Read Central Asmat 1 TIMOTIUS 4 Bible Online

1 TIMOTIUS 4 - Central Asmat bible

1 TIMOTIUS 4

¹Bare, e Allah Roh atakam umuton aotawmar ara: “E asepnak jofay, wun ow, e Kristus basicim akoromtiwcemes. Aram suw atakam atawcemes dat, ajamkawicemes. Aram e dat atakam amememtamamesas, ji aecemes.” Inim aema.

²Bare, pir bwe ow e dat atakam ajomatcemes. E owam suw atakam ow ara. E ow ajak aman atakamam, bare opok arew. E ajak aman, bare sumu inim cimin ara. Ar jis awut afayef dam das, inim sumu ara.

³E owam atakam, “Cepes batewet, bare dosa ara. E wun pok memenam dosa ara.” Inim aecemes. Allah nat, e pok e Kristus asicimames owam, e atakamnak amsom owam, amemenas akenemapomef.

⁴E Allah akenemapomefas takas, bare akat ara. Ow, e Allah atakam jipu janim Allah aanimces, Allah e pok, pok akat aemapomcema. Inimas, ow terima kasih atakam Allah aotawces, e pok biwosomas opok ara.

⁶Or a atakam e Kristus Yesus ajamkawimes ow aotawcem, or aramat ipic kerja bwemtam ipic akat aememcemem. Bare, or e asicimamom atakamam, e atakamnakam, ji aeawarmem. Inimas or jak fak memem, amememawarmem. Bare, or e atakam ajamkawiawirim.

⁷Oram e jursumec tarey atakam biwitiwey. E atakam jenas ara. O nat, jipic tarowat memem, mamememawarey.

⁸Ow e cey bweas, bare akat kanimnakap ara. Ow tarowat memem nat, akatnakut ara. Dar ow tarowat aememcom, dar awames capinmi asan akat aememcomom. Daram asep jofay e onam op asan akat aememcomom.

⁹Ow inim atakamnak atawcemes: “Dar e jiwne Allah cowok jirey aemom. Inimas dar jec awumom. Daram kerja awut aemom. E Allaham ow takas abajortew ipic ara. E nat, ar e Kristus asicimames ow abajortew ipic anakat ara.” Inim aecemes. A atakam, bare atakamnak ara. Owam a atakam basicimkurumces.

¹¹A atakam mammememtamey. Owam a atakam ji bwe, jirmec mamjirimey.

¹²Bare, or ay ipic ara. E nat, ow inimas bifan or bafayem arapok. Or masirin, atakam akat mamotawawarey. Oram jipic tarowatnakut mamememey. Owam damos mamjiomkurumey. Oram Kristus basicim faka. Oram jursumec arapok. E Kristus asicimames ow, e aemamemas jipu cowok bacowoyces.

¹³Or Alkitab atakam, ow, baca mamemtamawarey. Oram e atakam mamcacapiomawarey. E atakamam mammememtamawarey— e aapenawcey jofay ajiwara.

¹⁴Ametnak ara, e ketua ow, e aban, e odam ton atatiwfes. Allah atakam botaw owam, e aemcemas, atakam aotawfes. Allaham kerja a bwemtam cescuwas or atetamfan. Bare, or e cescuwas biwitiw arapok.

¹⁵Or eras takas fak mamemey. Eram mamemkurumey. Inimas aemcem, or asan akat memem kayimin akakayimcemem. Owam inimas aporcemes.

¹⁶E aemcemas pimicima. E atakam amememtamcemasam pimicima. Inimas mamemeawarey. Inimas aemcem, oram ajoremcemem. Oram e oratakam jen ajices ow ajortewcemem.