Read Central Asmat IBRANI 4 Bible Online

IBRANI 4 - Central Asmat bible

IBRANI 4

¹Bare, Allah, ow, e ases ban asan bafiw atayi aeefen. E atayi aeefas, daram daras ara. Inimas daram pimicim cowok ememamoc. E ca wun ow, e ses ban asan, bafiw opokasin.

²Ow e Atakam Akat e ow acacapiomfesen. Owam e Atakam Akat acacapiomforowos. E ow nat, e atakam basicim opok arawen. Ar e atakam jen desen ajifesen.

³Dar ara nat, asicimamom. Inimas dar, e Allah ses ban asan, afiwcomom. Er e Allah atakam jipu cowok ara: “Doram jak apepeemof, wunam atayi faknakut aeof. ‘E ow e doses ban asan bwemfiw asan opok.’ Inim aeof.” Allah inim aeefen. Ametnak ara, aramat ipic a capinmi akenemtiwkurumef, aram pok bakenem akarimtiwefen. E nat, aramat ipic e atakam atawefen.

⁴E Alkitab, e wun atakam, bare e Allah ses aanef jofay atakam ara: “Allah, pok takas bar enam ajiwar akenemapomkurumef, wunam bar cowok ses aanefen. E Alkitab inim aema.”

⁵E Alkitab atakamam: “E ow e doses ban asan bwemfiw asan opok.” Inim aema.

⁶Wun ow nat, e ses ban asan afiwcemes araman. Bapnak ara, ow, e Atakam Akat acacapiomfesen. E atakam jen ajifes ow nat, e atakam aopowfesen. Inimas ar e Allah ses ban asan bafiw opoken.

⁷Allah masirin, ow, e asan, wun jofay bafiw, atakam asakamtiwefen. E jofay, “wow jofay” arawen. Asep tahun ara, aramat ipicam, bi binip Daud atetamefen. Daud masirin, e atakam, surat aeapomefen. Er e jepen atawmom Alkitab atakam ara: “Car wow Allah atakam jen ajicokom, jen fak arapok.” E Alkitab inim aema.

⁸Yosua e ow e Allah ses ban asan atowomiwef ayaw, Allah, ow, wun jofay e asan bafiw, inim atakam bootaw opok ara.

⁹Inimas ara, Allah mamkawi ow, e ses ban asan afiwcemes. Er e Allah ses aanef inim cimin ara.

¹⁰Bare, Allah e pok takas akenemapomkurumef, aram ses aanefen. E Allah ses ban asan afiwces owam, e pok aemamesas takas, akarimtiwcemes. Aram ses aancemes.

¹¹Inimas ara, dar e Allah ses ban asan bafiw, jec awumoc. Bare, e bapnak ow, Allah atakam aopowfesen. Da nat, e ow inim cimin bwe arapok. Dar e ses ban asan bafiw opokasin.

¹²Bare, e Allah atakam, tetakayas inim cimin ara. Eram fak ara. Owec parang benamnuk epcom, bare foro opok inim. Allah atakam nat, foronakut ara. E atakam, ow ajak amannakutasam, e aramannakut bi binipasam, e wun amannakutasam, umuton aporomtamama. E atakam, ow ajak baserememasam, abi binipasam, akatnew, pwicaknew, inim aporomtamama.

¹³Ow, pok bwemcukumtiw asan opok. E Allah akenemapomefas takas, bare umuton ara. Aramat ipic eras takas aporkurumama. Daram e aemamomas takas atakam umuton e aramat ipic aotawcomom.

¹⁴Bare, darAllah atakam mamtaw tugas ipic awutut aomomamom. Er Yesus, Allah atiw ara. Aramat ipic, Allah bipu bemap, onam op aaptometef. Inimas ara, dar aramat ipic basicim bakorompim opok aemamoc.

¹⁵Bare, dar ow kumit ara. E darAllah atakam mamtaw tugas ipic awut inimas amsom. E Iblisam e aramat ipic aemporkurumef— e aemporforowas inim cimin ara. E Yesus nat, dosa bwem opokut aemef.

¹⁶Inimas ara, dar jak fak aememamoc. Dar e Allah aemapmar asanpu aapenmoc. E asan pwicak aemapcom jofay, aramat ipic serow ajiomcemarow. Aram asan akat mami atetamcemarow.