Read Central Asmat TITUS 3 Bible Online

TITUS 3 - Central Asmat bible

TITUS 3

¹Bare, or a atakam, ow bi binip mamcomomtamey: Ar pemerintah atakamam, kepala ow atakamam, ji baeces. Aram atakas takas bwem jak baseremomces.

²Owam cemew atakam arapok. Owenam arapok. Aram ow serow bajiomces. Aram, atakam akat, ow takas baotawces.

³Ametnak ara, daram bi binip opok ow aememawirum. Daram atakam aopowawirum. Owam tot aotawiruwus. Daram jursumecas jukpiriam, e dajak basinomas jukpiriam, inimas jipu aemkurumawirum. E jo ajorowawiri, dar pwicakasam, bifaam, aemawirum. Owam bifan dar afayomawiruwus. Daram ow bifan afayomawirum.

⁴E nat, Allah dabajortew ipic ara. Aram damos ajiomamarow. Jofay ara, aramat ipic eras aporomtamforow. Aram e atetamamarow asan akatas aporomtamforow.

⁵E jofayam, aramat ipic ajortewtotorforow. Dar akatas aemfom, inimas aramat ipic ajortewtotorforow— bare inimas arapok. E nat, aramat ipic serow ajiomforow. Inimas aram ajortewtotorforow. Aram e dadosa acicikimosomtamforow, wunam dar aojisamestotorfom. E ajortewtotorforowas inimas ara. E Roh Kudusam ay jak atatamtotorforow.

⁶Bare, dabajortew ipic Yesus Kristus ara. Allaham, e Yesus Kristus aemefas aporef. Inimas, Allah, e Roh Kudus, asan akat atewnemtamforow.

⁷Inimasam Allah asan akat aomforow. Aram, dar ow tarowat ara, inim atakam asakamtiwef. Daram jiwnenak batamemawar ow aememfom. Bare, dar e jiwnenak batamemawar, jirey aemom ara.

⁸E atakam, atakamnak ara. Oram e atawmin atakam, atakam fak mamotawey. E Allah asicimames ow, e akatas bwemawar, jec awut bawuces. Inimas bwem, bare akat ara. Eras, ow takas, asan akat bomas ara.

⁹Oram e jen ow abwe atakam jen baji arapok. E ametnak ajitemfes ow juwas bajucucumirasam jen baji arapok. Owen atakamam, oram arapok. E Musa atatitamef Jirmec, bwe atakam mamtaw, oram arapok.

¹⁰Jipic cowok e Yesus basicim barewsi ow aman acucumcow, caram jiman e ipic mamafey. Aram jen opok aporcokom, jiman mamoafey. Car masirin, e ipic jen opok aoporcokom, bare caram e ipic bomesom arapok.

¹¹Or inimas bwem ipic, fasi ipic apormem. Ow e ipic pwicak aemamaras aporces, ar e ipic fasi ipic umuton cowok aporcemes.

¹²Dor e jufu bwi a Nikopolis capinmi bemap, atakam asakamtiwof. Inimas ara, dor Artemasnew, Tikikusnew, orasan atiwirimcey, oram a Nikopolis capinmi mamsarimjinawomporcan.

¹³Senas, pemerintah jirmec cescuw ipic ara. Or, aramat ipicam, Apolosam, asan akat batewosom, jec awut mamawuey. Ar e bowsec pok opok mememasin.

¹⁴E darowam akatas bwem mamememces. Inimas ar e apok apotomatcemes. Ar desen bakajirapasin.

¹⁵E dor akac aemapmom ow takas selamat atakam or aotawmenes. Dar e Yesus Kristus ajamkawimes ow damos ajiomamom. Oram selamat atakam e ow mamotawey. Allah asan akat car takas baomcan.