Read Central Asmat KOLOSE 2 Bible Online

KOLOSE 2 - Central Asmat bible

KOLOSE 2

¹Dor kerja awutnakut, caram, e Laodikia owam, e dobi amsom opok ow takasam, aemtamof. Dor car e atakam jen baji akat aemamin.

²E kerja aemtamaminas, e ow jak fak bemapomas ara. Eram e ow aramaman damos mamjiomas ara. Eram e ow atakam jen bajikurumas ara. E atakam jen ajikurumces, asan akat aemapcemes. Ar masirin, e Allah amannakutas aporcemes. E amannakutas, bare Kristus ara.

³Allah abi binip umutonasam, e amsomasam, bare den akatipic ara. Eram curuwas ara. Kristus nat, eras e amamkawi ow umuton aporomtamcema.

⁴Bare, wun ow atakam akat atawcemes. E nat, pir aecemes. Do nat, a atakam car aotawmin ara. E ow tot ca botasin.

⁵Bare, dor car cowkon bemap opok. E nat, dor car bi binip awut aceceremamin. Caram bi binip cowkon apormin ara. Caram Kristus basicim fak apormin ara. Inimas dor jak akat aememamin.

⁶Car Kristus Yesus car momomkurum akat aporfokom. Inimas car aramat ipic atewetfokom. Inimas ara, caram aramat ipic atakam ji mamatameawarey.

⁷Caram e aramat ipic cowkon mamememawarey. Caram aramat ipic mamkawi fak kayimin mamkakayimawarey. Caram aramat ipic basicimnak kayimin mamkakayimawarey— ow car amememtamfan cimina. Caram terima kasih atakam Allah mamotawawarey.

⁸Caram pimicima. Ow car Kristus mamkawi bakorompim bajijimtawasin. E ow, awames capinmias atakam atawcemes. E nat, e atakam desen atakam ara. Eram tot botas ara. E atakam e ducur ow amememtamames tarey atakam jipu ara. Wun dat awames capinmias aomomames. E atakamam e dat atakam jipu ara. E atakam, e Kristus atakam jipu opok.

⁹Bare, e Kristus asmat ipic ajaworemef. E nat, ar Allah anakat ara.

¹⁰Car aramat ipic ajamkawifokom. Inimas caram ow tarowatnak aememfokom. Aramat ipic e malaikat pemerintah owam, e malaikat kepala owam, akepala ipic ara.

¹¹Car aramat ipic ajamkawifokom ara, car sunat tayir inim cimin ara. E sunat nat, asmat ow aemfesas opok. E sunat, bare Kristus aemefas ara. Bare, asmat dam, dosa epcom ara. E nat, aramat ipic ajamkawifokom, ar car e dosa fakas asurumtamfan.

¹²Ow car bwi abwimfan, ar car Kristus cowkon se awuapomfan inim cimin ara. Allaham e aramat ipic aojaworomsumutumef. Caram Allah afakas asicimfokom. Inimas e bwi abwimfan ow car aosumutumfan, ar, car Kristus cowkon aosumutumfan inim cimin ara.

¹³Bap ara, car dosa ow aememfokom. Caram sunat opok ow aememfokom. Inimas car damir ow inim cimin aememfokom. Allah nat, car Kristus cowkon aojaworomsumutumef inim cimin ara. Aram dadosa takas akokoromosomtamforow.

¹⁴Bare, dar Allah Jirmec bokorsakay awut aemfom. Allah, e aokorsakayfomas, surat aeapomef inim cimin ara. E surat, dar dosa ow ara, inim aporomef. Allah nat, e aokorsakayfomas surat atakam, akokoromosomef inim cimin ara. Aram e surat e salib os op apowapomef inim cimin ara. Inimas ar e surat aemosomkurumef inim cimin ara.

¹⁵Kristus e salib os op damir aafef, ar dat pemerintah ow afakasam, dat kepala ow afakasam, aemosomef. Ar e dat ow taw aatef inim cimin ara. Aram e ow, e wun ow takas bipu akumimosomef.

¹⁶Inimas ara, ow, e amos pok aanmokomasam, e bwi aanmokomasam, e agama pokbwi aemamokomasam, e ay pir pokbwi aemamokomosam, e Ses Ban Jo aemamokomasam, car dosa epen atakam basakamtiw arapok.

¹⁷Eras takas bap acowomtiwef. Pok anakat masirin, asep ara. E anakat, bare Kristus ara.

¹⁸Wun ow arma batawsicim opok cimin aemames. E nat, ar pir aemes. Ar masirin, malaikat asicimames. Aram e pok desen aporfesas, atakam awut atawmes. E ow nat, “Car salah aemamokom ara,” inim atakam arapok. E ow, bare asmat bi binipas cowok aceceremames. Inimas arma atawsicimames.

¹⁹E ow Kristus akoremfes. E Kristus nat, kus inim cimin ara. E amamkawi ow adam inim cimin ara. Kristus, fim e adam pomanas akekemtawma. Aramat ipicam e adam sur aotomemama. E sur botomemas, bare e Allah at aetiwefas jipu ara.

²⁰Car Kristus cowkon damir aaffokom inim cimin ara. Inimas car awames capinmi atjen bowas akoremfokom. Ca nat, car awames capinmi aras ara, inim cimin aememamokom, ucimaram? Bare awames capinmi jirmec:

²¹“A ban bosom arapok.” “A banapor arapok.” “A ban bakurum arapok.” Inim jirmec ara. Inim jirmec ji aemokom nat, ucimaram?

²²Ow e pok atewetcesnew, atewencesnew, bare e pok daniwis aemamescema. E jirmecam asmat ow ajirmec cowok ara. Aram asmat ow aratakam mamememtamas cowok ara.

²³Bare, e jirmec, malaikat basicim jirmec ara. Aram ow arma batawsicim arapok, jirmec ara. (E nat, eras pir bweas ara.) E jirmecam ow arma bajurusum jirmec ara. Inimas ow, “E jirmec, bi binip umutonas ara,” inim aecemes. E jirmec nat, ow e asmat jak basinomas jipu bwem, bwemkekemtaw asan opok.