Read Central Asmat IBRANI 8 Bible Online

IBRANI 8 - Central Asmat bible

IBRANI 8

¹E atawmom atakam fwe ara: bare, dar inim Allah atakam mamtaw tugas ipic awut awompom. E akatnakut Allah, e onam op aemapma. E darAllah atakam mamtaw tugas ipic awutam e Allah ban bo jamam aemapma.

²Aramat ipic, Allah atakam mamtaw tugas ipic awut, inim tugas aemama. Ar e onam op Allah cem e karownak asan, tugas aemama. E cem, bare anakatas ara. Asmat ow e cem bweapom opok. Bare, Tuhan e cem aeapomef.

³Allah, e atakam a mamtaw tugas ow takas, pok a batetamam, pok a bacatitamam, inim atakam atawefen. Inimas ara, e darAllah atakam mamtaw tugas ipic, pok atetamcemar araman.

⁴Aramat ipic awames capinmi aememamar ayaw, ar Allah atakam mamtaw tugas ipic bwememem asan opok. Bare, awames capinmi, Allah atakam mamtaw tugas ow, pok, e Musa tulis aeapomef Jirmec jipu, atetamames.

⁵E ow e aemamesas nat, anakat opok. E anakatas, bare onam op ara. Ar masirin, e anakatas jipu inim cimin aemames. Er e Musa aemefas inim cimin ara. Aramat ipic e picin sembahyang cem bweapom aememef ara, Allah, atakam e aramat ipic aotawefen: “E sikon op aememfem, dor e cem, cimin aetamfin. Bare, e cem aeapomcokom, e cimin aetamfinas jipu cowok mamemkurumey.” Inim aeefen.

⁶Bare, Allah e ar atakam mamtaw tugas ow, pwicak inim pok bwem atewemefen. Ar nat, e Yesus, akatnakutas bwem atewemefen. Inimas e Allah bap atayi aeefasam, bare pwicak inim. E Yesus nat, e Allah ay atayi aeefas, atakam asmat ow ajomattamefen. E Allaham e aemcowas akatnakut, atayi aeefen. Inimas e atayi akat ara.

⁷E bap atayi aeefas akatnak ayaw, bare Allah ay atayi bwe opok ara.

⁸Allah, e arow e pwicakas aemfes aporefen. Ar masirin, inim atakam atawefen: “E Tuhan atakam: ‘E aenawcow jofay, dor ay atayi, e Israel owam, e Yehuda samat owam, aecimin.

⁹E atayi aeceyas, bare e bap atayi aeofas inim cimin opok. Bap ara, dor e ow arafasut ban fe ajimocenof. Dor masirin, e ow, e Mesir capinmi ajaromisof. E ow nat, e atayi aeofas ji bwe opok aemfes. Inimas ara, dor e ow manmok botiwem opok aemof.’ Tuhan inim aema.

¹⁰E Tuhan masirin, ‘E jofay aenawcow ara, dor inim atayi e Israel ow aecimin: Dor e dojirmec binip e ow atetamcimin. Doram e dojirmec e ow jak aman atewapomcimin. Dor e ow arAllah aememcimin. E owam dorow aememcemes.

¹¹Bare, e ow kanim takasam, e ow awut takasam, ajamkawicemenes. Inimas e Israel ow, e ajo capinmi ow, atakam momememtam opok aemcemes. Aram, “Tuhan mamkawiey,” inim atakam e ajowow bootaw opok aemcemes.

¹²E ow, pwicakas aemfes. Do nat, e ow serow aomcimin. Doram e ow adosa, binip bocomom opok aemcimin.’ Tuhan inim aema.” Allah inim aeefen.

¹³E aramat ipic ay atayias atakam atawef ara, ar e bap atayi, tarey atayi aemapomef. Bare, e tareyas akmat aemapma. E tarey atayi apakapioscow jofayam, bare sotop ara.