Read Central Asmat IBRANI 7 Bible Online

IBRANI 7 - Central Asmat bible

IBRANI 7

¹E Melkisedek, e kota juwas Salem raja ipic arawen. Aram e opnakut aemapmar Allah, atakam mamtaw tugas ipic arawen. Abraham e wun raja ow acajimirefen. Acajimiref masirin, aofasiefen. E Melkisedekam, Allah asan akat e Abaraham batetam, janim aanimefen.

²E Abraham, e atowomef pok takas, persepuluhan, e Melkisedek atetamefen. E juwas “Melkisedek” atakam juw buwumtew, bare “raja ipic tarowat” arawen. Aramat ipicam Salem raja ipic arawen. Eram atakam juw buwumtew, “pay bwe raja ipic” arawen.

³E Alkitab, e Melkisedek aricipic juwasam, arosowoc juwasam, arafas juwasam, bajucucumir opok. E Alkitabam e aramat ipic ajisamesef jofayam, e damir aafef jofayam, atakam opok. Aramat ipic, Allah atakam mamtaw tugas ipic aatamememawarcema inim cimin ara. Inimas aram Allah atiw inim cimin ara.

⁴E Melkisedek, bare ow awutnakut ara. E darakut Abrahamam, e ces aetawef pok, persepuluhan, e ipic sey aseyeefen.

⁵E wun Lewi urpis ow, Allah atakam mamtaw tugas ow aememfesen. E Allah Jirmec atakam, “E ow, e mami ow apok, persepuluhan batewetces,” Inim aema. E mami ow nat, e Lewi urpis ajowow arawen. Aram e Abraham urpis arawen.

⁶E Melkisedekam, Allah atakam mamtaw tugas ow arurpis ipic opok. E nat, e Melkisedek e Abraham pok, persepuluhan atewetefen. E Abraham, e Allah atayi aeefas aomomef ipic ara. E nat, e Melkisedek, Allah e Abraham asan akat bom, janim aanimefen.

⁷E Allah asan akat bom janim manimtam ipic, bare ow awut ara. E asan akat aemapcow ipic masirin, kanim inim ara.

⁸E Allah atakam mamtaw tugas ow, bare persepuluhan atatfesen. E nat, e ow, damir epcom ow arawen. E Melkisedekam persepuluhan atewetefen. E nat, e Alkitab atakam, “E Melkisedek jiwne ipic ara,” inim aema.

⁹Bare, e Abraham, e Melkisedek biamnuk aemamtewfes ara, e Lewi bajisames opoka. Ar e arakut Abraham, e adam aman aemamesef inim cimin ara. Inimas e Abraham e persepuluhan atetamef ara, e Lewiam persepuluhan atetamef inim cimin ara. (E nat, e Lewi urpis, e persepuluhan atatmes ow ara.)

¹¹Bare, e Lewi urpis, Allah atakam mamtaw tugas ow aememfesen. Allaham, e aJirmec asmat ow atatitamef ara, ar e Lewi urpis, e Jirmec atakam botawawar ow, atewemefen. E Lewi urpisam, Allah atakam mamtaw tugas ow anakat aememfes ayaw, bare Allah, wun atakam ar mamtaw tugas ipic, botewem atakam opok aemefen. E nat, ar wun ipic botewem atakam aotawefen. E ipic, Harun inim cimin opoken. Ar Melkisedek inim cimin arawen.

¹²Allah, ay atakam ar mamtaw tugas ipic atewemcownew, aram ay jirmec asmat ow atetamcemaren.

¹³A atakam atawmar ay atakam mamtaw tugas ipic, bare daTuhan ara. E nat, aramat ipic wun samat ipic ara. E ipic asamat ow, bare Allah atakam mamtaw tugas ow memem opok cowok arawen. E ow, e Allah pok jis bafamtam jowsepu tugas bwem, bare opok cowok arawen.

¹⁴E daTuhan, bare Yehuda samat ipic ara. Musaam, e Yehuda samat ow, Allah atakam mamtaw tugas ow memem, inim atakam opok arawen. Ow takas inimas amsom ara.

¹⁵E atakam atawmomas, bare umutonnak ara: Wun Allah atakam mamtaw tugas ipic ajitemef. E ipic, bare Melkisedek inim cimin ara.

¹⁶E ipic, Allah atakam mamtaw tugas ipic aememefas, bare asmat ow jirmec jipuas opok. Eram asmat ow atakam jipuas opok. Aramat ipic nat jiwne batamemawar fakas epcom. Inimas ar Allah atakam mamtaw tugas ipic aememef.

¹⁷Er e Alkitab atakam jipu ara: “Or e Melkisedek inim cimin, Allah atakam mamtaw tugas ipic, aatamememawarcemem.” E Alkitab inim aema.

¹⁸E tarey jirmec, bare kumitas ara. Eram desenas ara. Inimas Allah e jirmec akarimtiwef.

¹⁹E Musa tulis aeapomef Jirmec, ow, tarowatnak, bwememapomkurum asan opok. Er pwicak inim. E nat, Allah, akat jirey bweas, asmat ow atetamefen. Eras dar Allah bamesomas ara.

²⁰Allah eras aemef ara, aram atayi faknakut aeefen. “E atayi aeminas jipu aemcimin. Pate opok cowok. Dor awamcey ara.” Inim aeefen. E nat, ar e Lewi urpis ow, atakam a mamtaw tugas ow atawemef ara, ar inim atayi faknakut bwe opoken.

²¹Bare, Allah atayi faknakut aeef, wunam ar Yesus, atakam a mamtaw tugas ipic atewemefen. Aram atakam Yesus aotawefen: “Tuhan atayi faknakut aeef. Aram ay bi binip bocecerem opok aemcema. Aratakam: ‘Or Allah atakam mamtaw tugas ipic aatamememawarcemem.’ Tuhan inim aema.” Inim aeefen.

²²Inimas ara, e Allah e ay atayi aeefas, akat ara. E tarey atayi aeefas, bare pwicak inim. Yesusam, e ay atayias jipu bwemkurum ipic aememama.

²³Wunam, e bap Allah atakam mamtaw tugas ow damir epcom ow arawen. Inimas ar e tugas batamemawar opoken.

²⁴E Yesus nat, jiwne aatamemawarcema. Inimas e Yesus e Allah atakam mamtaw tugas bakari opok aemcema.

²⁵Bare, aramat ipic jiwne aatamemawarcema. Aram ow janim Allah aatamanimtamawarma. Inimas ara, ow e aramat ipic aemefas aporces, wunam ar Allah amesomces, bare e aramat ipic, e ow ajortewkurumcema. Aram inimas bwem fakas aomomama.

²⁶Inim Allah atakam mamtaw tugas ipic awut, bare daras araman. Aramat ipic bare tarowat ipic ara. Aram pwicakas bwem amsom opok. Aram jursumec opok. Aramat ipic aropas ara. Dosa ow masirin, aropas ara. Allaham e aramat ipic e onam opnakut asan akat atowotometef.

²⁷Aramat ipic, e wun Allah atakam mamtaw tugas ow awut, inim cimin opok. E ow, pok join join Allah acatitama aemes. Er e arop dosa bakokoromosomas ara. E Yesus nat, pok cowoknakap Allah atetamef. Eram boemas opok. Eras, e aramat ipic e salib os op damir aafefas ara.

²⁸E Musa surat aeapomef Jirmec, kumit asmat ow, Allah atakam mamtaw tugas ow awut memem, atakam ara. Asep ara nat, Allah atayi faknakut aeef, wunam ar e atiw, e atakam ar mamtaw tugas ipic awut anakatnakut batamememawar, atewemefen.