Read Central Asmat YAKOBUS 3 Bible Online

YAKOBUS 3 - Central Asmat bible

YAKOBUS 3

¹Dojowow akatonokom. Car mamememtam memem ow, bare arke arapok. E awapom mamememtam ow pwicakas aemcom, Allah siksa awut inim dar aemcemarow. A nat, e mami ow siksa kanim inim aemcema.

²Bare, dar takas pwicakas aemcomom. Ow salah atakam botaw opok aeces, ar ow tarowatnakut ara. Aram jak faknak ow ara.

³Bare, dar sey bini, kuda bweyof aman atewapomcomom. Inimas dar e kuda e dajirmec ji bwe aomcomom. E Kudaam, e jirmec ajirimcom asan takas, ajisoscema.

⁴Wunam, kapal bi binip mamceceremey. Bare, ar awutut ara. E fo awutam e kapal ajujumcema. E nat, e cuji mam ipic, kemudi kanim, e kapal aamkurumcema.

⁵Bare, asmat komenam inim cimin ara. Ar kanimnakap ara. E nat, ar atakam awutut atawcema. E wasan, bare os awutnakut ara. E nat, jismak komen kanim, os awut afamcema.

⁶E dakomen, bare jismak cimin ara. Ar jokmennakut ara. E dakomen e dadam pomanas ara. Ar e dadam a takas, pwicak aemapomama. Bare, Iblis e jismak asan ipic ara. Ar e dakomen, e atakam pwicak, aomama. Inimas e dakomen, a capinmi ow takas acucumama.

⁷Asmat, e wasan cīncīn binatangam, e cīncīn sokam, e aameskujarmes cīncīn binatangam, e cīncīn enamam, aomomkurumames. Asmatam e cīncīnās takas emcakumimosomef.

⁸Asmat nat, e akomen arma bwemomom asan opok. E komen, bare jokmenas ara. Ow e jokmenas bwemkarim asan opok. E komen, bare jokmen amer sis inim awcawor ara. Er damiras ara.

⁹A dakomen daram Tuhan asicimamom. Tuhan, bare daricipic ara. E dakomenam cemew atakam asmat ow aotawmom. Allah nat, e asmat ow, abi cowok akenemapomef.

¹⁰E basicim atakamam, e cemew atakamam, e bweyof cowok afisma. Dojowow akatonokom. Inimas pwicakut ara.

¹¹Daram bwi afwisemcom, e bwi, akatam, pwicakam, opok. E bwi aporsipor akatnew, pwicaknew, er ara.

¹²Dojowow akatonokom. Os juwas “arā,” eke juwas “saitun” bwempetep asan opok. Anggur sinimam, arā eke bwempetep asan opok. Bwi jema, bwi akat, bwemfimisim asan opok.

¹³E ca wun ow, bi binip umutonam, camsom awutam, inim ow aememamokom openow. Bare, inim ow, akatas jipu baemces. E aemamesas takas, e bi binip umutonas jipu baemces. Aram arma batawsicim arapok. Bare, eras takas aemces, aram bi binip umutonam, amsom awutam, inim ow memem aporomtamcemes.

¹⁴E nat, car icim afesmokomnew, bifan afayomamokomnew, car capok cowok aporopmokomnew, bare carma batawsicim arapok. Caram: “Dar bi binip umuton ara,” inim suw atakam bataw arapok.

¹⁵Inim “bi binip umutonas,” bare Allah atetamamaras opok. Er awames capinmias ara. Er asmat ow jak basinomas ara. Eram datas ara.

¹⁶E ow icim afesmes asanam, e ow apok cowok aporopmes asanam, bare e asan bacucum awut asan ara. Eram pwicakas jukpiri asan ara.

¹⁷E nat, e Allah atetamamar bi binip umutonas, bare jursumec opokas ara. Aram ow damos mamjiomas ara. Aram damesnakapas ara. Aram jen opokas opok. Aram ow serow awutas ara. Aram akatas jipu bwem akut ara. Aram tarowatas jipu bwem ara. Aram pir bweas opok ara. Inim ara.

¹⁸E ow damos mamjiom jak baseremem ow, ow damos aamjiomces, aram ow tarowat aememcemes.