Read Central Asmat 2 TESALONIKA 2 Bible Online

2 TESALONIKA 2 - Central Asmat bible

2 TESALONIKA 2

¹Dajowow akatonokom. E Yesus Kristus daTuhan aofasienawcema. Aramat ipic dar adampu aaramsimapomcemarow. Wun ow atakam nat, “E Tuhan bofasienaw jofay, bare emcaenawef.” Inim aemes. E car wun ow bi binip, “Allah atakam botaw ipic inim atakam aotawef.” Wun masirin, “Ow inim atakam acacapiomfes.” Wun masirin, “Paulus inim atakam surat aeapomef.” Inim bi binip aceceremamokom openow. Da nat, janim fak car aanimamenom. Bi binip fasi sarim bacecerem arapok. Jakam pwicak sarim memem arapok.

³Owam tot ca bot opok cowoka. E Tuhan aofasienawcow jofay, asep aenawcema. E nat, ow arkenakut Allah atakamotpemcemes. E Jirmec Bopow Ipicam atakamjisemcema. Asep ara nat, Allah, e ipic daniwis aemtiwkurumcema.

⁴Bap ara nat, e Jirmec Bopow Ipic, ow e asicimamesas takas, bifan afayomcema. E ipic abi binip ara, “Dorop akat ara. E wunas takas pwicak ara.” Inim bi binip aceceremcema. Aram e Allah Cem afiwapcema, wunam, “Dor Allah ara,” inim aecema.

⁵Bare, dor car cowkon aemapawirum, dor a atakam car aotawawirin. Car inimas binip bacomom opoknew?

⁶Bare, e Jirmec Bopow Ipic bajisem aememama. E nat, jipic cowok eras akekemtawma. Caram inimas camsom. E nat, Allah akat aporcow, ar e Jirmec Bopow Ipic bajisem, inim atetamcema.

⁷Wowam ow arke Allah Jirmec curuw aopowmes. E bakekemtaw ipic, ow e Jirmec bopow akekemtawma— Allah, e bakekemtaw ipic aotewcow jofay ajiwara.

⁸E jofay ara, e Jirmec Bopow Ipicut ajisemcema. Tuhan Yesus masirin, e aserenakutas epcom aofasienawcema. Aram bwe fonin atowomcema. E fon afucowas, e Jirmec Bopow Ipic acatiwcema. E serenakutas e ipic daniwis aemtiwcema.

⁹E Jirmec Bopow Ipic aenawcow, Iblis, e afakas, e ipic atetamcema. E ipic masirin, suw junum bweas jukpiri aemcema.

¹⁰Aram jursumec totas, e daniwis aemamesces ow, aotcema. Bare, e ow e atakamnak ji bwe opok aemcemes. Aram e atakamnak damos bajiom opok aemcemes. Inimas Allah e ow bajortew opok ara.

¹¹Bare, Allah e ow aemcesas aporcema. Inimas ar e tot botas awut e ow atetamcema. E ow masirin, e suw atakam, atakamnak inim, aporcemes.

¹²Inimas ara, Allah, e atakamnak basicim opok ow takas, dosa ow ara, inim atakam asakamtiwcema.

¹³Dajowow akatonokom. Tuhan damos car ajiomaman. Ametnak ara, Allah car bajorem aereremtawfan. Inimas dar car terima kasih atakam Allah botawawarji. E Roh Kudus, ow tarowat aemapomama. Bare, e owam ajoremcemes— er e atakamnak asicimames ow ara.

¹⁴Bare, Allah car inimas bwem ajatefan. Dar e Atakam Akat car acacapiomfenom ara, Allah car e Yesus Kristus daTuhan, e arakatnakutas akac momomawar, car ajatefan.

¹⁵Dajowow akatonokom. Inimas ara, e asicimamokom atakam mamsicimawarey. Daram e atakam amememfom. Wunam dar e atakam car acacapiomfom. Daram e atakam, surat car aeapomtamfenom. Bare, e atakam bakorompim arapok.

¹⁶Daricipic Allah, damos ajiomforow. Aram asan akat aomforow. Inimas ar dar jak fak batamemawar, inim atetamforow. Aram e akatas bwenaw manmok bafe, inim bi binip atetamforow. Bare, aramat ipicam, e Yesus Kristus daTuhanam, jak faknak car baemapomcan. Aram car akatas bwemawaram, car atakam akat botawawaram, inim bi binip car batetamcan.