Read Central Asmat 2 TIMOTIUS 2 Bible Online

2 TIMOTIUS 2 - Central Asmat bible

2 TIMOTIUS 2

¹Ata. Kristus Yesus, asan akat, e aramat ipic cowkon aememamom ow, atatamamarow. Inimas oram jak fak mamememey.

²Dor ow arke bipu atakam acacapiomof. Oram e atakam jen ajifem. Bare, oram e atakam, ow tarowat mammememtamey. Er, atakam kawey ow mamememtam amsom owa.

³Oram Kristus Yesus atentara ipic akat. Inimas dorcin jurusemamoc.

⁴Tentara ow, jak akat e akomandan ipic bemapomtam jak aserememcemes. Inimas aram mami tugas bofiw opok aemcemes.

⁵Olahraga bwem owam, e olahraga aturan aopowcesnew, ar e juara pok batewet opok aemcemes.

⁶E pok akan batawapom jec awut bawu ow, e bapnak anakatas baemences.

⁷E atawmin atakam, bi binip mamceceremkurumey. E Tuhanam, e atakam takas jen bajikurum, bi binip umuton or atetamceman.

⁸Oram Yesus Kristus bi binip mamcomomawarey. Allah e aramat ipic aojaworomsumutumef. Aramat ipicam Daud urpis ara. E acacapiomamin Atakam Akat, inim atakamam ara.

⁹Dor e Atakam Akat acacapiomamin. Inimas ajurusemamin. Ow, dor pemerintah atakam bopow ipic inim cimin rantai manam ajikapomfenes. E nat, ow Allah Atakam manam bwemjikapom asan opok.

¹⁰Dor e Allah aereremtawef ow bajorem, inim jak aserememamin. Inimas dor eras takas ajurusemamin. Bare, Kristus Yesus e ow ajortewcema. Aram akatnakutas e ow aatamemtamawarcema.

¹¹Inim atakam, atakamnak ara: “Dar Yesus damir akac ajamaffomnew, daram aramat ipic tetakay akac ajamememcomom.

¹²Dar e ajurusemamomas, jir desen asikimemawarcomnew, daram aramat ipic akac jirmec ajamjirimcomom. Dar aramat ipic apacincomnew, aram dar apacincemarow.

¹³Dar aramat ipic basicimawar opok aecomnew, aramat ipic nat, jipic tarowatnakut aememawarcema. Ar arma bwempacin asan opok.” Inim atakam, atakamnak ara.

¹⁴A atakam, ow bi binip mamcomomtamey. Or e ow Allah bipu atakam fak mamotawey. “Car pok juwas, bwe atakam mamtaw arapok.” Inim mameey. E bwe atakam mamtaw, akatas opok. Eras nat, e jen ajimes ow, asan pwicak aemapomcema.

¹⁵Oram Allah kerja bwemtam ipic akat mammememporkurumey. E Allah atakamnak anakatpu cowok mammememtamey. Inimas aemcem, or namke opok aememcemem. Allaham, “Bare, e aemawirimas akat ara,” inim aeceman.

¹⁶E pwicak atakam bak mampayemey. E atakam amememtamames ow, fasinakut aememames.

¹⁷E pwicak atakam, doso cimin, awut afwicema. Himeneusam, Filetusam, inim atakam mamememtam ipic jamnuk ara.

¹⁸Ar e atakamnak akoromtiwfes. Aratakam, “Ow bojaworsit jofay, bare emcaenawef,” inim aemes. Wun owam e atakam jen ajifes, wunam ar Yesus Kristus basicim akoromtiwfes.

¹⁹E nat, Allah aratakamnak, cem fasis awut cimin, faknakut aatamememawarcema. E fasispu, inim atakam asuk wow awap. “Allah, e arow amsom.” Wunam, “Ow, ‘Do Tuhan ajamkawimin,’ inim aemesnew, aram e dosaas takas bajiwitiwces.” Inim atakam asuk wow awap.

²⁰Bare, cem awut aman ara, cīncīn piring awapes. E wun, mas piring ara. E wun, perak piring ara. E wun, os piring ara. E wun masirin, se piring ara. Bare, e wun piring, jaki ow amos pok batuwtam piring ara. E wun nat, mami pok basimtiw piring ara.

²¹Ow a pwicakas takas ajiwosomces, aram akat piring inim cimin aememcemes. Aram akatas bwem ow aememcemes. Aram ow tarowat aememcemes. Ar, Kerja Aramat Ipic e akerja bwemtam ow akat, inim ow aememcemes.

²²Bare, oram e ay ow jak basinomas mamkawi arapok. E nat, or ow tarowat mamememporkurumey. Ow damos mamjiomporkurumey. Oram e Tuhan janim fak aanimames ow tarowat, asan akat mamomey.

²³Oram, e jen ow e atawmes bwe atakam, mamkawi arapok. E ow amsom opok. E jen atakam aamtawmes ow, owen aamocemas. Oram inimas aporfem.

²⁴Tuhan kerja bwemtam ow, owen arapok. E nat, ar asan akat, ow takas baomces. Aram atakam mamememtam amsom ow baememces.

²⁵Ar e aratakam bopow ow jiman aafces, atakam akat baotawces. Inimas Allah, dosa bak bapayemtotor bi binip e atakam bopow ow, atetamcema openow. E ow e atakamnak ji aecemes openow.

²⁶E atakam bopow ow inimas aemces, aram bi binip umuton aoceceremcemes. Aram e Iblis siso aman afiscemes. Bap ara, e Iblis aemtiwef siso, e ow aneykomopef inim cimin ara. E owam Iblis atakam ji aefes.