Read Central Asmat IBRANI 3 Bible Online

IBRANI 3 - Central Asmat bible

IBRANI 3

¹Dojowow akatonokom. Allah car ow tarowat atewemfan. Aram car ajatefan. Bare, car e Yesus bi binip mamceceremey. Allah e aramat ipic atewnemefen. E aramat ipicam e darAllah atakam mamtaw tugas ipic aememefen. Daram e Allah asicimamom ara.

²Allah e Yesus inim tugas bwem atewemef. Bap ara, Musa, e Allah cem, manmok akat atiwemkurumefen. Allah masirin, e Musa asicimefen. Jepenam, Allah, Yesus, e Musa inim cimin asicimef.

³Bare, ow cem bweapom ipic atakam akat awutut atawmes. Ar masirin, e cem, atakam akat kanim inim atawmes. Inimas ara, ow e Yesus basicim awutut baemces. Aram e Musa basicim kanim inim baemces.

⁴Ow e cemin cemin aeapomames. E cem ji arma bweap opok. Allaham e pokin pokin akenemapomefen.

⁵E Musa, e Allah cem manmok akat atiwemkurumef ara, aramat ipic, kerja bwemtam ipic aememefen. Inimas ar e Allah e asep jofay atakam atawcowas, atakam atawefen.

⁶E nat, e Kristus Allah atiw ara. Aram e Allah cem manmok akat atiwemama. Allaham e atiw asicimama. Bare, awapom ow acem ara— dar jak fak aememawarcom ara. Daram e asepnak jofay ajiwar, jak akat epcom e Kristus jirey aeawarcom ara.

⁷Bare, e Roh Kudusam atakam atawma: “Car wow Allah atakam jen ajicokom,

⁸jen fak arapok. E Allah juw auwumatfokom jofay, bare jen aememfokom. Ca nat, inimas boem arapok. E jofay ara, car e ow opok asan, Allah aemporfokom.

⁹Bare, e Allah atakam, ‘Erasan ara, e carafasutmar dor aemporkurumfenes. Aram tahun empat puluh ajiwar, e aemawiruas aporawiris. Inimas ara, dor e ow, jak amop apwiemawiru. Dor masirin, “E ow bi binip fasi aceceremawarmes. Aram e aemaminas amsom opok.” Inim aeof.

¹¹Wunam, “Doram jak amop apwiemof, wunam atayi faknakut aeof. E ow e doses ban asan bwemfiw asan opok.” Inim aeof.’ Allah inim aeefen.” E Roh Kudus inim aema.

¹²Dojowow akatonokom. Inimas ara, caram pimicima. Car jursumec jakam, Allah basicim opok jakam, momom arapik. E ca wun ow, e jiwne Allah, bakorompimasin.

¹³Wow ara, Allah, car aratakam ji bwe, asan akat car atetamaman. Inimas ara, e join join afafaycow, caramaman atjen mamowey. E dosaas tot car botasin. Caram jen fak mememasin.

¹⁴Ametnak ara, dar e Kristus asicimkurumfom. Daram aramat ipic ajowow aememfom— dar e ametnak asicimkurumfomas, e asepnak jofay ajiwar, aatamemcom ara.

¹⁵Bare, e Alkitab atakam: “Car wow Allah atakam jen ajicokom, jen fak arapok. E Allah juw auwumatfokom jofay, bare jen fak aememfokom. Ca nat, inimas boem arapok.” Inim aema.

¹⁶Bare, ow Allah atakam jen ajifes, wunam aramat ipic juw auwumatfesen. E ow nat, cam? Bare, ar e Musa e Mesir capinmi bakan bajios asakamsimomosef ow takas ara.

¹⁷Tahun empat puluh ajiwar, Allah, ow, jak amop apwiemawirien. E ow nat, cam? Er e dosa aemfes ow ara. E ow, bare, e cem opok asan eken apuamesfesen.

¹⁸Allaham atayi faknakut aeef, “E ow e doses ban asan bwemfiw asan opok.” Inim aeefen. E ow nat cam? Er e aramat ipic juw auwumatfes ow ara.

¹⁹E ow e aramat ipic basicim opok aemfesen. Inimas ar e asan bwemfiw asan opok aemfesen. Daram inimas apormom ara.