Read Central Asmat IBRANI 11 Bible Online

IBRANI 11 - Central Asmat bible

IBRANI 11

¹Dar Allah asicimamom. Inimas dar Allah e jak aseremomamomas da batetam, inim jirey aecomom. Daram e wun pok bwempor asan opok. E nat, dar Allah asicimamom. Er masirin, e wun pok awapes, inimas namsomnak ara.

²E darafasutmaram Allah asicimfesen. Inimas Allah e ow akat aporefen.

³Ametnak ara, Allah atakam atawefen. Inimas a capinmi ajitamesefen. E ow manmok bwemtiw asan opokas, manmok atiwfesas ajaworamesefen. Bare, dar aramat ipic asicimamom. Inimas eras atakamnak apormom.

⁴Habelam pok Allah atetamefen. Aramat ipicam Allah asicimefen. Inimas e pok, pok akat aemamesefen. E Kainam pok Allah atetamefen. E pok nat, pok pwicak aemamesefen. Allah, e Habel ar atetamef pok, akat aporefen. Inimas ar Habel jipic tarowat ara, inim atakam atawefen. E Habelam damir aafefen. E nat, aramat ipic Allah asicimefen. Inimas wowam ow e Habel aemefas, atakam jen ajimes.

⁵Henokam Allah asicimefen. Inimas aramat ipic damir baf opoken. Allah e aramat ipic onam op desen atowotometefen. Inimas owam e aramat ipic bwempowtew asan opoken. E Alkitab atakamam: e Allah e Henok batowotomet opok ara, Allah e aramat ipic akat aporefen.

⁶Allah, e a basicim opok ow, ow akat ara, inim atakam bwemotaw asan opok. Bare, Allah awamec. Aram asan akat e ar apowpormes ow atetamama. E aramat ipicpu aapenawces ow, inim atakam basicimces.

⁷Allaham e aemcowas, atakam, ow aotawefen. E Nuh masirin, Allah asicimefen. Inimas ar e atakam ji aeefen. Wunam, ar ci awut cem epcom akenemapomefen. Bare, e aramat ipicam, e acem owam, e ci aman ajorapfesen. Inimas Nuh e Allah basicim opok ow, dosa awut ow ara, inim aporomtamefen. Bare, aramat ipic Allah asicimefen. Inimas Allah, e aramat ipic, jipic tarowat aemapomefen.

⁸Allaham, Abraham, e arop capinmi bakan bajios, wunam e Allah ar atetamcow capinmi baysos, jirmec ajirimefen. E Abrahamam Allah asicimefen. Inimas ar e atakam ji aeefen. Ar e arop capinmi bakan ajiosef ara, ar e ajisoscow asan amsom opoken.

⁹Allaham, capinmi e Abraham batetam, atayi aeefen. Abrahamam e Allah asicimefen. Inimas ar e Allah atetamef capinmi, jewey ipic inim cimin, aemapawirien. E aramat ipicam, e Ishakam, e Yakobam, picin cem aman aemapawirisen. Allaham e Abaraham atayi aeefas cowok, atayi e Ishakam, e Yakubam, aeefen.

¹⁰E Abraham nat, jiwne kota, manmok afeefen. Allaham e kota at aetiwefen. Aram e kota akenemapomefen.

¹¹Bare, e Abraham akmatnakut aememefen. Arem Saraham ema cowoc aememefen. E nat, aramat ipic Allah asicimefen. Inimas Allah jiwi bafim fakas, e aramat ipic atetamefen. E aramat ipicam, Allah e atayi aeefas asicimefen.

¹²E Abraham akmatnakut arawen. Inimas e adamir jofay sotop arawen. E nat, ar ow arkenakut arafasut aememefen. E arurpis ow, e onam op bayar arkenakut, inim cimin aememfesen. Aram e jopir bisin ek arkenakut, inim cimin aememfesen.

¹³Bare, e ow takas, e damir aaffes jofay ajiwar, Allah asicimfesen. Aram, e Allah atayi aeefas, batowom opoken. E nat, ar Allah e atayias e asep ow batetam, inim aporfesen. Ar masirin, jak akat aememfesen. Aram atakam umuton atawfesen. “Dar awames capinmi, jewey ow inim cimin aememamom. Dar awames capinmi bakajirem opok.” Inim aefesen.

¹⁴Inim atakam atawmes ow, e arop capinmi apowpormes, inim aporomtamames.

¹⁵E owam, e bakan ajiosfes capinmi, bi binip bocecerem opoken. E capinmi bi binip aoceceremfes ayaw, aram e capinmi bofasi asan akat aememfesen.

¹⁶E ow nat, akatnak capinmi baysos, jak aseremomfesen. Er e onam op capinmi arawen. Inimas ara, Allah, e ow, “Allah daras ara,” inim baji, bare namke opoken. Aram kota cowok e ow akenemapomtamefen.

¹⁷Bare, Allah, e Abraham aemporefen. E nat, Abraham, Allah asicimefen. Inimas ar Ishak e Allah atetamefen. Bap ara, Abraham, e Allah atayi aeefas, atakam jen ajiefen. E Atakam, “E Ishak, e orurpis afimcema.” Allah inim aeefen. E nat, Abraham, e Ishak, e Allah bacatitam, aememefen.

¹⁹E Abrahamam, bi binip aceceremefen. “Allah, e Ishak bajaworomsumutum fakas epcom.” Inim bi binip aceceremefen. Bare, Abraham, e Ishak, damir aafef ipic inim cimin, aotewefen.

²⁰E Ishakam Allah asicimefen. Inimas ar, Allah, asan akat, e Yakubin Esau asep jofay batetam, janim aanimefen.

