Read Central Asmat KOLOSE 3 Bible Online

KOLOSE 3 - Central Asmat bible

KOLOSE 3

¹Bare, Allah car Kristus cowkon ajaworomsumutumef inim cimin ara. Inimas ara, caram e onam opas, jak mamseremomawarey. Erasan ara, Kristus e Allah ban bo jamam aemapma.

²E onam opas, bi binip awut mamceceremawarey. Awames capinmias, bi binip awut arapok.

³Bare, car damir aaffokom inim cimin ara. Caram Kristus ajamkawifokom. Inimas car Allah cowkon aememamokom. Asmat ow nat, inimas bwempor asan opok.

⁴Bare, Kristus jiwnenak car atetamaman. Aramat ipic ajisemcow, caram ar akac ajisemcomokom. Caram arakatnakutas ar akac aomomcomokom.

⁵Bare, awames capinmi jak asinomamokomas, bacatiw inim cimin mamemey. Er e cen cemen osom ara. E jursumecas bwemas ara. E jursumecas jak basinomas ara. E pwicakas jak basinomas ara. E pok awut batewet jak basinomas ara. Bare, e pok awut batewet jak basinom, ēco basicim awcawor ara.

⁶Allah, ow inimas bwem apormar ara. Ar masirin, e aratakam bopow ow, siksa aemcema.

⁷Bap ara, caram inimas jak asinomawirukum ara, car e ow akac aemapawirukum.

⁸Wow nat, car e jak amopas mamiwosomey. Caram e jokmen mememas ara, e kawey ow asan pwicak bomas ara, e cemew atakam ara, e jursumec atakam ara, bare e takas mamiwosomey.

⁹Caram suw atakam mamtaw arapok. Bare, car e catarey jak bakan emejiwitiwtotorfokom. E tarey aemfokomasam, bakan emejiwitiwtotorfokom.

¹⁰Caram e caray jak emetowoptotorfokom. Allah, e caray jak, e ajak jipu akenemapomef. Aram join aatamfafaymar, e caray jak, ay aworomtamama. Inimas car Allah camsomnakut ara.

¹¹Inimas ara, e ay jak atowopfes ow aman, ow takas awcawor ara. “Wun ow Yunani ow ara. Wun ow masirin, Yahudi ow ara,” bare ar inim atakam bootaw opok. “Wun ow sunat ow ara. Wun masirin, sunat opok ow ara. Wun ow jewey ow ara. Wun owam Skit ow ara. Wun ow mami kerja bwemtam ow ara. Wun ow arop kerja aemames ow ara.” Aram inim atakam bootaw opok. E nat, Kristus cowok penting ara. Aram e arow takas jak aman aemaptotorma.

¹²Allah car arow memem aereremtawfan. Car bare, ow tarowat ara. Allaham damos car ajiomaman. Inimas ara, caram ow saw akat mamoworporey. Caram ow asan akat mamomey. Caram carma batawsicim arapok. Caram demesnakap ow mamememey. Caram jak jirow mamememey.

¹³Bare, caramaman jak jirow mamamey. Car bi binip aceceremcokom, “E ow salah aemfan,” inim aecokom, bare car e ow e car aemfanas, binip mamjiwosomey. Bare, Tuhan e cadosa, binip emcajiwosomef. Inimas caram e salah car aemfan ow, e aemfanas, binip mamjiwosomey.

¹⁴Wunam, ow damos mamjiomey. Bare, damos aamjiomames ow, bi binip cawor aceceremames.

¹⁵Allah car dam cowok inim cimin memem ajatefan. Kristusam, ow damos mamjiom binip atetamama. Bare, car e damos mamjiom binip jipuas mamemkurumwey. Caram terima kasih atakam Allah mamotawey.

¹⁶E Kristus atakam, bare den akatipic ara. E atakam e cajak aman baemamestotorkurumcan. Caram caramaman, atakam mamjomamtamey. Caram caramaman atjen mamamey. Eras bi binip umuton epcoma. Caram e Allah basicim soam, e aratakam soam, e Roh atetamcemar soam, mameey. E so Allah aetamcokom, terima kasih bi binip mamceceremey.

¹⁷E aemcokomas takasam, e atakam aotawcokomas takasam, bare e Tuhan Yesus mamkawi owas jipu mamemey. Caram aramat ipic cowkon, e daricipic Allah bipu, mamememey. Wunam terima kasih atakam Allah mamotawey.

¹⁸Cepesa. Car e camiwis atakam ji mameey. Er e Tuhan mamkawi cepes bwemjias ara.

¹⁹Owerowa. Car e cacepes damos mamjiomey. Caram e cacepes jokmen atakam arapok.

²⁰Jiwia. Car e carisepes atakam ji mameey. Eras e Tuhan akat apormaras jipu ara.

²¹Ducur owa. Car e catiperes jak amop bapepem arapok. Ar jak pwicak bemapasin.

²²Kerja bwemtam owa. Car e carasmat kerja aramat ow aratakam ji mamekurumey. Ar manmok car atiwcannew, manmok car batiw opoknew, eras mameey. Eras bwem, e ow atakam akat ca botawas opok. E nat, car Tuhan asicimamokom ara. Inimas car, e cakerja aramat ow aratakam, jak akat epcom ji mameey.

²³E aemcokomas takas, akat mamemkurumey. Car eras asmat owin bwemtam cimin arapok. Car eras Tuhan bwemtam cimin mamemey.

²⁴Tuhan e arow at aetiwefas car atetamceman. Inimas camsom ara. Bare, car e Tuhan Kristus kerja aemtamamokom.

²⁵Allaham e fasi ow e fasi aemamesas jipu ajurusumtotorcema. Bare, Allah, ow takas awcawor aomcema.