Read Central Asmat YAKOBUS 1 Bible Online

YAKOBUS 1 - Central Asmat bible

YAKOBUS 1

¹Dor Yakobus ara. Dor Allaham, Tuhan Yesus Kristusam, akerja bwemtam ipic ara. Dor e car apacayosfokom samat dua belas ajiwar, selamat atakam aotawmin.

²Dojowow akatonokom. Car ajurusemcokomas jukpiri aman ara, jak akat mamememey.

³E car Allah basicimnak epen bwemporas, jak jirow car aemapomceman.

⁴Ca nat, jak jirow mamememkurumawarey. Inimas car sur aotemkurumcomokom inim cimin ara. Caram ow tarowat aememcomokom. Caram desen memem opok aememcomokom.

⁵Bare, ow abi binip umutonnak opok aporces, aram janim Allah baanimces. Allah masirin, bi binip umuton atetamcema. Bare, aramat ipic, asan akat, ow takas atetamcema. Aram ow cemew bat opok aemcema.

⁶Ca nat, janim aanimcokom, Allah mamsicimkurumey. Bi binip arke arapok. E bi binip arke ow, e jicupum wa inim cimin ara. Fo e wa amerfufumsemcema. Aram e wa bwi op awaramtomettemcema.

⁷E ow, “Tuhan, e janim aanimceyas aemtamceman,” inim bi binip opok ara.

⁸E ow, bare, bi binip arke ara. Aram e aemcesas takas, atakam bwemsakamtiw asan opok.

⁹Bare, e wun dajowow pok opok ow ara. Allah nat, e ow asan akat aomcow, jak akat baememces.

¹⁰Pok awut ow, fumin ciwew inim cimin apakapioscemes. E wun dajowowam pok awut ara. Inimas Allah e ow ajumnemcow, e ow jak akat baememces.

¹¹Bare, jopok op atometapcema. Aram amop anemcema. Ar masirin, e fumin asamtiwcema. E fumin ciwewam akokoysayneycema. E pok awut owam e pok aemamesas aman, inim cimin apakapioscemes.

¹²Ow ajurusemces, wunam inim aakajiremces, bare asan akat aememcemes. Allah e ow a basicimnak aporcow, aram jiwnenak e ow atetamcema. Aram e jiwnenak, e adamos ajiemames ow batetam, atayi aeef.

¹³Ow ajurusemces, wunam pwicakas bwem bi binip aceceremces, aram, “Allah dor pwicakas bwem acajijimtawman,” inim atakam bataw arapok. Ow, Allah pwicakas bwem, bwemcajijimtaw asan opok. Allaham ow pwicakas bwem, bwemcajijimtaw asan opok.

¹⁴Ow nat, pwicakas bwem jak arma asinomces, e ajak basinomas, e ow e pwicakas bwem, inim acajijimtawcema. E ajak basinomas, e ow, jak aseseremtawcema. Aram e ow akekemtawcema inim cimin ara.

¹⁵E ow e pwicakas jak basinom awutut aemces, ar dosa aemcemes. Aram dosa aemkurumces, bare damir aafcemes.

¹⁶Dojowow akatonokom. Dor damos car ajiomamin. Ow tot car bot arapok.

¹⁷Allah e onam op sereas akenemapomefen. E atewmom akatas takasam, e atewmom anakatas takasam, bare aramat ipic atetamamarow. Aramat ipic join join fafaymar, akat aemama. Aram da bak bwempayem asan opok. Aram da jiwic aman bwemtewem asan opok.

¹⁸Ar dar asan akatnak bemap, wunam e wun akenemapomefas asan pwicak inim bemap, akat aemefen. Inimas dar aratakamnak jen ajifom, aramat ipic dar atiperes atewemforow.

¹⁹Dojowow akatonokom. Dor damos car ajiomamin. Bare, ow takas jen sarim bajices. E nat, aram atakam botaw sarim arapok. Aram jak amop sarim arapok.

²⁰Ow jak amop aememces, ar Allah akat apormaras jipu bwem opok aemcemes.

²¹Inimas car e jursumecas takasam, e jokmenas arkenakutam, mamiwosomkurumey. Caram Allah e cajak aman atewapomef atakam, ji mamekurumey. E atakam car bajortewas ara.

²²Bare, e atakam ji mameey. Jen desen baji arapok. Car tot carma botasin.

²³Wun ow e atakam jen ajicemes. E nat, ar e atakam ji bwe opok ara. E ow, e cermin jipir aporcemes ow inim cimin ara.

²⁴Ar e cermin e ajipir aporcemes. Ar masirin, aojisoscemes. Aram e jipir aporcemes, wunam binip aanimemcemes.

²⁵E jirmec anakat nat, ow asurumtamama inim cimin ara. Wun ow e jirmec aoworporkurumames. Bare, ar e jirmec aatamoworpormes. Aram e jen ajifesas binip manim opok aemames. Aram e jirmec ji aemes. E ow, bare, asan akat aemapmes.

²⁶Ow bi binip aceceremtotorces, “Dor Allah mamkawi fak ara,” inim aetotorces, e nat, e komen pimicim opok aemces, bare ar tot arma aotcemes. E ar Allah mamkawiasam, bare desenas ara.

²⁷Ow, pok, e asan pwicak aemapmes manma jiwiam, fwisma cepesam, afafaytamces, wunam ar awames capinmias mamkawi opok aemces, bare Allah e ow ar mamkawi anakat aporcema.