²¹E Yakubam Allah asicimefen. Inimas ar damir bafken aememef ara, ar Allah, asan akat, e Yusuf atiperes aporsipor batetam, janim aanimefen. Aram e aronok pok asurotpememef, wunam, “Allah. Or akat ara,” inim aeefen.

²²E Yusufam Allah asicimefen. Inimas ar e damir aafcow jofay sotopnakap aporef, ar e Israel ow e Mesir capinmi bakan ajioscowas, atakam atawefen. Aram e ow, e aramat ipic damir emake batowomos, jirmec ajirimefen.

²³E Musa arisorowam Allah asicimfesen. Inimas ara, e Musa ajisamesef, arisorow e jiwi pir mamincop ajiwar acukumapomfesen. Ar e jiwi akatnakut aporfes arawen. Aram e raja jirmec bopow, omar opok aememfesen.

²⁴E Musaam Allah asicimefen. Inimas ar sur aotemef ara, ar, ow, “Ewamec ipic Firaun apores atiw ara,” inim baji pwicak cowok arawen.

²⁵Aram, e Allah arow, akac bajurusem, akat arawen. Wunam ar e jak akatas bemapom dosa, dar cowoknakapam mamkawi pwicaken.

²⁶Abi binip ara, “E Kristus mamkawi, wunam ow cemew do bat, bare akat ara. E Mesir capinmi pok awut momom nat, pwicak ara.” Inim bi binip aceceremefen. Bare, aramat ipic e Allah e asep jofay ar atetamcowas, manmok afeefen.

²⁷E Musa Allah asicimefen. Inimas ar e Mesir capinmi bakan ajiosefen. Aram e raja ipic jokmen aemcowas, omar pok aememefen. Aram e Mesir capinmi bofasi pwicaken. Bare, asmat ow, Allah manmok bwemtiw asan opok. E nat, e Musa aemefas, ar e Allah bi aporef inim cimin ara.

²⁸E Musa Allah asicimefen. Inimas ar e Bakamsow Pokbwi ji aeremapomefen. Inimasam ar ow, es, e cemin cemin jimasap ospu batuturumapom, jirmec ajirimefen. Eras e Bacatiw Malaikat e Israel betiw jiwi bacatiwasinas arawen.

²⁹E Israel owam Allah asicimfesen. Inimas e Laut Merah bwiam aampayefen. E ow masirin, se fak inim cimin, poman awarimwirfesen. E nat, e Mesir ow awarimwirporfes, aram bwi damir aaffesen.

³⁰E Israel ow Allah asicimfesen. Inimas ar e kota Yeriko fumi, bar tujuh ajiwar abwicirijarfes ara, e kota ek pagar cenes aneyjuamesefen.

³¹E werey cowoc juwas Rahab, Allah asicimefen. Inimas ar, e Israel curuw basuwpor ow, asan akat atowomiwefen. Asep ara masirin, Israel ow, e Allah atakam bopow ow acajimirfes ara, ar e cowoc bacatiw opoken.

³²Do nat, wun inim atakam bataw arapen? Dor e Gideonam, e Barakam, e Simsonam, e Yeftaam, e Daudam, e Samuelam, e Allah atakam botaw owam, atakam bataw, bare jofay opok.

³³E owam Allah asicimtotorfesen. Inimas ar jewew samat awut akumimosomfesen. Aram tarowatas aemfesen. Aram e Allah atayi aeefas atowomfesen. Aram singa bweyof akapimopfesen.

³⁴Aram jismak awutnakut asapimapomfesen. Kawey owam, owec parang, e ow basesakam aememfesen. E ow nat, ajoremfesen. Aram ow kumit aememfesen. E nat, Allah, fakas, e ow atetamefen. Aram jewew owec aamofes ara, jokmen awut aememfesen. Ar e dawon opok capinmi jewew akumimosomfesen.

³⁵Cepes e ajowowam damir aaffes ara, Allah e wun ow ajaworomsumutumefen. E cepes masirin, e ow, asan akat atewfesen. Kawey ow, wun ow ajurusumtiwfesen. E kawey ow, e ow, asan akat basurumtam, atakam atawfesen. E ow nat, asan akat baysos pwicaken. Ar bojaworsit, wunam akat jiwneas batowomawar, akat arawen.

³⁶E kawey ow, uc wun ow aocomatfesen. Aram omop e ow aaffesen. Aram ow rantai manam ajikapomfes, wunam penjara cem aman afimimfesen.

³⁷Aram ek e wun ow akokomjimirtiwfesen. Aram wun ow e dam, gergaji asesakamtiwfesen. Aram wun ow owec parang asakamtiwfesen. E wun owam, domba picinnakapnew, kambing picinnakapnew, ajimomfes, wunam acowojarfesen. Aram pok opok aememfesen. E kawey ow e ow ajurusumfesen. Aram pwicakas e ow aomfesen.

³⁸Awames capinmi ow nat, e ajurusemfes ow, awcawor opokut. Bare, e ajurusemfes ow, e cem opok asanam, e sikon asanam, desen acowojarfesen. E acem, bare e ek jipam, e capinmi jofam, arawen.

³⁹Bare, e ow takas Allah asicimtotorfesen. Inimas Allah e ow akat aporefen. E ow nat, e Allah atayi aeefas, batowom opok arawen.

⁴⁰Allaham dar bi binip aceceremefen. Ar masirin, at akatnakut aetiwefen. E at ara, e ow, e asan akatnakut, arop batowom arapoken. Daram, e owam, e asan akatnakut akac atowomcomom. Inim at aetiwefen.