Read Central Asmat 2 TIMOTIUS 4 Bible Online

2 TIMOTIUS 4 - Central Asmat bible

2 TIMOTIUS 4

¹Dar Allah bipuam, Kristus Yesus bipuam, aememamom. E Kristus Yesus, e tetakay owam, e damir aaffes owam, e adosa, atakam asakamtiwcema. Aramat ipicam aoenawcema. Aram e aPemerintah atewemcema. Inimas ara, dor jirmec fak or ajirimamin.

²E Allah atakam mamcacapiomey. Asan akat aporcemnew, asan pwicak aporcemnew, e atakam botaw jec awut mamwuey. Ow e salah aefesas, atakam umuton e ow mamotawey. Owam jiman mamafey. Atjen mamowey. Eras takas jak jirow epcom mamemey. E atakamam mammememtamey.

³E aenawces jofay, ow, e atakamnak jen baji pwicak aememcemes. E nat, ar arop jak basinomas jipu cowok aemcemes. Aram guru arke aaramsisimtawcemes. E guru arke, e ow jen baji jak basinomas, inim atakam mamememtam guru ara.

⁴Ar e atakamnak bak apayemcemes, wunam e suw tarey atakam cowok jen ajicemes.

⁵Or ara nat, bi binip epcom mamememey. E ajurusemcemas takas, jak faka. Or e Atakam Akat botaw ipic ara. E tugas mamemey. Bare, eras mamemkurumey.

⁶Bare, dor Allah kerja bwemtam ipic ara. Inimas ow acatiwcemenes. Awames capinmi bakan ajioscey jofay, sotopnakap ara.

⁷Dor kerja Kristus Yesus bwemtam jec awutnakut awuawiru. Dor e kerjaas aemkurumof. Doram Kristus Yesus basicim, bakoromtiw opok aemof.

⁸Inimas ara, dor hadiah atewetcimin. E hadiah, e ow tarowat kus bamapom akatipicas ara. Bare, Tuhan, ow adosa, atakam basakamtiw ipic ara. Aram tarowat ara. E Jofay awut ara, aramat ipic e hadiah dor atetamceman. E nat, ar e hadiah dor cowok batetam opok. Wun ow e aramat ipic aojisemcow jofay bwenaw, inim jak aserememames. Aramat ipic e hadiah inim ow takas atatamcema.

⁹Bare, Demas awames capinmias damos ajiomama. Inimas ar bakan ajiosfan, wunam Tesalonika ajiref. Inimas oram mamsarimjinawporcan. Kreskes, Galatia ajiref. Titusam, Dalmatia ajiref.

¹¹Lukas cowok dor akac aemapmom. Oram Markus mamtowominawey. Aram Tuhan kerja dorcin aemtamcomom.

¹²Doram Tikikus, Efesus atiwirimof.

¹³Dor e dobaju Troas bakan ajinawof. Er Karpus cem awames. Ajinawcem ara, e baju mamtowominawey. E buku arkeam mamtowominawey. E binatang picin kertas buku bakan bajinaw arapok. Er penting awutnakut ara.

¹⁴E tembaga pok bakenem ipic juwas Aleksander, pwicakas arke aomfan. Tuhan nat, e ipic aemefas jipu amatam pomatam aemcema.

¹⁵Oram e ipic pimicima. Ar e acacapiomfom atakam aopowkurumef.

¹⁶Bare, dor e salah boworpor ipic bipu aememof. Aramat ipic, dor salahnew, salah opoknew, aoworporfan. E bap aememof bar, ow takas bakan ajiosfenes. E nat, Tuhan e ow aemfesas, “Car dosa aemfokom,” inim atakam basakamtiw arapok.

¹⁷Bare, Tuhan do mampu aememef. Aram jak fak atetamfan. Inimas dor aratakam acacapiomkurumof. E atakam e Yahudi opok samat takas jen bajias ara. Bare, Tuhan ajortewfan. Inimas dor damir baf opok aemof.

¹⁸Ow pwicakas do bwem aememcenes, Tuhan dor ajortewkurumceman. Aramat ipicam dor e aronam op Pemerintah Asan, asan akat atowotometceman. Bare, ow, “Tuhan akatnakut ara,” inim baatamjiawarces. A atakam, atakamnak ara.

¹⁹Or selamat atakam, Priskaam, Akwilaam, e Onesiforus cem owam, mamotawtamcan.

²⁰Erastus e Korintus inim aemapef. Trofimus dam aemamesef. Inimas dor aramat ipic e Miletus bakan ajinawof.

²¹E jufu bwi bwenaw opok, oram mamtakamsarimjinawporey. Ebulasam, Pudesam, Linusam, Klaudiaam, e wun Yesus ajamkawimes ow takasam, selamat atakam or aotawinamamenes.

²²Bare, Tuhan or jak fak batetamcow. Aramat ipicam asan akat car takas baomcan.