Read Central Asmat 1 TESALONIKA 4 Bible Online

1 TESALONIKA 4 - Central Asmat bible

1 TESALONIKA 4

¹Dajowow akatonokom. Wun atakam cowokam ara. Dar car Allah atakam ji bwe amememtamfenom. Bare, caram inimas cowok aemokom ara. Car Tuhan Yesus dar akac ajamkawimom. Dar masirin, janim car aanimamenom. Daram atjen car aowmenom: car Allah atakam ji bwe kayimin bakakayimey.

²E Tuhan Yesus jirmec ajirimefas, atakam car emeotawfenom. Car e atakam camsom.

³Allah car ow tarowat memem akat aemama. Inimas car jursumecas bwem arapok.

⁴E ca cepes epcom ow aporsipor, e Allah akat apormaras jipu, e cacepes mamemey.

⁵E Allah amsom opok ow, cepes jursumecas bwem, inim jak asinomames. Ca nat, inimas arapok.

⁶E car owerow, e cepes aemcokomas, cajowow salah bwem arapok. E owam tot bot arapok. Daram inim atakam fak car emcapwepwemotawfenom.

⁷Allah dar ow tarowat memem ajateforow. Ar dar jursumec ow memem bayte opok.

⁸Inim atakam aopowmes ow, asmat atakam bopow opok. Ar Allah atakam aopowmes. E Allah, e aRoh Kudus car atetamaman ipic ara.

⁹Bare, Allah, caramaman damos mamjiom, car amememtamfan. Inimas dar, car e car akac Yesus ajamkawimes ow damos bajiom, surat car bweapomtam arapok.

¹⁰Car e Makedonia capinmi Yesus ajamkawimes ow takas damos ajiomamokom. Dajowow akatonokom. Dar atjen car aowmenom: inimas bwem kayimin mamkakayimawarey.

¹¹Binaw ow jamememporkurumey. Kawey ow atakam mamkakayi arapok. Caram pok carma famtatey— e atakam aotawfenomas jipu ara.

¹²Inimas aemcokom, e Yesus mamkawi opok owam car asicimceman. Caram kawey ow pok jirey bwe opok aemcomokom.

¹³Dajowow akatonokom. Dar car e damir aaffes ow aemapmesas, jen bemap pwicak aemamom. Car e Yesus jirey bwe opok ow cimin jak pwicak bemapasin.

¹⁴Yesus damir aafef, wunam aojaworsitef. Dar inim atakam asicimamom. E Allaham, e Yesus basicim damir aaffes ow, e Yesus akac atowotometcema. Dar inim atakamam asicimamon.

¹⁵A atakam car aotawmenomas, bare e Tuhan atawef atakam ara. E atakam: E Tuhan aofasienawcow ara, e tetakay aememcom ow, aramat ipic bap akac batakamemem opok. Wunam, e damir aaffes ow aramat ipic asep akac memem opok.

¹⁶Bare, e jofay, Allah atakam afakaytawcema. E malaikat kepala ipicam atakam aotawcema. Ow Allah fwiam jen ajicemes. Wunam, Tuhan aramat ipic, onam op ewneycema. E Kristus mamkawi damir aaffes ow, bap aojaworsitcemes.

¹⁷Allah masirin, e dar tetakay aememcom ow, e damir aaffes ow cowkon, onam op jak aman asarimtowottometcemarow. Dar masirin, Tuhan, e onam op, biamnuk aemamtewcomom. Inimas ara, dar Tuhan akac aatamemapawarcomom.

¹⁸Bare, caramaman a atakam mamtawawarey. Inimas caramamanam jak fak mamemapomawarey.