Read Central Asmat 1 TIMOTIUS 5 Bible Online

1 TIMOTIUS 5 - Central Asmat bible

1 TIMOTIUS 5

¹Or ownucur ow jiman faknakut baf arapok. O nat, e ow orisepes cimin inim atjen mamowey. E ay owam, e orepcewesnew, orewcewesnew, inim cimin mamomey.

²E ducur cepesam, e orisepes inim cimin mamomey. E ay cepesam e otarsepes inim cimin mamomey. Oram e cepes jursumec binip opok cowoka.

³Or fwisma cepes pok bafafaytam ow opok aporcem, e cepes asan akat mamomey.

⁴Wun fwisma cepes nat, atiperesnew, aturpisnew, awamces. Bare, e fwisma cepes pok e ow afafaytama ajimpes. Inimas e owam pok e arisepesnew, e arafasnew, bafafaytamces. Aram amatam pomatam baemces. Inimas bwem, bare ow tarowat mememas jipu ara. Allaham e ow inimas bwem, akat aporcema.

⁵Wun fwisma cepes nat, ow opok aemapmes. Ar pok a bafafaytam ow opok cowok. Inim fwisma cepes jirey Allah cowok aemes. Ar jokam, iramam, janim Allah aanimawarmes. Aram, Allah asan akat a bom, janim aanimawarmes.

⁶Wun fwisma cepes nat, awames capinmias mamkawi awut aemes. E cepes tetakay awamces. E nat, ar damir amcaaffes inim cimin ara.

⁷Oram ow eras bwem jirmec mamjirimey. Kawey ow, “car pwicakas aemamokom,” inim atakam batawasin.

⁸Ow, pok, e acem ow bafafaytam opok aemfesnew, inimas pwicak ara. Aram pok e arisepes bafafaytam opok aemfesnew, inimas pwicak anakat ara. Inimas aemfes ow, Kristus basicim akoromtiwfes. E ow, bare pwicak inim. Kristus basicim amsom opok ow nat, akat inim.

⁹Oram e umur tahun enam puluh ajiwar opok cepes, juwas, e fwisma cepes daftar bweapom arapok. E nat, inimas aefes fwisma cepes juwas e daftar mameapomey: Ar jipic cowokut ajuwutfes.

¹⁰Aram akatas bwemawar an afufuosfes. Aram jiwi ajumfes. Aram jaki ow e acem batowomiw akat aefes. Aram e ow tarowat abwey bwi acicikima aefes. Aram pok e asan pwicak aemapfes ow afafaytama aefes. Aram e akatas jukpiri aatamema aefes. Inim fwisma cepes juwas e daftar mameapomey.

¹¹E ay fwisma cepes nat, juwas e daftar bweapom arapok. Ar ower bojuwut jak asinomces, aram Kristus mamkawi fak opok aemcemes.

¹²Bap ara, ar Kristus kerja bwemtam, atayi aefes. E nat, ar e atayi aefesas ajiosomcemes. Inimas aramat ipic, “E cepes aemamesas, bare dosa ara,” inim atakam asakamtiwcema.

¹³Aram e kawey cem imwi aatamejarcemes. Inimas ar besem cepes aememcemes. E nat, ar besem cepes memem cowok opok. Aram kawey ow pwicak atakam atawjomatcemes. Aram kaweyas benin atomcemes. Ar wun pwicak atakamam atawcemes.

¹⁴Inimas ara, dor atjen e ay fwisma cepes aowmin. Ar ower baojuwutces. Aram jiwi bapetatces. Aram e acem aman pok bakenemapomces. Inimas aemces, e bifan afayomamarowos ow, pwicak atakam dar bwemotaw asan opok.

¹⁵E wun ay fwisma cepes nat, Kristus mamkawi emcakoromtiwfes, wunam Iblis ajamkawifes.

¹⁶Bare, e Kristus asicimames cepes, e ajowow fwisma cepes aporces, aram pok e cepes bafafaytamces. E Kristus basicim ajarewsiapmes ow, pok fwisma cepes arkenakut bafafaytam, dam jipi bamercowoyemasin. Wun fwisma cepes, pok a bafafaytam ow opok. E Kristus asicimames cepes, pok e ajowow fwisma cepes afafaytamces, e Kristus basicim ajarewsiapmes ow, pok e ow opok fwisma cepes afafaytamcemes.

¹⁷E wun ketua ow, e Kristus basicim ajarewsiapmes ow, jirmec akat ajirimames. E Kristus basicim ajarewsiapmes ow, pok awut, inim aemames ketua ow batatamces. Wun ketua owam, Allah atakam acacapiomames. Aram e atakamam amememtamames. E Kristus basicim ajarewsiapmes ow, pok awutnak, inim aemames ketua ow batatamces.

¹⁸Bare, e Alkitab atakam ara, “E gandum eke aceceremnemames sapi, bweyof manam bajikapom arapok.” Wunam, “Ow, e kerja bwemtam ow, pok batatamces.” E Alkitab inim aema.

¹⁹Ow cowok atemen aatamcow, “E ketua ipic inim salah aeef,” inim aecow, or aratakam jen baji arapok. E nat, ow jamnuknew, mamincopnew, e ketua ipic salah atemen aatamces, bare aratemen jen pajiey.

²⁰Oram, e dosa bwem ow, e Kristus basicim ajarewsiapmes ow bipu, jiman mamafey. Inimas e ow omar aecemes.

²¹Dor, e Allah bipuam, e Kristus Yesus bipuam, e malaikat tarowat bipuam, jirmec fak or ajirimamin. Or a atakam takas ji mameey. A atakam ji aecem, oram wun ow bamesom, wunam wun ow bamesom opok, bare inim arapok. Oram ow takas mammesomey.

²²Ketua ow atawemcokom, car e caban e ow dam ton atatiwcomokom. O nat, inimas bwem, sarim arapok. Or, dosa bwem ipic e adosa akac bwemasin. Oram jipic tarowat ememawarey.

²³Or desen bwi cowok ancem. Anggur bwinakasam paney. Er e ojak asesakasam, e ajowmem dam arkeasam, baworomas ara.

²⁴Wun ow adosa, bare umuton cowok ara. Asep jofayam, Kristus, “Eras dosa ara,” inim atakam asakamtiwcema. Wun ow adosa nat, umuton opok. Asep ara nat, e dosaam umuton aemamescema.

²⁵Inimasam ara, e wun akatas, bare umuton cowok ara. Ow nat, e umutonnak opokasam bwemcukumtiw asan opok.