Read Central Asmat 2 TESALONIKA 1 Bible Online

2 TESALONIKA 1 - Central Asmat bible

2 TESALONIKA 1

¹Dor Paulus ara. Doram, Silwanusam, Timotiusam, a surat e car kota Tesalonika Yesus basicim barewsiap ow aeapomtamamenom. Car daricipic Allaham, Tuhan Yesus Kristusam, aras ara.

²Bare, daricipic Allaham, Tuhan Yesus Kristusam, asan akat car baomcan. Aram jak akat, car batetamcan.

³Dajowow akatonokom. Car Yesus basicim fak kayimin akakayiawarmokom. Caram caramaman damos mamjiom, kayimin akakayiawarmokom. Inimas dar car terima kasih atakam Allah botawawarji.

⁴Inimasam ara, dar e aemamokomas, atakam e asanin asanin Yesus basicim barewsi ow, aotawcomom. E ow, bare Allah arow ara. E atakam, “Ow e Tesalonika Yesus mamkawi ow aemsokomames. E Tesalonika ow, bare ajurusemames. E nat, ar inim akajiremames. Aram Yesus basicim bakorompim opok aemames.” Inim aecomom.

⁵Bare, Allah, ow siksa aemcow, ar e atarowatas jipu siksa aemcema. E aemamokomasam eras aporomama. Aramat ipicam e caraja ipic ara. Inimas ow car ajurusumaman. E nat, e ajurusumamanas, car Allah e caraja ipic momom ow awcawor, inim aemapomceman.

⁶Allah, tarowatas jipu aemcema araman. Inimas ar e car ajurusumaman ow amatam ajurusumcema.

⁷Aramat ipicam, e afak malaikatam, e onam op ewneyces, aramat ipic e abi asmat ow aoporomcema. E jofay ara, aram asan akat e ajurusemamokom owam, daram, aomcemarow.

⁸Bare, aramat ipic jismak komen epcom aneycema. Ar e Allah aotpemames owam, e Yesus daTuhan Atakam Akat bowpow owam, ajurusumcema.

⁹E bajurusumas ara, e ow daniwis aatamemamesawarcemes. Ar Tuhan bipu bwememem asan opok aatamemawarcemes. Aram e Tuhan akatnakutas bwempor asan opok aatamemawarcemes.

¹⁰Aramat ipic aenawcow jofayut, e ow inimas aemcemes. E jofay ara, e ow tarowat, “Tuhan akatnakut ara,” inim aecemes. Bare, e aramat ipic asicimfes ow, junum, aramat ipic aecemes. Caram e atemen aatamfenom atakam asicimfokom. Inimas caram e ow akac aememcomokom.

¹¹Inimas ara, dar janim Allah car aanimtamawarmenom. Dar, Allah, car e aramat ipic ajatefanas inim awcawor ow memem, janim aramat ipic aanimawarmom. Bare, car akatas bwem jak aseremomamokom. Caram aramat ipic asicimamokom. Inimas car aramat ipic kerja aemtamamokom. Bare, aramat ipic fak ara. Inimas ar, car eras takas bwem, akac baemcan.

¹²Inimas ara, ow e aemamokomas aporcemes. Ar masirin, Yesus da Tuhan, akatnakut ara, inim atakam atawcemes. Owam e aramat ipic car aemtamamanas aporcemes. E ow masirin, caram akatnakut ara, inim atakam atawcemes. E darAllaham, e Tuhan Yesus Kristusam, asan akat car aomaman. Inimas ar eras aemtamaman.