Read Central Asmat IBRANI 9 Bible Online

IBRANI 9 - Central Asmat bible

IBRANI 9

¹E bap atayi, e Allah e basicimji aeremtitamefas atakam ara. Eram Allah basicim cem atakam ara. E cem nat, awames capinmias ara.

²Ow, picin sembahyang cem aeapomfesen. E cesen kamar juwas “Karow Asan” arawen. E kamar aman, pelita asanam, mejaam, Allah bipu batatiw amosam, aemapfesen.

³E cem aman, wun kamar aemapefen. E kamar, picin jimasap e asep aemapefen. E kamar juwas “Karownak Asan” arawen.

⁴E kamar aman, emas jowseam, e atayi atakam epcom petiam, aeapfesen. E jowse, pinim akat pok, Allah bafamtam asan arawen. E peti picinam emas arawen. E peti emas masirin, e emas co pokam, e Harun onok pokam, e ek petam jamnukam, aemamesfesen. E emas co pok, amos pok juwas manna epcom arawen. Bap ara, e onok pok, akan ajitefen. E ek jamnuk masirin, e atayi atakam asuk wow epcom arawen.

⁵E peti op, malaikat ēco jamnuk, aemtepfesen. E ēco, e Allah akatnakutas, manmok atiwnemfesen. E ēco jaroam, e dosa bakokoros asan, desen apwirimopfesen. Da nat, wow e atakam bwemotawkurum asan opok.

⁶Ow, e bap picin sembahyang cem inimas cowok akenemfesen. E Allah atakam mamtaw tugas owam, join join, e cesen kamar, pok Allah bwemtam, afiwa aecemes.

⁷E Allah atakam mamtaw tugas ipic awut nat, e tahunin tahunin, bar cowok, e aman kamar afiwa aecema. Aram es atowomiwa aecema. Wunam, e es Allah atetama aecema. Er arop dosa bakokoromosomas ara. Eram e mami ow e amsom opok aemtotorfes dosa bakokoromosomas ara.

⁸Dar inimas takas apormom, wunam e Roh Kudus inim atakam umuton aotawmarow: E bap picin sembahyang cem inim aemamesawiri ara, mami ow e Karownak Asan bwemfiw asan opok.

⁹Bare, ametnak e aemawirisas, wow, atakam dar aporomtamamarow. E atakam ara: E Allah basicim ow, pok Allah atatamawiris. Aram pok Allah acatitamawiris. E nat, eras bwem, e ow, ow tarowat bwememapom asan opok.

¹⁰Eras bwem nat, amos pokam, bwiam, pok, bwi bacicikimas jukpiriam, atakam ara. Eras bwem, bare mami jirmec cowok ara. Allah masirin, e ayas atetamef ara, ar e tareyas akarimtiwef.

¹¹E nat, Kristus emeenawef. Ar Allah atakam mamtaw tugas ipic awut ara. Ar e aenawef akatas, atakam atawma. Aram picin sembahyang cem aman, pok aemama. E cem, bare awutut ara. Aram akatnak ara. Asmat owam e cem bweapom opok. E cemam awames capinmias opok. E bap cem nat, kanim inim. Eram pwicak inim.

¹²Kristus nat, e Karow Asan, bar cowoknakap afiwef. Afiwef ara, aramat ipic kambing esnew, sapi esnew, batowmiw opok. Ar e ares cowok atowomiwef. Aram ajortewforow. Eras dar jiwne batamemawaras ara.

¹³Ow karowas aemces, Allah atakam mamtaw tugas ow, kambing esnew, sapi jipic esnew, jis afamfes ay sapi penas jowmecnew, inim pok e ow dam ton atuturumapomces, ar e ow e karowas akarimtitamcemes.

¹⁴Eras nat, kanimas ara. E Kristus es nat, awutnakutas aomamarow. E Roh Kudus, bare jiwne aatamemawarma. Aram e Kristus akac aomefen. Inimas Kristus, e adam Allah atetamefen. E atetamefas, anakatnakutas ara. Bare, e akat aemporawirumas, damir epcomas cowok ara. Kristus es nat, e damiras asurumtamamarow. E aresam, e dajak aman atakam pwicakas, akokoromosomtamamarow. Inimas dar, e jiwne Allah, kerja bwemtam ara.

