Read Central Asmat IBRANI 2 Bible Online

IBRANI 2 - Central Asmat bible

IBRANI 2

¹Inimas ara, dar e jen ajifom atakam mamkawikurumji. Dar e atakam bakorompimasin.

²Allah, e aJirmec, malaikat atetamefen. E malaikat masirin, e Jirmec, asmat ow aotetamfesen. E Jirmec, bare atakamnak ara. Allah, e Jirmec ji bwe opok owam, e Jirmec aopowfes owam, ajurusumefen.

³Dar masirin, e Allah da bajortew atakam jen opok ememcomnew, dar bwemjorem asan opok cowok. E bajortew atakam, bare anakatnakutas ara. Inimas Tuhan e atakam arma aotawefen. E Tuhan atakam jen ajifes owam, e atakam, atakamnak aporomtamforowos.

⁴Allaham, e atakam, atakamnak aporomtamforow. Aramat ipic, baporomas pokam, junum bweasam, cīncīn fakasam, aemef. Aram e Roh Kudus atetamcemaras, e abi binip jipu, sey aseyeef.

⁵Bare, e atakam atawmom capinmi, e aenawcow ay capinmi ara. Allaham, malaikat, e capinmi momom, inim atakam opok.

⁶E nat, e Alkitab e wun atakam: “Tuhan Allah. Asmat ow, bare penting opok. Inimas or e ow bi binip acomomamem ucimaram? Asmat atiperesam penting opok. Inimas or e ow asan akat aomamem ucimaram?

⁷Or asmat ow, ow kanim, bar arke opok aemapomfem. Inimas e malaikat, ow awut inim, bar arke opok aemapomfem. Or asmat ow, raja ow inim cimin, atakam akat aotawfem. Oram, ar raja ow inim cimin asicimfem.

⁸Oram, ar a takas momomkurum, inim atewemfem.” E Alkitab inim aema. Allah, asmat ow, a takas momomkurum atewemef ara, bare ar a takasnakut momomkurum, inim atewemef. E momom opokas, bare opok cowok. Wow nat, asmat ow, a takas momomkurum opok apormom ara.

⁹Da nat, Yesus apormom ara. Allah, asan akat, asmat ow batetam aememef. Inimas ar Yesus asmat ow takas damir baftam atetamef. Inimas aram e Yesus, bar arke opok, ow kanim inim atewemef. E malaikat masirin, ow awut inim aememfes. Bare, Yesus ajurusemef. Wunam damir aafef. Inimas ara, Allah, aramat ipic, raja ipic aotewemef. Ar aramat ipic atakam akat aotawef. Aram aramat ipic asicimef.

¹⁰Bare, Allah, a takas, a basicim akenemapomef. Aram ow arke, atiperes memem, akat aemef. Aram e ow arke, e arasan akatnakut akac bemap, akat aemef. Inimas ar e Yesus bajurusem atetamef. E bajurusemas, e Yesus, bajortew ipic anakatnakut bemapomas ara. Yesusam, e ow abajortew ipic aememef araman. E Allah aemefas, bare akat ara.

¹¹Bare, e Yesus, dosa bakokoromosom ipic ara. Aramat ipic aricipicam, e dosa akokorosces ow aricipicam, bare cowok ara. Inimas Yesus, “E ow dorewcewes ara,” inim atakam botaw, bare namke opok aemama.

¹²Aramat ipicam atakam, “Allah. Dor oratakam e dorewcewes aotawcimin. Doram e ajarewsiapces ow, or basicim so, akac aecomom.” Inim aeefen.

¹³Wunam, “Dor jirey Allah aecimin.” Wunam, “Dor awamcey ara. E Allah atetamfan jiwiam dor akac awamcom ara.” Inim aeefen.

¹⁴E atakam atawef jiwi, bare asmat ow ara. Inimas Yesus e ow awcawor aememef. Aram asmat ipic ajaworemef. Er e Iblis bakumimosomas ara. E Iblis, ow bacatiw fakas aomomef. E nat, Yesus, e Iblis bakumimosom, damir baf aememef.

¹⁵E asmat ow join afafayawiri, damir omar aatameawiris. Inimas ar taw bat ow inim cimin aemapawiris. E nat, Yesus e ow basurumtam, damir baftam aememef.

¹⁶Atakamnak ara, e aramat ipic, asan akat, e malaikat bom opok. Ar asan akat e Abraham urpis aomef.

¹⁷Inimas ara, aramat ipic, e arewcewes awcawornak memem, bare penting awutut ara. Eras, aramat ipic, e ow, arAllah atakam mamtaw tugas ipic awut mememas ara. Eram ar ow serow ipic tarowat mememas ara. Eras Allah kerja bwemtamas ara. Eram e ow adosa bakokoromosomas ara.

¹⁸Bare, Iblis, e Yesus, dosa bwem acajijimtawef. Yesusam ajurusemef. Inimas aramat ipic, e Iblis dosa bwem acajijimtawmar ow, asan akat bom amsom ara.