Read Central Asmat IBRANI 10 Bible Online

IBRANI 10 - Central Asmat bible

IBRANI 10

¹E Musa surat aeapomef Jirmec nat, e anakatasnak opok. E nat, er e aenawcow akatas inim ciminnakap ara. Tahunin tahunin, ow, e pok cowok, Allah acatitama aecemes. Eras bwem nat, e Allahpu bwenaw ow, ow tarowat bwememapom asan opok.

²Eras bwem, e Allah basicim ow adosa akokoromosoma aeef ayaw, e ow e adosa bi binip bocomom opok aema aefes. Aram e pok Allah bocatitam opok aema aefes.

³E nat, e pok Allah bacatitamas, e ow adosa, bi binip bocomomas ara.

⁴Bare, sapi jipic esnew, kambing ipic esnew, dosa bwemkokoromosom asan opok.

⁵Inimas ara, Kristus a capinmi baney aememef ara, aramat ipic atakam Allah aotawefen: “Or ow pok or bacatitamnew, pok or batetamnew, inimas pwicak aefem. Inimas or asmat dam dor akenemapomtamfenem.

⁶Oram ow pok jis or bafamtamkurumnew, dosa bakokoromosomtam pok or batetamnew, jak baseremem opok aemfem.

⁷Dor masirin, atakam or aotawfin: ‘Allah. Dor awamcey ara. Dor e jak aserememamemas jipu bwem aememamin. E Alkitabam dor inim atakam aotawman.’ Inim aefin.” Kristus inim aeefen.

⁸Bare, e aramat ipic e bap atakam atawefas: “Or, ow, pok or bacatitamnew, pok or batetamnew, pok jis or bafamtamkurumnew, dosa bakokoromosomtam pok or batetamnew, inimas pwicak aefem. Oram inimas jak baseremem opok aefem.” Inim aeefen. Inim pok bwem nat, e Jirmec atakam jipu ara.

⁹E aramat ipicam wun atakam aotawefen. “Dor awamcey ara. Dor e jak aserememamemas jipu bwem aememamin.” Inim aeefen. Bare, aramat ipic e tarey aturan akarimtiwef, wunam ay aturan atatitamefen.

¹⁰E Yesus Kristus, e Allah akat apormaras jipu aemefen. Ar e adam, bar cowokut Allah atetamefen. Er boemas opok. Inimas ara, Allah e dadosa akokoromosomtamforow.

¹¹E Yahudi Allah atakam mamtaw tugas ow takas, join join aemema aemes. Aram e atugas aema aemes. Aram e pok cowok Allah atetama aemes. Eras bwem nat, dosa bakokoromosomas opokut.

¹²Kristus nat, dosa bakokoromosomas cowokut Allah atetamef. Er boemas opok. Bare, aramat ipic eras aemef masirin, ar e Allah ban bo jamam aneypwikapefen.

¹³Wowam, aramat ipic erasan aemapma. Ar Allah e ajewew ow akumimosomkurumcow jofay manmok afema.

¹⁴Aramat ipic, pok cowokut Allah atetamef. Eras aemef, ar e dosa akokorosfes ow, ow tarowat aemapomef. E owam ow tarowat aatamememawarmes.

¹⁵E Roh Kudusam atemen aatamamarow. E Roh Kudus e bap atakam:

¹⁶“E Tuhan atakam: ‘Eras asakaypiemescow, dor inim atayi e ow aecimin: Dor e dojirmec e ow jak aman atewapomcimin. Doram, e jirmec bi binip, e ow atetamcimin.

¹⁷Dor, e ow adosaam, e dojirmec aopowfesasam, bi binip bocomom opok aecimin.’ Tuhan inim aeef.” E Roh Kudus inim aema.

¹⁸Bare, Tuhan, ow adosa, bi binip ajiwosomef. Inimas, ow dosa bakokoromosomtam pok, Allah botetam arapok.

¹⁹Dojowow akatonokom. Yesus e ares airimnemtamef. Inimas dar e Karow Asan bafiw jak fak aememamom.

²⁰Aramat ipic, ay bokot jof, e Allahpu bajar, akenemapomtamforow. E bokot jof bare jiwne bokot jof ara. E bokot jof e Allah cem jimasap kain aofema. E jimasap kain, e Yesus adam inim cimin ara.

