Read Central Asmat IBRANI 13 Bible Online

IBRANI 13 - Central Asmat bible

IBRANI 13

¹Bare, car Kristus ajamkawimokom ow ara. Inimas caramaman damos mamjiomawarey.

²Binip manim arapok. Caram e kawey ow e cacem mamtowomiwey. Wun ow, inimas aemfes ara, ar malaikat atowomiwfes. E nat, e atowomiwfes ow, malaikat opok inim arawen. Ar asmat ow inim arawen.

³Caram e penjara cem aman aemapmes ow binip manim arapok— car e ow penjara cem aman akac aemapmokom inim cimina. Owam e wun ow ajurusumames. Car e ajurusapmes ow binip manim arapok— car e ow akac ajurusapmokom inim cimina.

⁴Ow takas, owersey, akatas baporces. Kawey cen cemen ban arapok. Allah e jursumec owam, e kawey cen cemen ban owam, siksa aemcema.

⁵Uang bi binip bacecerem awut arapok. E aomomamokom pok, jak akat ememey. Bare, Allah atakam atawef, “Dor or bakorompim opok cowok aemcimin. Doram bakan or bajiapom opok cowok aemcimin.” Inim aeefen.

⁶Inimas dar jak fak ememamoc. Daram: “Tuhan asan akat dor aomaman. Inimas dor e asmat ow aemcenesas, omar opok aemamin.” Inim etotormoc.

⁷E car aomomatawirin ow bi binip mamceceremey. E ow, bare Allah atakam car aotawawirin. E ow e tetakay aememawirisasam, e damir aaffesasam, bi binip mamceceremey. Caram e ow e Yesus Kristus asicimfesasam mamcowoyey.

⁸Bare, e Yesus Kristus, wowam, toam, asep jofayam, cawor aatamememawarma.

⁹Caram e wun ow e cīncīn atakam amememtamamesas, mamkawi arapok. Car e bokotpu anakat bakan bajitiwasin. Bare, Allah asan akat mami atetamama. Inimas ow jak fak aememames. Eras bare akat ara. E nat, ow amos pok memen peraturan ji aeces, eras e ow jak fak bemapomas opok. Erasam e ow asan akat bemapomas opok.

¹⁰Bare, dar Allah pok jis bafamtam jowse aomopmom inim cimin ara. Awames capinmi picin sembahyang cem aman pok afafaytamames ow, e pok bwememen asan opok.

¹¹E Allah atakam mamtaw tugas ipic awut, binatang es, e Karow Asan atowomiwa aema. Er dosa bakokoromosomas ara. E nat, ow e binatang bini, e cem apem jis afama aemes.

¹²Inimas Yesusam, e kota cem apem e pagar jimasap cesen, damir aafef. Ar erasan e ares airimnemef. Eras, ow tarowat bemapomas ara.

¹³Bare, daram e aramat ipicpu, e cem apem bajisosmoc.

¹⁴Awames capinmi, dar jiwne batamemapawar asan opok. Da nat, e aenawcow kota apowpormom.

¹⁵Inimas ara, daram Allah batamsicimawarmoc. Yesusam dar eras bwem, bi binip atetamamarow. Daram eras aemcom, dar pok Allah acatitamcomom inim cimin ara. Dar, Allah akat, inim atakam aotawcom, dar pok, aramat ipic atetamcomom inim cimin ara.

¹⁶Bare, car akatas bwemam, caramaman asan akat mamomam, binip manim arapok. Eras aemcom, daram pok Allah acatitamcomom inim cimin ara. Eram e Allah akat apormaras jipu ara.

¹⁷E car aomomatman ow atakam, ji mameey. E ow botpem arapok. Aram manmok car aatamtiwawarman. Allaham, e ow aemamesas, akatnew, pwicaknew, inim aoworporcema. Caram e ow aratakam ji aecokom, ar e atugas jak akat epcom aemcemes. Car aratakam ji bwe opok aemcokom, ar e atugas jak pwicak epcom aemcemes. Eras car asan akat bemapomas opok.

¹⁸E dajak aman atakam, e aemfomas, salah opok atakam aotawtotormarow. Dar inimas namsomnak ara. Daram e aemcomas takas, akatas bwem, inim jak aseremomamom. Inimas ara, caram janim Allah dar aanimtamcarowey.

¹⁹Bare, dor janim fak car aanimamin. Car janim Allah mamanimtamcan. Dor carasan sarim bojinaw, inim janim Allah mamanimtamcan.

²⁰Bare, Allah asan akat atetamamarow. Aram, e Yesus daTuhan ajaworomsumutumef. E Yesusam, e ares airimnemef. Inimas ar e jiwne atayi, atayi anakat aporomtamef. Allah masirin, e aramat ipic, e domba manmok batiw ipic awut, atewemef.

²¹Bare, e Allah, e akatas takas car batetamcan. Eras car e aramat ipic akat apormaras jipu bwemas ara. Aramat ipic e akat apormaras jipu, e cajak aman baemtotorcan. Aramat ipic, e Yesus Kristus, eras, e cajak aman bwem, atewemef. Owam inim atakam baatamtawawarces. “Bare, a atakam, atakamnak ara.” Inim bajiawarces.

²²Dojowow akatonokom. A car aeapomtamamin surat, atjen bowas ara. A suratam jirow opok. Inimas dor janim fak car aanimamin. A surat atakam, jak jirow epcom, jen mamjiey.

²³Jakaperey. E penjara aramat ow, e Timotius asurumtamfes. Aramat ipic, arasan asarimenawcow, daram carasan akac ajinawomcomom.

²⁴Selamat atakam, e car aomomatman ow takasam, e ow tarowat takasam, mamotawtamcan. E Italia Yesus mamkawi owam, selamat atakam car aotawman.

²⁵Allah asan akat, car takas baomkurumcan.