Read Central Asmat KOLOSE 1 Bible Online

KOLOSE 1 - Central Asmat bible

KOLOSE 1

¹Dor Paulus ara. Kristus Yesus, aratakam botaw atewosomfan. Allaham inimas akat aemef. Dajowow ipic Timotius, a surat akac aeapomamom.

²Car masirin, kota Kolose ow tarowat ara. Car Kristus asicimamokom. Inimas car dajowow ara. Daricipic Allah, asan akat, car baomcan. Aram jak akat car batetamcan.

³Atakam jen ajifom ara, car Kristus Yesus asicimkurumamokom. Caram e ow tarowat takas damos ajiomamokom. Inimas ara, dar janim Allah car aanimtamcenom, daram terima kasih atakam Allah aatamotawcomom.

⁵Bare, e Atakam Akat, atakamnak ara. Car e atakam jen jepen ajifokom, er e camanmok afefokomas aporfokom. Inimas car Kristus Yesus asicimkurumamokom ara. Caram e ow tarowat damos ajiomamokomam ara. Allaham e camanmok afemokomas e onam op atewapomtamaman.

⁶Bare, e Atakam Akat, asan akat, awames capinmi asanin asanin ow aemapomama. E Atakam Akat jen ajimes owam kayimin akakayimes. Er e aemfokomas inim cimin ara. Caram e Atakam Akat jen ajifokom. Caram Allah, asan akat, asmat ow mami atetamcema, inim atakam jen ajikurumfokom. E jofayam, wow ajiwaram, e Atakam Akat, asan akat car aomawirin. E Atakam Akat jen ajifes owam kayimin akakayiawiris.

⁷Epafras e atakam car amememapomfan. Bare, dar aramat ipic damos ajiomamom. Ar dar akac Kristus kerja aemtamamom. Aram jipic tarowat ara. Aram carasan Kristus kerja bwemtam juw auwuemforow.

⁸Aramat ipicam atakam, “E Kolose ow damos awut car ajiomaman. E Roh Kudus inim bi binip e ow atetamef.” Inim aeforow.

⁹Inimas ara, e inim atakam jen ajifom jofayam, wow ajiwaram, dar janim Allah car manimtam bakari opok aemamom. Dar Allah e akat apormaras jipu car baporomtam, inim janim aramat ipic aanimamom. Car bi binip umuton baceceremam, atakam jen bajikurumam, inim janim aanimamom. Eras, e Roh Kudus atetamamaras ara.

¹⁰Inimas aemcokomnew, car Tuhan arow memem, awcawornak aememcomokom. Caram e akat apormaras jipu aemkurumcomokom. Caram akatas takas aemcomokom. Caram Allah camsom kayimin akakayicomokom.

¹¹Bare, Allaham arakatnakut fakas car batetamcan. Inimas car fak aememcomokom. Car masirin, e ajurusemcokomas takas aman, jak jirow epcom inim akajiremcomokom.

¹²Caram jak akat epcom, terima kasih atakam, e Daricipic aotawcomokom. Aramat ipic car e ow tarowat awcawor memem, inim aemapomfan. Bare, car ow tarowat aememfokom. Inimas car e Allah atetamcemaras, e atiw pemerintah sere asan, atowopcomokom.

¹³Aramat ipic e jiwic asan fakas asurumtamforow. Ar masirin, dar, e atiw pemerintah asanpu, jiwis atuwumforow. Bare, ar e atiw damos ajiomama.

¹⁴E atiwam asurumtamforow. Aram dadosa akokoromosomtamforow.

¹⁵Bare, dar Allah bi bwempor asan opok. Kristus nat, Allah bi awcawor ara. E Kristus, betiw ipic ara. Ar awutut ara. E Allah akenemapomefas takas masirin, kanim ara.

¹⁶Bare, Kristus e onam op pok takasam, awames capinmi pok takasam, akenemapomefen. Ar e umutonas takasam, e dar bwempor asan opokas takasam, akenemapomefen. Ar e malaikat raja owam, e jirmec ajirimames malaikatam, e malaikat pemerintah owam, e malaikat kepala owam, bare takas akenemapomefen. Aramat ipicam pok takas akenemapomefen. Ar e pok takas ar basicim akenemapomefen.

¹⁷Aramat ipicam bap a takam aememefen. Aram awames capinmias takasam, e onam opas takasam, ban fak aomopma.

¹⁸Aramat ipic, bare kus inim cimin ara. E abasicim barewsi ow masirin, adamas inim cimin ara. Ar e ow ji aeremapomef ipic ara. Aram e bap takam aojaworsitef ipic ara. Inimas ar anakatnak ipic ara.

¹⁹Allaham, e atiw, Allahnak memem, atakam asakamtiwef.

²⁰E atiw e ares e salib os op airimnemef. Allah inimas aporef ara, ar asmat ow, pay bwe, atakam asakamtiwef. Aram awames cipinmias takasam, e onam opas takasam, botewet atakam asakamtiwef.

²¹Bap ara, car Allah dawon opok aememfokom. Car bi binip pwicak aceceremfokom. Caram jursumecas aemfokom. Inimas car Allah ajewew ow aememfokom.

²²E nat, Allah, e atiw aemefas aporef. Inimas aramat ipic car ajowow atewemfan. Eras, aramat ipic car ow tarowatam, ow akatam, dosa opok owam, abipu batewemas ara—

²³car e Kristus aatamsicimcokomam, car fak inim akajiremcokomam, car e jirey aefokom Atakam Akat bakorompim opok aemcokomam, ara. Bare car e Atakam Akat jen ajifokom. Owam e Atakam Akat e asanin asanin acacapiomfes. Bare, dor Paulus ara. Doram e Atakam Akat botaw, kerja bwem ipic aememof.

²⁴Bare, dor Kristus mamkawi car amememtamamin. Inimas ajurusemamin. E Kristus basicim barewsi ow, Kristus adamas inim cimin ara. Aramat ipic, e ow bajortew ajurusemef. Doram e aramat ipic bajurusemkurum opok aemefas, ajurusemkurumamin.

²⁵Allah, dor, e asanin asanin Kristus basicim barewsiap ow akerja bwemtam ipic, atewemfan. Ar a tugas bwem car asan akat bom, dor atewemfan. E tugas ara, e Allah atakam, e asanin asanin botawkurum ara.

²⁶E atakam, e Allah amannakut aatamcukumtiwawiri atakam ara. E ametnak ow takasam, e arurpis ow takasam, e atakam jen bajikurumasin. Jepen nat, aramat ipic e atakam e arow tarowat umuton aotawef.

²⁷Aramat ipic, e den akat amannakut atakam, e ow baporomtam akat aemef. Bare, e atakam e samatin samatin aras ara. E atakam ara, “Kristus e cajak aman aemapman. Inimas car e arakatnakutas aporkurumcomokom ara.” Inim amannakut atakam umuton aotawef.

²⁸Inimas ara, dar e Kristus atakam, ow takas acacapiomamom. Daram atjen, ow takas aowmom. Daram bi binip umuton epcom, atakam, ow takas amememtamamom. Er ow takas Kristus mamkawinak bemapomas ara.

²⁹Dor inimas bwem, kerja awutnakut aemamin. Doram e Kristus atetamaman faknakutas epcom, owen awut aamomin inim cimin ara.