Read Central Asmat 1 TESALONIKA 5 Bible Online

1 TESALONIKA 5 - Central Asmat bible

1 TESALONIKA 5

¹Dajowow akatonokom. Dar e Tuhan aofasienawcow jofayas, surat car bweapomtam arapok.

²Caram camsomnak ara. E Tuhan Jofay, osom ow iram aenawcemesas, inim cimin aenawcema.

³Ow atakam aotawces, “Bare, ow takas damos dar ajiomamarowos. Dar asan akat aemapmom,” inim aeces, bare asarimjurusemcemes. Er jak epcom cepes ju asarimjitimcemesas inim cimin ara. Owam e bajurusumas omar bwemjisos asan opok.

⁴Dajowow akatonokom. E Allah amsom opok ow, jiwicas aman aemapmes. Car ara nat, inimas opok. Inimas e Jofay aenawcow, car dam tami bajiem arapok— osom ow e manmok batiw opok ow bi atiwsucemas inim cimin arapok.

⁵Car takas e jok sereas aman bemap ow ara. Dar e iram jiwicas aman bemap ow opok.

⁶Inimas ara, dar e wun ow inim cimin bemap arapok. Dar isi bwes ow inim cimin bemap arapok. Dar manmok batiwawar ow bemapji. Daram jokmen bwi jayic opok ow bemapji.

⁷Isi bwes ow, iram isi apwitamescemes. Jokmen bwi jayic ow, iram jokmen bwi jayic aemapcemes.

⁸Dar e jok sereas aman bemap ow nat, jokmen bwi jayic opok aemapmoc. Daram Yesus basicimamoc. Aramat ipicam damos ajiomamoc. Er dar sey baju bajimom inim cimin ara. Daram aramat ipic dar bajortew, jirey cowok aemoc. Er dar owec topi bajimapom inim cimin ara.

⁹E Allah aemforowas, dar bajurusumas opok. E aemforowas nat, dar bajortewas ara. Er e Yesus Kristus daTuhan aemefas ara.

¹⁰Aramat ipic, dar ar akac mamemapawar, damir aaftamforow. E aofasienawcow jofay, dar tetakay aememcomnew, damir emcaaffomnew, bare awcawor ara.

¹¹Inimas ara, caramaman jak fak mamemapomawarey. Caramamanam Yesus mamkawi fak mamemapomawarey. E wow aemamokomas awcawora.

¹²Dajowow akatonokom. Dar janim fak car aanimamenom. E kerja fak car aemtamaman ow mamsicimey— er e Tuhan ajamkawimokom ow cakepala ow ara. E owam Tuhan mamkawi car amememtamaman.

¹³E ow, asan akat, car aomaman apormokom ara. Inimas e ow basicim anakat mamomey. Caram e ow damos mamjiomey. Caram caramaman damos mamamjiomawarey.

¹⁴Dajowow akatonokom. Dar atjen car aowmenom: E besem ow jiman mamafey. E omar ow, jak fak mamemapomey. E Yesus mamkawi fak opok ow, mamkawi fak mammememtamey. Caram jak jirow ow takas mamjiomey.

¹⁵Ow, pwicakas, amatam pomatam bwem arapok. E nat, akatas caramaman mamatamamporawarey. Caram, akatas, ow takas mamatamemporawarey.

¹⁶Jak akat mamememawarey.

¹⁷Janim Allah mamanimawarey.

¹⁸Asan akat aememcokomnew, asan pwicak aememcokomnew, terima kasih atakam Allah mamotawawarey. Bare, Allah, e car Kristus Yesus ajamkawimokom ow, eras takas bwemawar, akat aemama.

¹⁹Car e Roh Kudus, atakam bopow arapok.

²⁰Car e Allah atakam botaw ow e atawcemes atakam, bifan arapok.

²¹E takas mamtakamoworporawarey. Wunam e akatas ji mameawarey.

²²E pwicakas takas masirin, bak mampayomawarey.

²³Bare, Allah jak akat dar atetamamarow. Aramat ipicam car ow tarowatnak baemapomcan. Ar e cabi binipam, e cajakam, e cadamam, baomomkurumcan. Eras, e Yesus Kristus daTuhan e aofasienawcow jofay, car salah opok ow mememjias ara.

²⁴E car ajatefan ipic eras aemtamceman. Aramat ipic, bare tarowat ipic ara.

²⁵Dajowow akatonokom. Caram janim Allah dar mamanimtamcarowey.

²⁶Caram caramaman becer mamamomjipirey.

²⁷Dor car a surat e Tuhan ajamkawimes ow takas baca bwemtam jirmec ajirimamin.

²⁸E Yesus Kristus daTuhan, asan akat car baomcan.