasam, e jen baji akatasam, bi binip mamceceremkurumey. E tarowatasam, e basicimjiasam, bi binip mamceceremkurumey.

⁹E amememtamfinasam, e doratakam atewetfokomasam, e doratakam jen ajifokomasam, ji mameey. E aemofasam jipu mamemey. Inimas aemcokom, e jak akat atetamcemar Allah, car akac aemceman.

¹⁰Bare, jepen inim, car bi binip dor aoceceremfenokom. Inimas Tuhan jak akatnakut dor atetamaman. Bapam ara, car binip do manim opok aemapawirukum. E nat, car pok do batiwinamtam asan opok aemapawirukum.

¹¹Do nat, e pok opok ajurusapminas atakam opok. Dor opok epcom bemapnew, pok opok bemapnew, bare dor jak akat bemapawar amememof.

¹²Dor wun jofay pok opok aemapof. Wun jofayam pok awut epcom aemapof. E nat, e asanin asanin aemapmin, dor jak akat aemapmin. Join join fafaymaram, dor jak akat aemapmin. Dor Inimas bwem amememof. Bare, dor jak piti aemapceynew, dor amosto aemapceynew, pok awutut aomopceynew, pok opok ajurusapceynew, dor jak akat aemapcimin.

¹³Bare, Kristus fakas dor atetamaman. Inimas dor e takas bwem bisa cowok ara.

¹⁴Bare, dor ajurusapof ara, car saw akat aoworporfenokom. Eras akat cowok ara.

¹⁵Dor Makedonia ajisosof ara, wun Kristus basicim barewsi ow, uang do batetam opokut. Car cowok uang atetamfenokom. Eras e Atakam Akat jen jepen ajifokom jofay ara. Awapokom Filipi ow inimas camsom.

¹⁶Doram kota Tesalonika pok opok aemapof ara, bar mamincop car uang atiwinamtamfenokom.

¹⁷Do nat, car pok do batetam jak baseremap opok. Dor Allah asan akat car bom jak aseremapmin.

¹⁸Bare, dor e atiwirimtamfenokomas takas asan akat atewof. Dor masirin, wow pok awut awompey. Epafroditusam e atiwinamtamfenokomas atetamfan. Inimas dor asan akat cowok awapey ara. E atiwinamtamfenokomas, bare pinim akat pok Tuhan Allah jis bafamtamas inim cimin ara. Aramat ipicam eras akat apormar ara.

¹⁹E dorAllah, bare pok akatipic awut aomomamar ara. Aram e Kristus Yesus aemefas apormar ara. Inimas ar e asan pwicak aemapmokomas takas, asan akat aomceman.

²⁰E darAllah, bare daricipicam ara. Ow, aramat ipic baatamsicimawarces. A atakam, bare atakamnak araman.

²¹Caram selamat atakam e Kristus Yesus ajamkawimes ow tarowat mamotawtamcan. E dor akac dajowow takas, selamat atakam car aotawman.

²²E raja Kaisar cem aemapmes ow tarowatam, e wun ow tarowat takasam, selamat atakam car aotawman.

²³Tuhan Yesus Kristus asan akat car takas baomcan.