¹⁵Bare, e Kristus inimas aemefen. Inimas ara, aramat ipic e ay atayi atakam bajomattam ipic aememefen. Inimas e Allah ajateef ow, asan akat aatamemapawarcemes. Er e Allah atakam aotawefas jipu ara. Ow e bap atayi aman aemapawiris ara, ar dosa aemawiris. E nat, jipic cowok damir aafef. E damir aafefas, e dosa basurumtamas ara. Er e ow, e asan akat batamemapawaras ara.

¹⁶Asmat owam e damir aafcesas, atayi aecemes. “Dor damir aafcey, e dopok inim ow sey mamseyetamtotorey.” Inim aecemes. E nat, e sey baseyetam ow, e ow damir opok apoces, ar e pok sey bwemseyetam asan opok. E ow damirnak aporces, ar e apok sey aseyetamcemes.

¹⁷Bare, e atayi bwe ow damir aafces, wun ow e atayi ji acowoycemes. E nat, e atayi bwe ow tetakay aememces, wun ow e atayi ji bwemcowoy asan opok.

¹⁸Inimas ara, Allah e bap atayi aeef ara, aram es batutumtiw jirmec ajirimefen.

¹⁹E Musa masirin, e Allah jirmec aporsipor, atakam, e ow takas aotawkurumef ara, ar sapi jiwi esam, kambing jipic esam, atewefen. Wunam ar bwi e es aartamefen. Ar masirin, fir inim cimin pok juwas “hisop” atewefen. Aram domba fin esakam e hisop bip afirkikimapomefen. Wunam ar e es e Jirmec epcom suratam, e ow takas adamam, atuturumapomefen.

²⁰Aramat ipic masirin, “A es a Allah atayi aemaras, anakatas bemapomas ara. Allah, car e atakam ji bwe, jirmec car ajirimaman.” Inim aeefen.

²¹Aramat ipic masirin, es, e picin sembahyang cemam, e cem aman Allah basicim pokam, inim cimin atuturumapomefen.

²²E Jirmec aman e Allah atakam mamtaw tugas ow, es arkenakut atuturumapomcemes. Eras, e pok, akat bemapomas ara. Allaham es opok aporcow, ar dosa bwemkokoromosom asan opok.

²³E pok nat, e onam op anakatas inim cimin ara. Owam, awames capinmi pok, akat bemapom akat aporces, ar es inim cowok atuturumapomcemes araman. E binatang es nat, pwicak inim. E binatang es e onam opas, akat bwememapom asan opok. Akatnakutas, Allah bacatitam nat, e onam opas, akat bemapomas ara.

²⁴Bare, Kristus, e asmat ow akenemapomfes Karow Asan, bafiw opok aemef. E asan, bare e onam op Karow Asan anakat inim cimin ara. Aramat ipic nat, e onam op asan afiwef. Wow ara, aramat ipic e Allah bipu aemapma. Aram janim Allah dar aanimtamamarow.

²⁵E Allah atakam mamtaw tugas ipic awut, tahunin tahunin e Karow Asan afiwa aecema. Aram arop es batowomiw opok. Ar wun pok es atowomiwa aecema. Kristus nat, e adam, Allah atetamef ara, ar e asan bofiwa bofiwa baji opok.

²⁶Aramat ipic inimas aemef ayaw, ar e pokin pokin akenemaompef jofayam, wow ajiwaram, aojurusema aojurusema aeef. Aramat ipic nat, a aemapmom asepnak jofay, ar cowokut ajisemef. Aram dosa biwosom damir arma aafef.

²⁷Bare, ow takas, damir cowokut aafcemes. Damir aafces masirin, Allah, e ow adosa, atakam asakamtiwcema.

²⁸Kristusam inim cowok aemef. Aramat ipic e adam Allah atetamef. Ar ow arke adosa bakokoromosom, damir bar cowokut aafef. Aram aojisemcema. E nat, ar dosa bemosom bojisem opok. Ar e amanmok afemes ow bajortew aojisemcema.