Read Central Asmat FILEMON 1 Bible Online

FILEMON 1 - Central Asmat bible

FILEMON 1

¹Dor Paulus ara. Dor Kristus Yesus akerja bwemtam ipic ara. Inimas ara, ow dor penjara cem aman ajiwtewapomfenes. Bare dajowow ipic Timotius, a surat akac aeapomamom. Filemon. Dar damos or ajiomamenom. Or dar akac kerja bwem ipic ara. Dar a surat oram, e dajowow cowoc juwas Apfiaam, Arkipusam, e ocem aman Kristus basicim ajarewsiapcemes owam, atetamamenom. Bare, e Arkipusam, daram, Kristus atentara ow inim cimin ara.

³Bare, daricipic Allaham, Tuhan Yesus Kristusam, asan akat car baomcan. Aram jak akat car batetamcan.

⁴Atakam jen ajiof ara, or e tarowat ow takas damos awut ajiomamem. Oram e Tuhan Yesus asicimkurumamem. Inimas dor janim e dorAllah aanimcey, dor janim or aatamanimtamcimin. Doram terima kasih atakam Allah aatamotawcimin.

⁶Doram orcin Yesus asicimamom. Inimas dar imwi aamtakamamom. Dar imwi aamtakamamom ara, dar e Kristus atetamamarow asan akatas, baporkurumji. Dor eras janim Allah aanimcimin.

⁷Dojowow ipic akatenem. Or e tarowat ow damos awut ajiomfem. Or masirin, e ow jak fak aemapomfem. Dor inim atakam jen ajiof ara, dor jak akatam, jak fakam, aememof.

⁸Inimas ara, dor janim cowok or aanimamin. Bare, dor Kristus aras ara. Inimas dor or e akatas bwem jirmec bajirim fakas awompey.

⁹Do nat, damos or ajiomamin. Inimas ara, dor jirmec or bajirim opok. Dor janim cowok or aanimamin. Bare, do Paulus ara. Doram akmat emeememof. Doram Kristus Yesus Kerja aemtamawiru. Inimas ow dor penjara cem aman ajiwtewapomfenes.

¹⁰Bare, dor Onesimus janim or aanimtamamin. Dor penjara cem aman aemapmin ara, dor aramat ipic, Yesus Kristus mamkawi, amememapomof. Inimas ar dotiw ara.

¹¹Bap ara, aramat ipic pwicakas or aomfan. Wow nat, ar akatasnak or aomceman. Aram akatasnak dor aomceman.

¹²Dor aramat ipic or aofasimtamamin. Do nat, e aramat ipic damos awutnakut ajiomamin.

¹³Bare, dor e Atakam Akat acacapiomof. Inimas, ow dor penjara cem aman ajiwtewapomfenes. Dor masirin, e Onesimus, pok dor bafafaytam, bakekem aememof. Ar arasan juw or buwem ara.

¹⁴Do nat, e ipic mami bakimop pwicak. Dor janim or batakamanim, bare akat ara. Doram, or inim akatas bwem jirmec o bajirim, pwicak. E nat, or inim akatas bwem, atakam orma basakamtiw, bare akat ara.

¹⁵Bare, e Onesimus, isi arke opok inim, bakan or ajiosfan. Eras nat, e aramat ipic, or akac aatamemapawarcemanas ara openow.

¹⁶Wow, e aramat ipic desen mami kerja bwemtam ipic opok. Ar asan akatnakut ara. Ar dajowow ipic akat emeememef. Bare, dor e ipic damos awutnakut ajiomamin. Aramat ipic nat, omami kerja bwemtam ipic ara. Aram, oram, Tuhan akac ajamkawimokom. Inimas oram aramat ipic damos awutnakut ajiomcemem.

¹⁷Inimas ara, dor ajowow ipic apormenemnew, or e aramat ipic, dor cimin, botewey.

¹⁸Ar salah or aemfannew, pok osom tewetefnew, bare e pok, bon surat mameapomey.

¹⁹Bare, awap atakamnakap, surat dorma aeapomamin: Bare, dor Paulus ara. Dor e bon uang or aotetamcimin. E nat, dor Kristus mamkawi or amememapomfin. Or eras amatam dor bajinew, or doratakam ji bwekurumji. Do nat, eras, binip or bacomomtam arapok.

²⁰Dojowow ipic akatenem. Dar Tuhan akac ajamkawimom. Inimas or asan akat dor baomcan. Dar Kristus akac ajamkawimom. Inimas or jak akat dor bwemcan.

²¹Bare, or doratakam ji aecemem. Oram e dor janim aanimaminas cowok bwem opok aemcemem. Or wunasam aoemcemem. Dor eras nomsom ara. Inimas ara, dor a surat or atetamamin.

²²Bare, oram jaki kamar pok bafafaytamcan. Car janim Allah dor aanimtamamenokom ara. Inimas dobi binip ara, aramat ipic dor car aofasimtamceman.

²³Bare, Epafras, Kristus Yesus ajamkawima. Inimas, ow, doram, aramat ipicam, penjara cem ajiwtewapomforowos. Aramat ipicam selamat atakam or aotawman.

²⁴Markusam, Aristarkusam, Demasam, Lukasam, Kristus kerja dor akac aemamom. Aram selamat atakam or aotawmenes.

²⁵Tuhan Yesus Kristus car asan akat baomcan.