Read Central Asmat 1 TIMOTIUS 6 Bible Online

1 TIMOTIUS 6 - Central Asmat bible

1 TIMOTIUS 6

¹E wun Kristus mamkawi ow, bare mami kerja bwemtam ow aememfes. E ow nat, e kerja aramat ipic atakam akat baotawces. Kawey ow cemew atakam Allah botawasin. E Kawey owam e amememtamamom atakam, pwicak atakam botawasin.

²Wun mami kerja bwemtam ow akerja aramat ow, bare Kristus acicimames ow ara. Aram, e akerja bwemtam owam, Kristus akac ajamkawimes. Inimas, e mami kerja bwemtam ow, bifan e ow bafayom arapok. E kerja aemtamamesas, asan akat, e kerja aramat ow batatamas ara. E kerja aramat ow, Kristus asicimames ow ara. E mami kerja bwemtam owam, damos, e kerja aramat ow ajiomames. Inimas aram kerja akatnakut e ow baemtamces. Bare, or inim atakam e ow mammememtamey. A atakamam atjen e ow mamowey.

³Wun ow nat, arop atakam amememtamames. Aratakamam, e Yesus Kristus daTuhan atakamnakam, bare awcawor opok. Aratakamam, ow tarowat mememas atakamam, bare awcawor opok.

⁴E ow arma atawsicimames. E nat, aram amsom opok cowok. Aram desenas jonow batowpor jak asinomames. Aram pok juwas bwe atakam mamtaw jak asinomames. Inimas ara, ow bi afayemcemes. Owenam aamocemes. Cemew atakamam atawcemes. Pwicakasam atewbeperemtitamcemes.

⁵Bwe atakamam aamtawawarmes. E abi binipam pwicak ara. Aram e atakamnak akoromtiwfes. E bi binip ara, “Dar ow tarowat aememcom, pok awut atatcomom,” inim bi binip aceceremames.

⁶Ow tarowat aememces, aram anakatas awutut atatcemas araman— ar pok basinom opok aeces ara.

⁷Dar ajisamestotorfom ara, dar pok opok ajisamestotorfom. Wunam damir aafcom ara, daram pok bwemtowomos asan opok.

⁸Inimas dar amosam, pakaianam, e cowok aomomcom, dar jak akat aememcomom.

⁹Wun ow pok awut batewet jak asinomames. Iblis nat, e ow dosa bwem bacajijimtaw awutut aemcema. E owam Iblis siso aman afiwcemes inim cimin ara. E jak asinomamesas, bare jenas ara. Aram bajurusumas ara. E jak basinomas, e ow neraka aman ajimomiwcema.

¹⁰Uang basinom ow, jursumecas arke aemcemes. Wun ow uang basinom awutut aemfes. Inimas ar Kristus basicim akoromtiwfes. Ar masirin, ajurusemfes. Aram jak apok aememfes.

¹¹Or ara nat, Allah mamkawi ipic ara. Or eras takas omar mamjisosey. Oram jipic tarowat mamememkurumporey. Allah atakamam ji mamekurumporey. Kristus mamsicimkurumporey. Ow damos mamjiomkurumporey. Jak jirow mamememkurumporey. Damesnakapam mamememkurumporey.

¹²Or Kristus Yesus asicimamem. Inimas, kerja e aramat ipic bwemtam, jec awut mamwuawarey. Or e Kristus asicimamemas, atemen akat, ow arke bipu aatamfem. Inimas aemfem ara, Allaham or e jiwnenak batameawaras batowom, inim jirmec or ajirimfan. Bare, or e jiwnenak batameawaras, inim mamomomey.

¹³Allah, pok takas tetakay aemapomama. Kristus Yesusam atemen akatipic e Pontius Pilatus bipu aatamef. Bare, dor Allah bipuam, Kristus Yesus bipuam, jirmec or ajirimamin:

¹⁴“E Allah jirmec or ajirimfanas ji mamekurumey. E jirmec bopow arapok— e Yesus Kristus daTuhan ajiscow jofay ajiwara.” Inim jirmec or ajirimamin.

¹⁵Asan akat aporcow, Allah, Kristus, asmat ow aporomtamcema. Bare, Allah cowok e jirmec bajirim ipic ara. Aram asan akat bom ipic ara. Aram e Raja anakat ara. Aram e Tuhan anakat ara.

¹⁶Ar cowok jiwnenak ipic ara. Aram sereasnakut aman aemapma. Asmat owam, e sereas sotop bwemenawom asan opok. Asmat owam e aramat ipic bi bapor opok aemfes. Ar e aramat ipic bi bwempor asan opok. Bare, ow, aramat ipic baatamsicimawarces. Aram, “E Allah faknakut ara,” inim atakam batawawarces. A atakam, bare atakamnak ara.

¹⁷Bare, wun ow awames capinmi pok awut aomomames. Oram jirmec e ow mamjirimey: “Carma batawsicim arapok. E pok inim memames opok. Inimas jirey e pok bwe arapok. Jirey Allah cowok mameey. Aramat ipic pok awut atatamamarow. Er dar jak akat mememas ara.

¹⁸Caram akatas mamemawarey. E akatas awutnakut mamemawarey. Caram pok sey mamseyey. Pok wun ow batatam jak mamserememey.” Inim jirmec mamjirimey.

¹⁹Bare, e ow inimas aemces, ar e anakatas atawapomatcemes. Ar masirin, asep jofay asan akat aememcemes. Aram e jiwne anakat atowomcemes.

²⁰Timotius. E Allah or atatitamfan atakam pimicima. Wun ow atakam anakat amsomen. E nat, e amsomas bare atakam anakat opok. Er pwicak atakam ara. Eram jen ow bwe atakam mamtawas ara. Bare, or e atakam bak mampayemey.

²¹Wun ow e atakam ajamkawifes. Ar masirin, e Kristus basicim bokot jen aememfes. Bare, Allah asan akat car batatamcan.