Read Central Asmat YAKOBUS 2 Bible Online

YAKOBUS 2 - Central Asmat bible

YAKOBUS 2

¹Dojowow akatonokom. E Yesus Kristus daTuhan akatnakut ara. Caram aramat ipic asicimamokom. Inimas car e wun ow asan akat momom, wunam e wun ow asan pwicak momom, inim arapok.

²Ow jamnuk e casembahyang cem afiwemcemes openow. E wun ipic emas cincin e abanef aomomcema. E apakaianam, bare akatipic aomomcema. E wun ipic masirin, e apakaian sakarnakut ara.

³Car e pakaian akatipic epcom ipic asicimcomokom openow. Car atakam, “Or a asan akatipic emapey,” inim aecomokom openow. Car masirin, atakam e pakaian sakar epcom ipic, “Or erasan ememey,” inim aecokomnew, “Or a dobweypu baneyapey,” inim aecokomnew,

⁴bare car samatam aambwiemcomokom ara. Car, ow akatnew, pwicaknew, inim atakam basakamtiw ow aememcomokom. E nat, car bi binip pwicak ow ara.

⁵Dojowow akatonokom. Dor damos car ajiomamin. Caram a atakam jen pajiey. Allah e pok opok ow a basicimnak aereremtawef. Aram e ow, e aPemerintah Asan bafiw aereremtawef. Ar e aramat ipic damos ajiemames ow, e asan bafiw, atayi aeef.

⁶Ca nat, e pok opok ow bifan afayomamokom. E nat, e bwey aopowman ow cam? E salah atakam basakamtiw ow bipu acajijimtawman ow cam? Bare, er e pok awut ow araman.

⁷Yesus Kristus car aomomaman. E pok awut ow nat, e aramat ipic juwas akat cemew aatmes.

⁸Bare, e awut jirmec atakam, “Or damos orma ajiomamem. Oram e wun asmat ow inim damos mamjiomey.” E Alkitab inim aema. Car e jirmec ji aecokom, bare akatas aemcomokom.

⁹Ca nat, wun ow damos ajiomcokom, wunam wun ow bifan afayomcokom, bare dosa aemcomokom. Allaham, “Bare, car e doJirmec bopow ow awamcokom ara,” inim aeceman.

¹⁰Ow e jirmec arke ji aefesnew, e nat jirmec cowoknakap aopowfesnew, bare ar e jirmec bopownak aemfes.

¹¹Allah atakam, “Cen cemen osom ecokom.” Inim aeefen. E aramat ipicam, “Daw sanaw etiwcokom.” Inim aeefen. Car cen cemen osom opok aefokomnew, e nat car daw sanaw aetiwfokomnew, bare car jirmec bopow ow araman.

¹²E Allah jirmec, car asurumtamaman inim cimin ara. Aramat ipicam, e aemamokomas e jirmec jipu aranew, e jirmec jipu opoknew, inim atakam asakamtiwcema. Inimas ara, e atakam aotawmokomasam, e pok aemamokomasam, pimicima.

¹³E salah atakam basakamtiw ipic, e kawey ow serow bajiom opok ow, serow opok ajiomcema. Da nat, ow serow ajiomcom, dar e salah atakam basakamtiwas, omar opok aemcomom.

¹⁴Dojowow akatonokom. Ow atakam aotawtotorces, “Dor Yesus asicimamin,” inim aetotorces, e nat, e ow akatas jipu bwem opok aemces, e ow e basicimas, bare desenas ara. Allaham inim basicim atakam ow, bajortew opok aemcema.

¹⁵E wun Yesus mamkawi ow pakaian opok aememamesnew, amosto aememamesnew,

¹⁶wunam ow atakam aotawces, “Asan akat baysosey. Dam jufuam bemap arapok. Jakam banapitapey,” inim aeces, e nat ar e ow pok batetam opok aemces, e aratakam bare desenas ara.

¹⁷Ow atakam aotawtotorces, “Dor Yesus asicimamin,” inim aetotorces, wunam ar akatas jipu bwem opok aemces, e ow abasicimas, bare anakat opok.

¹⁸Wun ow nat, inim atakam aotawcemes openow: “Wun ow Yesus asicimames. Wun ow masirin, akatas jipu aemames.” Inim aecemes openow. E nat, or Yesus basicim, wunam akatas bwem opok, inim baporomtamcan. Bare or inimas bwemem asan opok. Do nat, e akat aemaminas, dor Yesus basicim ipic ara, inimas or aporomtamcimin.

¹⁹Or, “Allah cowokut ara,” inim atakam asicimamem. Bare, akat ara. E nat, e dat takasam inim atakam asicimames. Ar masirin, omar dam tetete aemames.

²⁰Bare, or bi binip opok ara. Ow, “Dor Yesus asicimamin,” inim aeces, e nat ar akatas bwem opok aemces, e basicimas bare desenas ara. Or inim atakam jen bajikurum akat open?

²¹E darakut Abraham aemefas, bi binip mamceceremey. Aramat ipic, e atiw Ishak, e jowse op, Allah jis bafamtam, aememefen. Allah e aemefas aporef, wunam, “E Abraham, jipic tarowat ara,” inim atakam asakamtiwefen.

²²E Abraham e Allah basicim cowok opok. Aram e Allah jirmec ajirimefas jipu aeefen. E aemefas, ar Allah asicimkurumef aporomtamefen. Oram inimas apormem openow.

²³Bare, e Alkitab atakam, “E Abraham, e Allah asicimefen. Inimas Allah, aramat ipic jipic tarowat ara, inim atakam asakamtiwefen.” Inim aema. E Abraham aemefas, bare e Alkitab atakam jipu ara. E Allaham, “Abraham, bare dojowow ipic ara,” inim aeefen.

²⁴Ow Allah asicimces cowok, wunam akatas jipu bwem opok aemces, Allah e ow, ow tarowat ara, inim atakam basakamtiw opok aemcema. E nat, ow Allah asicimces, wunam akatas aemces, Allah e ow, ow tarowat ara, inim atakam asakamtiwcema. Caram inimas apormokom ara.

²⁵E Rahab aemefasam bi binip memceceremey. Bap ara, ar werey cowoc aememefen. E nat, ar akatas jipu aemef, wunam Allah, ar cowoc tarowat ara, inim atakam asakamtiwefen. E cowoc, bare e Isreal ow jirmec ajirimfes ow, e acem atowomiwefen. Ar masirin, e ow wun bokotpu ajisomosomefen. (E jokmen ow, e ow bacatiwasin.)

²⁶E anakat ipic asufiscow, e asmat ipic bare damir ara. Owam Allah asicimces, wunam akatas jipu bwem opok aemces, bare e ow abasicimas anakat opok. E abasicimas damir inim cimin ara.