Read Central Asmat IBRANI 12 Bible Online

IBRANI 12 - Central Asmat bible

IBRANI 12

¹Bare, e manmok da batiw ow arkenakut, fumi aamwiricemamarowos. Inimas ara, e akekemtawmarowas takas, biwitiwmoc. Daram e aseseapmarow dosa takas, biwitiwmoc. Dar e je pwecec aamtamcomas, jak jirow epcom je amtamamoc.

²Daram manmok e Yesus cowok aatamtiwmoc. Aramat ipic Allah basicim bi binip atetamforow. Aram, dar Allah basicimawar, inim bi binip aatamtetamawarmarow. Aramat ipic e asep jofay e jak akatnakut aemcowas aporefen. Inimas ar e salib op damir baf, omar baysos opok arawen. Aram e salib op damir baf namke bakayem omar opok arawen. Ar masirin, wow e Allah aemapmar asan e ban bo jamam aemapma.

³Caram e aramat ipic aemefas bi binip mamceceremey. Bare, e dosa ow, e aramat ipic, bifan awutnakut afayomfesen. E aramat ipic nat, jak fak aememefen. Inimas ara, caram damjipi atey arapok. Caram jak basakayem arapok.

⁴E dosaas bakumimosom aemporawirukum ara, wow ajiwar, ow car bacatiw opok ara.

⁵Bare, car Allah atiperes ara. Ca nat, e Allah atjen car aowfan atakam, bi binip emejanimfokomnew? E atakam ara: “Ata. E Tuhan or ajurusumcan, ‘Eras desenas ara,’ inim bi binip bacecerem arapok. Aram jiman or aafcan, jak basakayem arapok.

⁶Bare, Tuhan e damos ajiomamar ow takas, ajurusumcema. Aram e atewetef jiwi takas, omop aafcema inim cimin ara.” Allah inim aeef.

⁷E ajurusemamokomas, bare Allah car akatas bwem amememtamaman ara. Car Allah atiperes ara. Inimas ar eras car aomaman. Asmat ducur ow takasam, e atiperes ajurusumcemes.

⁸Jiwi takasam ajurusemcemes. Inimas Allah car bajurusum opok aemcannew, car atiperes opok ara. Car masirin, tana jiwi inim cimin ara.

⁹E darisorow ajurusumforowos. E nat, dar e ow asicimfom. Inimas ara, daram e onam op daricipic atakam ji bwekurumji. Dar masirin, jiwne aecomom.

¹⁰Darisorow, bar arke opok ajurusumforowos. Er e akat aporfesas jipu ara. E Allah ajurusumamarowas nat, asan akat dar batetamas ara. Eram dar ow tarowat, e Allah tarowatas jipu, bemapomas ara.

¹¹Ow dar ajurusumcarow, eras dar jak pwicak bemapomas aporcomom. Er jak akat bemapomas opok aporcomom. E bajurusumas nat, dar akatas bwem mamememtamas ara. Inimas asep jofay, e ajurusemfes ow, ow tarowat aememcemes. Aram jak akat ow aememcemes.

¹²Inimas ara, e caban tomor, fak mamemey. E cajine kus kumitam fak mamemey.

¹³Caram e tarowat bokotpu mamjarawarey. Inimas e cabwey pwicak, pwicaknak bemap opok aemcema. Aram ajaworcema.

¹⁴Caram ow takas asan akat mamamjiomporey. Caram ow tarowat mamememporey. E tarowat opok ow, Tuhan bi bapor opok aemcemes.

¹⁵Caram pimicima. E caramaman wun ow, e Allah atetamamar asan akat, batowop opokasin. E asan akat batowop opok ow, kawey ow bifan afayomcemes. Aram kawey ow asan pwicak aomcemes. Inimas ow arke jursumec aememcemes.

¹⁶Pimicima. E caramaman wun ow, jursumec mememasin. Aram e Esau inim cimin, Allah basicim opok ow mememasin. E Esau aricipic, asan akat e Esau batetam aememefen. E Esau nat, eras, amos pok cowoknakap auwumtewenefen.

¹⁷Asep ara masirin, ar, e aricipic asan akatas batowop, jak aseremomefen. Aram eras bwec abwecefen. Allah nat, e Esau eras batowop pwicaken. Esauam e pwicak aemefas akatas boem, emporef opoken. Caram e atakam camsom ara.

¹⁸Car e Israel ow aemfesas bwem opok. E ow e sikon juwas Sinaipu aenawfesen. E sikon, bare jipiras opok. Er ban bakurumas ara. Erasan ara, ar jismak komen awutnakut aporfesen. Erasanam jiwicnakutas arawen. Jon awutnakutam arawen.

¹⁹E owam fwiutmar jen ajifesen. Aram atakam awutnakut jen ajifesen. E wun atakam ara, “Binatangam a sikonpu aenawcow, car ek e binatang mamkomtiwey.” Inim aeefen. E owam, inim atakam omar awutnakut arawen. Inimas ar e atakam jen boji arapok, inim janim fak Allah aanimfesen.

²¹E aporfesas, bare omar awutnakutas arawen. Inimas Musa atakam, “Dor omar awut ara. Doram dam tetete aemin.” Inim aeefen.

²²Car ara nat, e sikon juwas Sionpu aenawfokom. Er e jiwne Allah akota asan ara. E kota e onam op kota Yerusalem ara. Caram ajarewsiemfes malaikat arkenakut bipuam aenawomfokom. E malaikatam jak akat aememfes.

²³Caram e Allah basicim ajarewsiemfes ow bipu aenawomfokom. E ow, bare e Allah betiw jiwi ara. E ow juwasam e onam op surat aman awapes. Caram Allah bipu aenawomfokom. Aramat ipic, ow takas adosa, atakam basakamtiw ipic ara. Caram, e ow tarowat e aranakat owpu aenawomfokom. E ow, e jirey aeawiris asan akat, bare emetowopkurumfes.

²⁴Caram Yesus bipu aenawomfokom. Aramat ipic, e Allaham, e asmat owam, atakam ajomattamef. Allah masirin, e ay atayi aeef. Caram e Yesus e ares atuturumapomef asanpu aenawomfokom. E ares, bare akatas aemapomef. E Habel airineyef es nat, pwicakas aemapomefen.

²⁵Inimas ara, caram pimicima. Car e atakam atawmar ipic botpem arapok. Bap ara, Allah, awames capinmi ow atakam aotawefen. E aramat ipic atakam aopowfes ow nat, batakay opok aemfesen. Inimas ara, dar, e aramat ipic e onam op atawnemamar atakam aopowcom, daram bwemtakay asan opoknakut ara.

²⁶Bap ara, e aramat ipic atakam atawefas, awames capinmi asisimefen. Jepen inim nat, aramat ipic atayi aeefen. “Jofay cowoknakap ara, dor awames capinmi aosisimcimin. E nat, e cowok opok. Dor e onam opam asisimcimin.” Inim aeefen.

²⁷E atakam, “jofay cowoknakap” apormom ara. Dar masirin, Allah e akenemapomef pok asisimcow aporcomom. Daram aramat ipic e pok atowomoscow aporcomom. Inimas ara, e Allah basisim opokas, inim akajirapcema.

²⁸Bare, dar e Allah Pemerintah Asan afiwcomom. E asan bwemsisi asan opok. Inimas dar terima kasih atakam aotawmoc. Daram aramat ipic junum awut emoc. Daram omar epcom aramat ipic basicimamoc. Er e aramat ipic akat apormaras jipua.

²⁹Bare, e darAllah, pok bafaykurum jismak inim cimin aememama.