Read Central Asmat 2 TESALONIKA 3 Bible Online

2 TESALONIKA 3 - Central Asmat bible

2 TESALONIKA 3

¹Dajowow akatonokom. Wun atakamam cowok awames. Caram janim Allah dar mamanimtamcarowey. E asanin asanin ow, e Tuhan atakam jen sarim bajices. Owam e atakam jen akat bajices— e atakam jen ajifokomas inim cimina. Eras janim Allah mamanimey.

²Allaham mantem dar batiwemcarow. E jokmen owam, e jursumec owam, dar bajurusumasin. Dar e wun ow, e Atakam Akat basicim opok apormom ara. Car inimas janim Allah mamanimtamcarowey.

³E nat, Tuhan tarowat ara. Aramat ipic jak fak car atetamceman. Aram mantem car atiwemceman. E Jokmen Ipic car bajurusumasin.

⁴Tuhan dar car basicim, inim bi binip atetamamarow. Dar masirin, inim bi binip aceceremamom: “E Tesalonika Yesus mamkawi ow daratakam ji aemes. Aram e atakam ji aeawarcemes.” Inim bi binip aceceremamom.

⁵Doram janim Tuhan aanimcimin. Aramat ipic car damos Allah bajiomkurum, inim bi binip car batetamcan. Aram car jirey Kristus bwekurum, inim bi binipam car batetamcan. Dor inimas janim Tuhan aanimcimin.

⁶Dajowow akatonokom. E wun Yesus mamkawi ow, besem aemapmes. Inimas e ow, e amememtamfenom atakam aopowmes. Bare, e Tuhan Yesus Kristus jirmec ajirimforow. Inimas daram jirmec car ajirimamenom: Car e ow mamkawi arapok.

⁷Dar car cowkon aemapawirum, dar besem opok aemapawirum. Car e aemapawirumas inim cimin bwemji. Caram inimas camsom ara.

⁸Dar car cowkon aemapawirum, dar e atetamfenokom amos pok mami memen opok. Dar e amos ajitinfom. Dar jokam, iramam, kerja awutnakut aemawirum. Dar car bajurusumasin.

⁹E amos mami batewen, bare daras araman. E nat, e aemawirumas, car bataketamas ara.

¹⁰Dar car cowkon aemapawirum, daram jirmec ajirima aefenom: “Ow, kerja pwicak aeces, e ow amos memen arapok.” Inim aea aefenom.

¹¹Atakam jen ajifom, car wun ow besem aemapmokomen. E owam kerja opok aememesen. Aram kawey atakam ben atowomamesen.

¹²Bare, Tuhan Yesus Kristus jirmec ajirimforow. Inimas daram jirmec e ow ajirimamom. Daram atjen fak e ow aowmom. Bare, e ow akatas baemces. Aram arop amos pok baemences.

¹³Dajowow akatonokom. Car ara nat, e akatas bwemawar bakorompim arapok.

¹⁴Wun ow, awames surat atakam ji bwe pwicak aeces, car e ow manmok fak mamtiwopey. Car masirin, e ow mamkawi arapok. Inimas e ow namke akayapcemes.

¹⁵E nat, car e ow, jewew ow inim cimin bwem arapok. Aram, caram, e Yesus ajamkawimokom ow ara. Inimas car e ow atjen mamowey.

¹⁶Bare, Tuhan jak akat batetam ipic ara. Asan akat emapcokomnew, asan pwicak emapcokomnew, aramat ipic jak akat car batetamawarcan. Aramat ipic car akac baemapcan.

¹⁷Bare. Dor awames atakamnakap, surat dorma aeapomamin. Dor a dojuwas, a dosurat takas, inim ji asuk wow aeapomcimin.

¹⁸Yesus Kristus daTuhan, asan akat, car takas baomkurumcan.