²¹Daram Allah atakam mamtaw tugas ipic awutut awomcom. E ipic, e Allah cem, manmok atiwma.

²²Bare, daram Allah basicimnak aemfom. Daram pir bwe opok jak atowopfom. Bap ara, e dajak aman atakam aporsipor, dar salah awutut ara, inim aotawtotorforowos. Allah nat, e salah takas akokoromosomtamforow. Owam orom bwi abwimforow. Inimas ara, Allah bipu bapenmoc.

²³Allah atayi aeforow. Aramat ipicam suw opok. Daram, “Dar aramat ipic jirey aemom,” inim aemom. Bare, daram jirey fak aatameawarmoc.

²⁴Daram daramaman bi binip mamceceremamoc. Dar, ow, kawey ow damos bajiomam, kawey ow akatas bwemam, daramaman atjen mamowmoc.

²⁵Dar Allah basicim akac barewsiap, bakari arapok. Wun ow nat, inimas bwem emcakarifes. Bare, dar e Yesus aofasicow jofay sotop apormom. Inimas dar jak fak daramaman mamemapomamoc.

²⁶Bare, dar e atakamnak jen ajikurumfomnew, wunam dar dosa batamemawar akat aporcomnew, e dadosa bakokoromosomas bare opok ara.

²⁷Dar masirin, e aenawcowas omar awutnakut aecomom. E aenawcowas, bare Allah, ow adosa atakam asakamtiwcowas ara. Eram e Allah, aratakam bopow ow jismak aman afamcowas ara.

²⁸Ow e Musa tulis aeef Jirmec aopowces, wunam wun ow jamnuknew, mamincopnew, e bopowas atemen aeces, bare ow e bopow ow acatiwcemes. Aram e ow serow bwem opok aomcemes.

²⁹Inimas ara, e Allah atiw bwey aopowjarmes ow, ucim inimaram? Aram e Yesus es, mami es inim cimin aemames. E es nat, e Allah atayi, anakat bemapomas ara. E esam e ow akokoromosomef. Bare, e owam, e asan akat ar aomamar Roh, bifan afayomames. Bare, inim ow, bajurusem awutnakut aemcemes. Musa Jirmec bopow ow nat, kanim inim ajurusemcemes.

³⁰Bare, jipic cowok atakam, “Dor bic ajicimin. Dor amatam pomatam aecimin.” Wunam, “Tuhan, e arow dosa, atakam asakamtiwcema.” Inim aeefen. Bare, dar e atakam atawef ipic namsom ara.

³¹E jiwne Allah, ow bajurusum aememcow, e ow omar awutnakut aecemes.

³²E bap aemawirukumas bi binip mamceceremey. Car, e Atakam Akat, atakamnak aporfokom. Car masirin, bajurusem awutnakut aemfokom. E nat, e ajurusemfokomas ca bakumimosom opok.

³³Wun jofay, ow, car kawey ow bipu cemew aatfan. Aram car ajurusumfan. Wun jofay masirin, e ow, inimas cowok wun ow aomfes. Car masirin, e wun owam akac aememfokom.

³⁴Aram wun ow penjara cem aman afimimfes. Car masirin, e ow saw akat aoworporfokom. Aram e capok takas ces aetawfes. Ca nat, eras jak akat aememfokom. Car akatnakutas aomomfokom aporfokom. E aomomfokomas, bare jiwneas ara.

³⁵Inimas ara, e jak fak aememamokomas, bakorompim arapok. Er car asan akatnakut momomas ara.

³⁶Car e Allah akat apormaras jipu aemcokom, aramat ipic e atayi aeefas car atetamceman. Inimas ara, jak jirow mamomomawarey.

³⁷Er e Alkitab atakam jipu ara: “E aenawcow ipic sarim inim aenawcema. Aram bafafay opok aemcema.

³⁸E dotarowat ow, dor asicimamenes. Inimas ar jiwne aatamemawarcemes. E nat, e ow aotasiemcesnew, dor e ow akat opok aporcimin.” Inim aema.

³⁹E nat, dar bootasiem ow opok. Daram daniwis memames ow opok. Dar Allah asicimamom. Inimas dar ajoremcomom.