Read Central Asmat IBRANI 6 Bible Online

IBRANI 6 - Central Asmat bible

IBRANI 6

¹Inimas ara, dar e Kristus tonnakap atakam momememawar arapok. Daram e aman atakamam mamememamoc. Bare, dar e atakam fwe car emcamememtamfenom. Inimas dar e atakam car momememtamawar arapok. Wun ow atakam, “Allah, e akatas bwem ow ajortewcema.” Inim aemes. Ca nat, dosa bak bapayem atakam camsom ara. Caram Allah basicim atakam camsom ara.

²Caram e bwi babwim atakamam, e ban, ow dam ton batatiw atakamam, camsom ara. Caram e damir ow aojaworsitces atakam camsom ara. Allah, ow adosa, atakam asakamtiwcema. E ow masirin, e afiwces asan inim aatamemapawarcemes. Caram inim atakam camsom ara.

³Bare, dar e aman atakamam mamememamoc. Allah akat aporcow, dar inimas cowok aemcomom.

⁴Ow Yesus akorompimfesnew, wun ow e ow e dosa bak bwemopamapom asan opok. E ow bare, e Atakam Akat, atakamnak aporefes. Aram e Allah atetamamaras atowomfes. Aram e Roh Kudus aomomfes. Aram e Allah atakam, akat aporfes. Aram e aenawcow jofay fakas aporfes. Aram wow, e Allah atiw salib os op arma aocatopomames inim cimin ara. Aram e aramat ipic, ow takas bipu, bifan afayomames.

⁷Bare, te, capinmi aneypwitamescema. Ar e wun capinmi, akatipic asirijiwcema. E capinmiam pok akan akat awanimapomcema. E pok anakat masirin, e capinmi mananasim ipic eras aras ara. Allaham, e capinmi, asan akat aomcema.

⁸E nat, e capinmi, fumin cowokam, fa epcom pok akan cowokam, awanimapomcow, er pwicak capinmi aemamescema. Allaham, e capinmi, asan pwicak aomcema. Owam, e capinmi pok akan, sos afamcemes.

⁹Dojowow akatonokom. Dar a atakam atawmom ara. E nat, dabi binip ara, car inim bakorompim opok ow awapokom ara. Car masirin, asan akat ow ara. Caram akatas camsom. Eras e ajoremamokomas ara.

¹⁰Bare, car Allah kerja aemtamawirukum. Caram, ow tarowat, asan akat aomawirukum. Caram wow, e ow, asan akat aomamokom. Eras e Allah damos ajiomamokom baporomtamas ara. Bare, Allah tarowat ipic ara. Inimas ar e aemamokomas binip manim opok aemcema.

¹¹Bare, car ow damos awutnakut ajiomamokom. Caram inimas, e asepnak jofay ajiwar, bwemawarji. Inimas aemcokom, Allah, e cajak aseremomamokomas, aomkurumceman. Daram car inimas bwem, jak aseremomamom.

¹²Daram car besem bemap pwicak aemom. Bare, wun ow Allah asicimames. Aram jak jirow aemames. Inimas e ow e Allah atayi aeefas atowopmes. Daram, car, e ow inim cimin bwem, jak aseremomamom.

¹³Bare, Allah atayi Abraham aeefen. Allaham, “Dor cowok awut ara. Wun ow takas kanim ara,” inim aporefen. Inimas aram atakam atawefen. “Dor e atayi aeminas jipu aemcimin. Pate opok cowok. Do awamcey ara.” Inim aeefen.

¹⁴Aramat ipic inim atayiam aeefen: “Dor asan akat or aomcimin. Doram orurpis ow arkenakut or atatamcimin.” Inim aeefen.

¹⁵E Abrahamam jak jirow aememefen. Inimas ar e Allah atayi aeefas, atowopefen.

¹⁶Asmat ow, ar ow kanim ara, inim aporcemes. Inimas ar atayi faknakut aeces, ar e awut ow juwas ajitewcemes. “Dor e atayi aeminas jipu aemcimin. Pate opok cowok. Inim ipic manmok tiwap.” Inim aecemes. Inimas wun ow, e atayi aecesas, atakam bwemamtaw asan opok.

¹⁷Allah e at aeefas biwosom, wunam ay at boe, bare opok cowok arawen. Aram e atayi aeefas atowomces ow, eras baporkurum, jak aseremomefen. Inimas aram, “Dor e atayi aeminas jipu aemcimin. Pate opok cowok. Dor awamcey ara.” Inim aeefen.

¹⁸Bare, Allah, jamnukas aemefen. E wunas, ar atayi aeef arawen. E wunas masirin, ar inim atakam aotawefen. “Dor e atayi aeminas jipu aemcimin. Pate opok cowok. Dor awamcey ara.” Inim aeefen. Aram e jamnukas bwemiwosom asan opok. Aram e jamnukas, suw atakam bwemtaw asan opok. Inimas ara, dar jak fak aememamom— e aramat ipicpu aapenfom ow ara. Dar aramat ipic da bajortew aapenfom. Bare, dar e jirey aemomas, ban fak bomosomawar, inim jak fak aememamom. Allah, e jirey aemomas dar batetam, inim atayi aeforow apormom ara.

¹⁹E jirey bweas, bare daras ara. Er dar jak faknak bemapomas ara. Eram atakamnak ara. Dar, e Allah onam op cem e amannak kamar aemapmar ipic, jirey aemom. E ipic, bare Allah ara.

²⁰Yesus e kamar bap emcafiwef. Ar asan akat dar bom afiwef. Aramat ipicam, e Melkisedek inim cimin aememcema. Ar Allah atakam mamtaw tugas ipic awut, aatamemawarcema.