Read Central Asmat KOLOSE 4 Bible Online

KOLOSE 4 - Central Asmat bible

KOLOSE 4

¹Kerja aramat owa. E cakerja aramat ipic onam op awap. Inimas camsom ara. Inimas caram akatas e cakerja bwemtam ow mamomey. Caram tot e ow bot arapok.

²Janim Allah mamanimawarey. Janim aanimcokom, janim faka. Terima kasih atakamam Allah mamotawawarey.

³Janim Allah daram mamanimtamcarowey. Allah dar e aratakam bacacapiom, asan akat dar batetamcarow. Ar dar e aramannakut atakam botawam, asan akat dar batetamcarow. Bare, dor e atakam acacapiomof ara. Inimas dor a penjara cem aman aemapmin.

⁴Allah, dor e atakam umuton botaw, akat aema. Caram dor inimas bwem, janim Allah mamanimawarey.

⁵Car e Kristus mamkawi opok ow aomcokomas, bi binip umutona. Caram desen bemap arapok.

⁶Atakam aotawcokom, atakam akata. Atakam, bi binip epcom, mamotawawarey. Caram, e jonow car atowceman ow, atep akat bajit, inim mammememawarey.

⁷Bare, Tikikus dajowow ipic ara. Dar damos aramat ipic ajiomamom. Aramat ipicam Tuhan kerja bwemtam ipic tarowat ara. Aram, doram, Tuhan kerja akac aemtamamom. Bare, aramat ipic doratakam car aotawceman.

⁸Doram aramat ipic inim atakam cowok car botawtam atiwinamtamamin. Ar e daratakam car botawtam, bare, car jak fak bemapomas ara.

⁹Doram Onesimus e Tikikus akac car atiwinamtamamin. Aramat ipicam dajowow ipic tarowat ara. Dar damos aramat ipic ajiomamom. Aram casamat ipic ara. E ipic jamnuk, e aemapmom asan ow aemamesas takas, atakam car aotawceman.

¹⁰Aristarkus a penjara cem dor akac aemapmom. Aramat ipic selamat atakam car aotawman. Markusam selamat atakam car aotawman. Ar Barnabas arowec ara. Dor, car aramat ipic aemcokomas, jirmec emcajirimfin. “E Markus car ajinawomcan, mamtewey.” Inim jirmec emcajirimfin.

¹¹E Yesus wun juwas Yustus ara. Aramat ipic selamat atakam car aotawman. Bare, e wun Yahudi ow Kristus ajamkawifes. E nat, e ow aman, e ipic mamincopnakap kerja dor akac aemamon. Wun ow opok. E kerja, e Allah Pemerintah kerja bwemtamas ara. Bare, e owam e dojak akat aemapomfenes.

¹²Epafras selamat atakam car aotawman. Aram casamat ipic ara. Aram Kristus Yesus kerja bwemtam ipic ara. Aramat ipic janim Allah car aanimtamawarman. Ar, car inim bakajiremam, car Kristus mamkawi faknakutam, car e Allah akat apormaras baporkurumam, inim janim Allah car aanimtamawarman.

¹³E Epafras, asan akat car bom, kerja awutnakut aemama. Ar e Laodikia owam, e Hierapolis owam, inimas cowok aemama. Dor eras atemen aatamamin.

¹⁴Lukas, bare dokter ara. Daram aramat ipic damos ajiomamom. Aramat ipicam, Demasam, selamat atakam car aotawman.

¹⁵Car selamat atakam e Laodikia dajowowam, e Nimfaam, e aramat cowoc acem Kristus basicim barewsiap owam, mamotawtamey.

¹⁶Car a surat baca aemkurumcokom, a surat, e Laodikia Kristus basicim barewsiap owam mamtewosomtamey. Aram a surat baca baemces. Wunam, or e Laodikia ow e car atewenamtamcam surat, baca mamemey.

¹⁷Caram Arkipus atakam mamotawey. “Or e Tuhan jirmec or jirimfan kerja, emkurumey.” Inim mameey.

¹⁸Bare, dor Paulus ara. Dor selamat atakam car aotawmin. Doram awames selamat atakamnakap, surat doram aeapomamin. Dor penjara cem aman aemapmin. Caram eras binip manim arapok. Bare, Allah asan akat car baomcan.