Read Central Asmat 1 TIMOTIUS 1 Bible Online

1 TIMOTIUS 1 - Central Asmat bible

1 TIMOTIUS 1

¹Timotius. Dor or Kristus basicim amememtamfin. Inimas or dotiw ara. Dor awames surat or aetamamin. E Kristus Yesus dor aratakam botaw atewosomfan. Daram aramat ipic jirey aemom. Allaham dabajortew ipic ara. Bare, e Allaham, e Kristus Yesusam, atakam botawtam, jirmec dor ajirimfenes. Allah daricipic ara. Kristus Yesusam daTuhan ara. Aramat ow, asan akat or baomcenes. Aram serow or bajiomcenes. Jak akatam or batetamcenes.

³Bare, or Efesus mamemapey. Makedonia ajisosof ara, dor inim atakam cowok or aotawfin. E Efesus ara, wun ow suw atakam amememtamames. Inimas or e ow jirmec mamjirimey. “E suw atakam momemem arapok.

⁴E suw tarey atakamam mamkawi arapok. E ametnak jitemfes ow juwas arkenakut bajucucumir atakamam mamkawi arapok.” Inim jirmec mamjirimey. Ow e atakam ajamkawices, aram bi binip arke aceceremcemes. Owam e atakam ajamkawices, ar Allah kerja bwemtam opok aemcemes. E Allah asicimames ow nat, aramat ipic kerja aemtamcemes.

⁵Dor ow damos mamjiom akat ara. Inimas dor e jirmec ajirimamin. Ow jursumec opok jak atowopcesam, bi binip akat acomopcesam, basicim fak aemcesam, bare aram damos aamjiomcemes.

⁶Wun ow nat, inimas akoromtiwfes. Aram desen atakam ajamkawifes. Ar masirin, e atakamnak bokotpu, jen aememfes.

⁷E ow, Allah Jirmec mamememtam, jak aserememames. E nat, aram arop atakam amsom opok. Aram e atakam fak atawmesas amsom opok.

⁸E Allah Jirmec, bare akat ara. Dar e Jirmec ji aecom, daram e Jirmec akat aporcomom.

⁹Allah e aJirmec e jirmec bopow ow atatitamef. Aram e aJirmec e atakam bopow owam, e Allah basicim opok owam, e dosa owam, e fasi owam, e awames capinmias mamkawiawar owam, e arisepes bacatiw owam, e kawey ow bacatiw owam, inim ow atatitamef.

¹⁰Aram e aJirmec, e cen cemen osom owam, e faper owam, e ow taw aatcemes owam, e suw atakam botaw owam, e suw atemen batam owam, e atakam anakat bopow owam, inim ow atatitamef.

¹¹E atakam anakat e Atakam Akat jipu ara. Allah e Atakam Akat atatitamforow. Aramat ipic, bare akatnakut ara. Aram asan akat ara. Ar e Atakam Akat kawey ow botawtam jirmec dor ajirimfan.

¹²Bare, Kristus Yesus daTuhan ara. Aramat ipic dor ow tarowat aporfan. Inimas ar dor kerja a bwemtam aeremtewfan. Aram e kerja bwemtam fakas atetamfan.

¹³E nat, ametnak ara, dor aramat ipic cemew atakam aotawof. Doram aramat ipic ajurusumof. Doram aramat ipic pwicak atakam aotawof. Dor ara nat, e aramat ipic basicim opok aemof. Inimas e aemofasam nomsom opok aemof. Inimas ara, Allah serow ajiomfan.

¹⁴E daTuhanam asan akatnakut aomfan. Aram a basicim bi binipam, damos a bajiom bi binipam, atetamfan. Bare, Kristus Yesus cowkon aememamom ow, inim bi binip atowomcomom.

¹⁵Ow inim atakamnak atawcemes: “E Kristus Yesus, dosa ow bajortew, a capinmi aneyef.” Inim aecemes. A atakam, bare atakamnak. Aram basicimkurumas ara. Bare, doram dosa ipic anakatnakut awamcey ara.

¹⁶Allah dor dosa ipic anakatnakut aporef. Inimas ar serow ajiomfan. Inimasam Kristus Yesus jak jirownakut aomfan. Eras, e asep jofay, aramat ipic asicimces ow baporomtamas ara. E owam jiwnenak aatamemawarcemes.

¹⁷Allah e jiwne batamemawarmar raja ipic ara. Ar jiwne bakari opok ipic ara. Owam e aramat ipic bi bwempor asan opok. Ar cowok, Allah ara. Inimas ow, e aramat ipic baatamsicimawarces. Aram, “E Allah akatnakut ara,” inim baatameawarces. Bare, a atakam, atakamnak ara.

¹⁸Timotius. Dotiw akatenem. Ametnak ara, e Allah atakam botaw ow, e aemcemas, atakam aotawfes. Dor masirin, a jirmec or ajirimamin: or e Allah ajewew mamkumimosomey.

¹⁹Oram Kristus basicim bakoromtiw arapok. E ojak aman atakam akat jipu mameawarey. Wun ow nat, e ajak aman atakam akat jipu bwem akoromtiwfes. Inimas aram Kristus basicim opokut arew.

²⁰Himeneusam, Aleksanderam, inimas cowok aemfes. Dor masirin, e ipic jamnuk, Iblis aotasimemtamof. E aemofas, e ipic jamnuk, cemew atakam Allah botawasinas ara.