Read Central Asmat IBRANI 5 Bible Online

IBRANI 5 - Central Asmat bible

IBRANI 5

¹E Allah atakam mamtaw tugas ow awut takas, bare asmat ow ara. Allah e ow aporsipor aereremtawtotorma. E owam pok Allah aemtamames. Er e mami ow asan akat bomas ara. E Allah atakam mamtaw tugas ow awutam, pok Allah atetamames. Aram pok Allah acatitamames. Er dosa bakokoromosomas ara.

²E Allah atakam mamtaw tugas ow awutam, kumit asmat ow ara. Inimas ar e jen owam, e ajayemames owam, damesnakap aomames.

³Aram kumit asmat ow ara. Inimas e pok Allah acatitamamesas, mami ow dosa bakokoromosomas cowok opok. Eram arop dosa bakokoromosomas ara.

⁴Owam, Allah atakam mamtaw tugas ow awut, arma bwememem asan opok. E nat, Allah e ow eras memem ajatema— ar e Harun ajateefas inim cimin ara.

⁵Inimasam ara, Kristus, Allah atakam mamtaw tugas ipic awut, arma memem opok. Ar inim ownucur ipicut arma memem opok. E nat, Allah, atakam, e aramat pic aotawef: “Or dotiw ara. Dor wow oricipic aememamin.”

⁶Wunam, “Or Allah atakam mamtaw tugas ipic awut aatamememawarcemem— E Melkisedek aatamememawiri inim cimin ara.” Allah inim aeefen.

⁷Yesus awames capinmi aememef ara, ar janim Allah fak aanimefen. Janim aanimef ara, aram bwec manem epcom atakam afakayefen. Bare, Allah e aramat ipic bajortew fakas aomomefen. Er e aramat ipic damir bafasinas ara. Aram e Yesus tarowat ipic aporefen. Inimas ar e janim aanimefas jipu aemefen.

⁸Yesus e Allah atiw araman. E nat, ajurusemef ara, ar e Allah atakam ji bwe amememefen.

⁹Aram e Allah atakam ji aekurumefen. E atakam ji aekurumef masirin, aram e aratakam ji bwe ow takas abajortew ipic aememefen. E bajortewasam bakari opokas ara.

¹⁰Allaham, e Yesus, Allah atakam mamtaw tugas ipic awut atewemefen. Er Melkisedek inim cimin arawen.

¹¹Daram wun inim atakam arke awompom. E nat, car jen fak ow aememfokom. Inimas dar e atakam car bwemotawkurum asan opok.

¹²Car e atakam jen tarey ajifokom. Ca nat, e atakam ji aefokom ayaw, car e atakam mamememtam ow emeememfokom. E nat, car e Allah tonnakap atakamam mamememkurum opok. Ow masirin, e ton atakam car baomememtamcan. Bare, car amosnak bweman asan opok. Car aw cowok aanmokom inim cimin ara.

¹³E aw cowok aanmes ow, e akatasam, e pwicakasam, bare amsom opok. Ar esepen jiwi ara.

¹⁴E amosnak aanmes ow nat, ow awut ara. Aram akatas bwem amememfes. Inimas ar e akatasam, e pwicakasam, awcawor opok apormes.