Read Central Asmat 2 TIMOTIUS 1 Bible Online

2 TIMOTIUS 1 - Central Asmat bible

2 TIMOTIUS 1

¹Timotius. Dotiw akatenem! Dor Paulus ara. Dor awames surat or aetamamin. Allah daricipic ara. Kristus Yesusam daTuhan ara. Aramat ow, asan akat or baomcenes. Aram serow or bajiomcenes. Jak akatam or batetamcenes. Bare, e Kristus Yesus, jiwnenak, e ar ajamkawimom ow batetam, atayi aeforow. Aramat ipicam dor inim atakam botaw atewosomfan. Allaham dor inimas bwem akat aeef.

³Bare, dorafasutmar, dosa opok jak, kerja Allah aemtamawirisen. Doram inimas cowok aemamin. Join join dor jokam, iramam, janim aramat ipic aatamanimamin. Janim aramat ipic aanimcey, doram or bi binip aatamceceremawarmin, wunam terima kasih atakam aramat ipic aatamotawawarmin.

⁴Dor e bwec abwecfemas bi binip aceceremamin. Doram e obi bopor jak aserememamin. E obi aoporcey, jak akatnakut aememcimin.

⁵Oram Yesus faknakut asicimamem, inim bi binip aceceremamin. Bap ara, osok juwas Lois, Yesus faknakut asicimef. Wunam orosowoc juwas Eunike, Yesus faknakut asicimef. Dobi binip ara, oram Yesus inim faknakut asicimamem.

⁶Inimas ara, dor atjen or aowmin. Or e Allah or atetamfan cescuwas ay mamaworomey. Dor e doban e odam ton atatiwfin, Allah e cescuwas or atetamfan.

⁷E Allah dar atetamtotorforow Roh, dar omar jak bemapom opok. E nat, e Allah Roh, fakas atetamtotormarow. Aram ow damos bajiom jakam, jak fakam, inim aemapomtotormarow.

⁸Inimas ara, oram e daTuhan atakam kawey ow botaw namke arapok. Bare, dor Tuhan kerja aemtamamin. Inimas ow dor penjara cem aman ajiwtewapomfenes. E nat, or do namke bakay arapok. Bare, e Atakam Akat botaw ow ajurusemcomom. Inimas dorcin jurusemamoc. Allaham inim fakas or atetamaman.

⁹Bare, aramat ipic ajortewforow. Aram dar ow tarowat memem ajateforow. Dar akatas aemfom, wunam aramat ipic dar ow tarowat memem ajateforow— bare inimas opok. E nat, aramat ipic dar bayte, atayi bap emcaeefen. Aram asan akat dar bom, jak bap emcaserememefen. Ametnak ara, ar a capinmi bakenemtiw opok aemef, ar Kristus Yesus aemcowas aporefen. Inimas ametnakam ara, ar asan akat dar aomforowen.

¹⁰E nat, Kristus Yesus aenawef ara, ar e asan akat umuton aporomtamforow. Bare, aramat ipic dabajortew ipic ara. Aram e damir fakas akumimosomef. Aram e Atakam Akat umuton aotawforow. E Atakam Akat asicimames ow, jiwnenak aatamemawarcemes.

¹¹Allah dor e Atakam Akat bacacapiom ipic atewemfan. Aram e Atakam Akat kawey ow botaw atewosomfan. Aram e Atakam Akat kawey ow mamememtam ipic atewemfan.

¹²Inimas ara, dor eras ajurusemamin. Do nat, inimas namke opok. Dor e asicimof ipic nomsom. Aramat ipic, e ar atetamofas manmok atiwcema— e aofasineycow jofay ajiwar ara. Dor inimas nomsom.

¹³E amememtamfin atakamnak, mamjamkawiawarey. Dar Kristus Yesus cowkon aememamom ow, aramat ipic asicimamom. Daram damos aramat ipic ajiomamom. Oram eras bakoromtiw arapok.

¹⁴Allah akatipicas or atetamfan. Oram eras manmok pimicim mamtiwemey. E Roh Kudusam, or eras bwem akac aemceman.

¹⁵Bare, e Asia capinmi ow takas bakan ajiosfenes. E Figelusam, Hermogenesam, bakan ajiosfenes. Oram inim atakam jen emcajikurumfem.

¹⁶Bar arke ara, e Onesiforus jak akat aemapoma aefan. Inimas Tuhan, e aramat ipicam, a cem owam, serow bajiomcow. E Onesiforusam dor penjara cem aman aemapof aporef. E nat, ar do namke bakay opok.

¹⁷Aramat ipic Roma ajinawtayef cowok, aram apowfan. Apowfan, apowfan masirin apowtewfan.

¹⁸E Tuhan aofasineycow jofay, ar e Onesiforus serow bajiomcow. Doram e Efesus aemapawiru, e Onesiforus pok arke afafaytamawirin. Oram inim atakam jen emcajifem.