Read Central Asmat 1 TIMOTIUS 3 Bible Online

1 TIMOTIUS 3 - Central Asmat bible

1 TIMOTIUS 3

¹Ow atakam atawcemes, “Ow gereja bap ewamces ow memem akat aporces, aram akatas bwem jak aseremomcemes.” Inim aecemes. A atakam, bare atakamnak ara.

²Gereja bap ewamec ipic nat, kawey ow e ipic basicim ipica. Aram cowoc cowok ipica. Aram jak fak ipica. Aram bi binip epcom ipica. Aram ow akata. Aram jaki ow e acem batowomiw akat apormar ipica. Aram atakam mamemtam amsom ipica.

³Aram jokmen bwi jayic ipic arapok. Aram jokmen ipic arapok. E nat, ar demesnakap ipica. Aram owen ipic arapok. Aram uang jak basinom ipic arapok.

⁴Ar e aremam, atiperesam, jirmec akat bajirim ipica. Aram e atiperes aratakam ji bwe amememtamamar ipica. Atiperesam e aricipic asicimames ipica.

⁵E aremam, atiperesam, jirmec akat bajirim amsom opok ipic, e Allah basicim ajarewsimes ow, jirmec bwemjirim asan opok.

⁶Aram Kristus jepen ajamkawief ipic arapok. Ar arma basicimasin. E Allaham, e Iblis aemefas jipu, e gereja bap ewamec ipic, bwemasin. (Ametnak ara, Iblis arma asicimefen. Allah masirin, “E Iblis aemefas, dosa ara,” inim atakam asakamtiwefen.)

⁷E Kristus mamkawi opok owam, e gereja bap ewamec ipic basicim ipica. E ipic e Iblis akenemapomef siso aman bafiwasin.

⁸E gereja pembantu owam, ow tarowata. Aram ewen picin atakam botaw ow arapok. Aram anggur bwi awut ban ow arapok. Aram uang basinom opok owa.

⁹Bare, e Allah amannakut atakam, atakamnak ara. E gereja pembantu memem ow, e atakamnak basicimawar owa. Aram eras e ajak aman atakam jipu baemces.

¹⁰Ow, e ow batakamoworporces. Ar, e ow, tarowat aporces, gereja pembantu ow batawemces.

¹¹E acepesam tarowat cepesa. Aram kawey ow salah suw atakam bataw opok cepesa. Aram jak fak cepesa. Aram suw atakam opok cepesa.

¹²Gereja pembantu ipic, cowoc cowok ipica. Ar e atiperesam, aremam, jirmec akat bajirim ipica.

¹³E gereja pembantu ow, kerja akat aecesnew, owam e ow asicimcemes. Inim gereja pembantu owam, e Kristus Yesus basicim atakam, atakam fak aotawcemes.

¹⁴Bare, dor or basarimenawpor jak aseremomamin. E nat, doram a surat or aetamamin.

¹⁵Inimas dor kamornakut aenawcey, oram e Allah atiperes bwemjias bap a takam aporcemem. E Allah atiperes, bare e jiwne Allah basicim ajarewsiapmes ow ara. E ow, e atakamnak manmok batiw ow ara.

¹⁶Atakamnak ara, e asicimamomas bare amannakut ara. Aram inim ara: “Aramat ipic asmat ipic ajaworemef. E Allah Roham, aramat ipic, jipic tarowat aporomtamef. Malaikatam e aramat ipic bi aporfes. Owam, e aramat ipic atakam, capinmi arke acacapiomfes. Asan arke owam e aramat ipic asicimfes. Allaham aramat ipic e onam op áotowotometef.” Dar inim atakam asicimamom.