Read Central Asmat IBRANI 1 Bible Online

IBRANI 1 - Central Asmat bible

IBRANI 1

¹Ametnak ara, Allah cīncīn atakam e aratakam botaw ow aomotawa ajiawiri. E ow masirin, e atakam e darafasutmar aomotawa ajiawiris.

²Wow nat, dar asepnak jofay aemapmom ara. Inimas Allah, atakam, e atiw aotawefen. E atiw masirin, e atakam dar aotawforow. Ametnak ara, Allaham fakas e atiw atetamefen. E atiw masirin, e pokin pokin akenemapomefen. Allaham e aramat ipic e takas batowomkurum, inim atewemefen.

³E atiw, e Allah arakatnakutas aporomtamama. Aramat ipicam e Allah awcawornakut ara. Aram atakam faknakut atawma. Inimas ar a takas aomomama. Aram asmat dosa bakokoromosom damir aafefen. Ar masirin, e onam op aaptometefen. Aram e faknakut Allah ban bo jamam aneypwikapefen.

⁴Allah, e atiw, ow awutnakut atewemefen. E nat, ar e malaikat, ow kanim inim atewemefen. Allaham, juwas akatnakut, e atiw aamemefen. E nat, ar mami juwas e malaikat aamemefen.

⁵Allaham, inim atakam, e amalaikat botaw opok cowok: “Or dotiw ara. Dor wow oricipic aememamin.” Wunam, “Dor aricipic aememcimin. Aram dotiw aememcema.” Bare, ar inim atakam e amalaikat botaw opok cowok arawen.

⁶Allaham, e betiw jiwi, awames capinmi batewnem aememef ara, aram atakam aootawefen: “E Allah malaikat takas, e aramat ipic basicimces.” Inim aeefen.

⁷Allah, inim atakam malaikat aotawefen: “Allah, amalaikat, fo cimin ajaworomapoma aema. Aram, akerja bwemtam ow, jismak komen cimin ajaworomapoma aema.” Inim aeefen.

⁸E nat, aramat ipic e atiw inim atakam aotawefen: “Allah. Or a takas aatamomomkurumawarmem. Or, jirmec akat, e aomomamemas takas ajirimamem.

⁹Or e tarowatas, damos ajiomamem. Oram e fasias bifan afayomamem. E orAllah inimas aporef. Inimas ar or atewemfan. Aram asan akatnakut or atetamfan. Eras or jak akat mememas ara. Bare, aramat ipic, inim asan akatnakut, e ojowow batetam opok.” Allah inim aeefen.

¹⁰Aramat ipicam atakam aootawefen: “Tuhan. Ametnak ara, or a capinmi akenemtiwfem. Oram e onam opas, ban akenemapomfem.

¹¹Eras takas apakapioscemes. E nat, or jiwne aatamemawarmem. Eras takas, pakaian inim cimin, akmat aemapcemes.

¹²Oram eras, baju inim cimin afofonomcemem. Oram eras, pakaian inim cimin asumtiwcemem, wunam wunas aojimimcemem. Or ara nat, inim aakajiremawarmem. Oram jiwne aatamemawarmem.” Allah inim aeefen.

¹³Allaham, inim atakam, e amalaikat botaw opok cowok: “E doban bo jamam mamneypwikapey— dor e ojewew ow akumimosomkurumcey jofay ajiwara.” Bare, ar inim atakam e amalaikat botaw opok cowok.

¹⁴E malaikat nat, ucim owam? Ar takas Allah kerja bwemtam jipir ow ara. Aramat ipic, e malaikat, asan akat e ajoremces ow bom, atewnema aema.