Read Central Asmat TITUS 1 Bible Online

TITUS 1 - Central Asmat bible

TITUS 1

¹Titus. Do Paulus ara. Dor awames surat or aetamamin. Dor Allah kerja bwemtam ipic ara. Yesus Kristusam dor aratakam botaw atewosomfan. Aramat ipic, dor e Allah aereremtawef ow, e aramat ipic basicim mamememtam, atewosomfan. Aram dor e atakamnak mamememtam atewosomfan. Bare, e atakamnak ji bwe ow, tarowat aememcemes.

²E atakamnak ji bwe owam jiwnenak aatamemawarcemes. Bare, Allah suw atakam bwemotaw asan opok. Ametnak ara, aramat ipic e pokin pokin bakenemapom opok ara, ar e jiwnenak da batatam, atayi aeef.

³Aramat ipic asan akat aporef, ar e atakam umuton aotawef. Aram e atakam bacacapiom tugas atetamfan. Aram dor inimas bwem jirmec ajirimfan. Bare, aramat ipic dabajortew ipic ara.

⁴Titus. Dor or Kristus Yesus basicim amememtamfin. Inimas or dotiwnak ara. Doram, oram, e aramat ipic, akac asicimamom. Bare, daricipic Allaham, Kristus Yesus dabajortew ipicam, asan akat or baomcenes. Aram jak akat or batetamcenes.

⁵Dor or Kreta capinmi bakan ajiosfin. E bafafaykurumtiw opokas, bafafaykurumtiw, bakan ajiosfin. Or e samatin samatin ketua gereja ow batawem, bakan ajiosfin. Eras e jirmec or ajirimfinas jipua.

⁶Ketua atewemcem, e ipic salah opok ipica. E ipicam cepes cowok ipica. Atiperesam Yesus Kristus basicim ipica. Atiperesam jursumec opok ipica. Atiperesam aratakam bopow opok ipica.

⁷Gereja bap ewamec ipic, bare Allah amandor ipic ara. Inimas ar salah opok ipica. Aram jen opok ipic arapok. Aram jak amop sarim ipic arapok. Aram jokmen bwi jayic ipic arapok. Aram owen ipic arapok. Aram pok batewet jak baseremom ipic arapok.

⁸E nat, ar kawey ow e acem batowomiw jak akat ipica. Aram akatas damos bajiom ipica. Aram bi binip tarowat ipica. Aram ow tarowat ipica. Aram jak fak ipica.

⁹Aram e amememef atakamnak mamkawi fak ipica. Inimas aram e atakamnak, wun ow amememtamcema. Aram atjen e ow aowcema. E atakamnak aopowmes ow, bi binip pwicak aceceremames. E ketua atewemcem ipic eras e ow umuton aporomtamcema.

¹⁰Bare, ow arke atakam aopowmes. Atakam desen afampwirtimtawmes. Aram tot wun ow aotcemes. E wun inim aemcemes ow, ametnak ara, agama Yahudi ajamkawifes. Asep ara masirin, aram daragama aojamkawifes.

¹¹Ar, pwicakas, ow arke amememtamames. Inimas ar, cem arke, asan pwicak aomames. Ar pok batewet jak aseremomames. Inimas ar eras aemames. Bare, e ow e atakam baanimtiwces.

¹²E wun Kreta ipic, atakam botaw ipic ara. Aratakam, “Kreta ow takas suw atakam ow ara. Aram jokmen binatang inim cimin ara. Aram besem paknam ow ara.” Inim aeef.

¹³Bare, e atawef atakam, atakamnak ara. Inimas ara, or e Kreta ow jiman faknakut mamafey. Aram Yesus Kristus basicim faknakut baemces.

¹⁴E jiman bafas ara, e ow e Yahudi suw tarey atakam ji boeasin. Eram e ow e atakamnak aopowfes ow ajirmec ji boeasin.

¹⁵Ow tarowat, e pokin pokin takas, akatas apormes. E nat, jursumec owam, Yesus Kristus basicim opok owam, jursumecas bi binip awut aceceremames. E ajak aman atakamam jursumec ara. Inimas ar e pokin pokin takas, jursumecas apormes.

¹⁶E ow atakam, “Allah namsom,” inim aemes. E nat, e aemamesas, Allah amsomas jipu opok. E ow wun ow bifan afayomames. Aram atakam aopowmes. Ar akatas bwemem asan opok.