Read Central Asmat 1 TIMOTIUS 2 Bible Online

1 TIMOTIUS 2 - Central Asmat bible

1 TIMOTIUS 2

¹A bap atakam ara, dor inim atjen aowmin: Ow, e wun ow takas, janim Allah baanimtamces. Aram Allah, asan akat, e ow takas bom, janim baanimces. Allaham asan akat, ow takas aomamam. Inimas ow terima kasih atakam Allah baotawces.

²Ow e raja owam, e kepala owam, janim Allah baanimtamces. Eras bwem, dar asan akat bemapas ara. Eram dar bajurus opokas ara. Inimas dar ow tarowatam, ow akatam, aememcomom.

³Inimas bwem, bare akat ara. Allaham inimas akat aporcema. Aramat ipic, bare dabajortew ipic ara.

⁴Ar ow takas bajortew jak aseremomama. Aram ow takas e atakamnak baporkurum jak aseremomama.

⁵Allah cowokut ara. E Allaham, e asmat owam, e wowoc, bare atakam bajomattam ipic cowokut awamec. E ipicam asmat ipic ara. Ar Kristus Yesus ara.

⁶Aramat ipic ow takas bajortew damir aafef. Allaham ow takas bajorem jak aseremomama. E Kristus Yesus aemefas eras aporomtamef. Allaham asan akat aporef, ar inimas aporomtamef.

⁷Allaham dor inim atakam bacacapiom atewemfan. Ar dor e ow Kristus basicimam, e atakamnak mamkawiam, inim atakam mamememtam atewemfan. Ar dor e atakam e Yahudi opok ow botaw atewosomfan. Bare, e atakam atawminas atakamnak ara. Aram suw opok.

⁸Dor e asanin asanin owerow, janim Allah manim, akat ara. Janim Allah aanimces, aram dosa opok jak baememces. Aram jak amop opok ow baememces. Aram bwe atakam mamtaw opok ow baememces.

⁹Cepesam cosow awut arapok. Aram damke opok pakaian bajimomtotorces. Aram e akus fin sisir bacecerem awutnakut arapok. Aram emas poknew, akat ek juwas mutiaranew, e afin batewtopom arapok. E apakaianam harga awutas arapok.

¹⁰E cepes nat, asan akat cepes baememces. Inimas bwem, bare acosowas anakat inim cimin ara. Aram, “Dor Allah mamkawi cowok ara,” inim aetotormes. Inimas aram e akatas jipu cowok baemtotorces.

¹¹Capesam Allah atakam amememces, aram jokon bajiapces. Aram atakam ji baeces.

¹²Allah e Adam bap akenemapomefen. Ar masirin, e Hawa asep akenemapomefen. E Iblisam tot e Adam bot opok. Ar tot e cowoc aotefen. E cowoc masirin, Allah atakam bopow cowoc aememefen. Inimas ara, dor cepes owerow atakam mamememtam acuw aatmin. Doram cepes owerow jirmec bajirim acuw aatmin. Cepes nat, jokon bajiapces.

¹⁵E nat, cepes Kristus basicimawarces. Aram ow damos bajiomawarces. Aram cepes tarowat baememawarces. Aram arma basicim arapok. Inimas aeces, wunam jiwi apeapces, aram asan akat aemapcemes.