Read Central Asmat 2 TIMOTIUS 3 Bible Online

2 TIMOTIUS 3 - Central Asmat bible

2 TIMOTIUS 3

¹Oram jakaperey. E asepnak aenawtotorcow jofay, ow bajurusem awutnakut aemcemes.

²E jofay, ow damos arma ajiomcemes. Aram pok awut batewet jak asinomcemes. Aram arma atawsicimcemes. “Dor ow akat cowok,” inim bi binip aceceremtotorcemes. Cemew atakamam aotawcemes. Aram arisepes atakam aopowcemes. Terima kasih bi binipam opokut aememcemes. Ow fasiam aememcemes.

³E asepnak jofay, ow, kawey ow damos bajiom opok aemcemes. Aram ow serow bajiom opok aemcemes. Aram kawey ow salah, suw atakam aotawcemes. Jokmen atakamam aotawcemes. Jokmenasam kawey ow aomcemes. Aram akatas bifan afayomcemes.

⁴Aram ajowow, jokmen ow aotasimemtamcemes. Jak amopam sarimnakut apwimemcemes. “Dor akat, wun ow pwicak,” inim bi binip aceceremcemes. Aram awames capinmias damos ajiomcemes. E nat, ar Allah damos bajiom opok aemcemes.

⁵E ow, ow tarowat memem, inim pir aecemes. E nat, ar e Tuhan atetamamar fakas, basicim opok aemcemes. Bare, or e ow bak mampayomey.

⁶E wun inim ow, pir aecemes, wunam kawey cem afiwcemes. Ar masirin, bi binip opok cepes atowomcemes. E cepes, dosa awut cepes ara. E ajak basinomasam, bare arkenakut ara.

⁷E cepesam atakam amememporawarcemes. E nat, ar e atakamnak bwemtewet asan opok.

⁸Ametnak, Yanesam, Yambresam, e Musa atakam aopowfesen. Bare, e kawey cem afiwmes owam e atakamnak basicim, akoromtiwfes.

⁹E ow nat, e ajak basinomas jipu bwememawar asan opok. Ow takas, e ow jen ow aporcemes— e ametnak ow, e Yanesam, Yambresam, jen ow aporfes inim awcawor ara.

¹⁰E nat, or e amememtamawiru atakam omsom. E aemawiruas omsom. E dojak aserememaminas omsom. Dor Yesus Kristus fak asicimawiru. Jakam jirow aememawiru. Kawey owam damos ajiomawiru. Doram jak fak aememawiru.

¹¹Owam dor aemsokomawirinis. Doram ajurusemawiru. Or inimas takas omsom ara. E Antiokia owam, Ikonium owam, Listra owam, e aemfenesas, bare oram omsom. E erasan ajurusemofas omsom. Bare, Tuhan e ajurusemofas takas ajortewfan.

¹²E Kristus Yesus cowkon aememames ow, ow tarowat aememames. Owam, inim ow ajurusumcemes.

¹³E nat, join join aatamfafaycow, e jursumec owam, e suw owam, pwicakas kayimin akakayimcemes. Aram tot kawey ow aotcemes. E kawey owam tot e ow aotcemes.

¹⁴E nat, or e atakamnak amememfem. Oram e atakam, fak asicimamem. Bare, e atakam mamjamkawiawarey. Oram e atakam or amememtamfan ow omsom.

¹⁵Or jiwinakap ewemfem, e Alkitab atakam jen ajiawirim. Oram eras bi binip comomey. Bare, e Alkitab atakam ji aemes ow, bi binip umuton aceceremames. Ar masirin, Kristus Yesus asicimames. Aramat ipicam e ow ajortewma.

¹⁶Allah e Alkitab atakam takas aotawef. E Alkitab atakam, ow mamememtamas akatipic ara. Eram ow e aemames salah, atakam umuton botawas akatipic ara. Eram jiman bafas akatipic ara. Eram ow tarowat memem mamememtamas akatipic ara.

¹⁷Inimas e Allah kerja bwemtam ow, e Alkitab atakam ji aeces, aram e kerja cescuwas aomomcemes. Ar masirin, e akatas takas bwem, inim fakas aomomcemes.