Read Central Asmat YAKOBUS 4 Bible Online

YAKOBUS 4 - Central Asmat bible

YAKOBUS 4

¹E caramaman owen aamomokomam, atakam aamtawmokomam, ucimasam? Er e cajak basinom awutas jipu araman.

²Car pok batewet aemamokom. E nat, car e pok bwemtewet asan opok. Inimas car apok boportewet, ow bacatiw aememamokom. Caram kawey pok jak asinomamokom. E nat, car e pok bwemtewet asan opok. Inimas car atakam aamtawmokomam, owen aamomokomam, ara. Car janim Allah manim opok. Inimas car desen kus awamcokom ara.

³Car janim Allah aanimamokom E nat, car janim pwicak aanimamokom. Car e carop jak basinomas cowok jipu janim aanimamokom. Inimas car eras bwemtewet asan opok.

⁴Car Allah arow ara. Inimas car awames capinmias jak asinomamokom, bare car manam pimar ow awcawor ara. Car a capinmias jak asinomamokomnew, bare car Allah bifan afayomamokom ara. Car Inimas camsom opoknew? A capinmi jak asinomames ow, Allah bifan afayomames.

⁵E Alkitab atakam: “Allah e aRoh e dajak aman atewapomtamtotorforow. Dar masirin, a capinmias jak asinomcomnew, e Roh icim awut afescema.” Inim aema. Caram: “E atakam, bare desen atakam ara,” inim bi binip aceceremamokomnew?

⁶Bare, Allah, e pwicak jak basinomas, inim botpem fakas awutut atetamamarow. E Alkitab inim atakam ara: “Allah e arma atawsicimames ow bifan afayomama. E nat, aramat ipic, asan akat, e arma batawsicim opok ow, aomama.”

⁷Inimas ara, Allah atakam ji mamekurumey. Caram Iblis mamotpemey. E Iblis masirin, car bakan ajiostotorceman.

⁸Car Allah sotop ememcokom, aram car sotop aememceman. E awapokom dosa owa. E pwicakas mamkorompimey. E awapokom bi binip arke owa. E cajak aman dosa mamiwosomey.

⁹E pwicak aemfokomas, jak pwicak mamemapey. Caram jak opok mamemapey. Caram bwec mambwecey. Wow uc aocmokom ara. E nat, bwec mambwecey. Wow jak akat aemapmokom. E nat, jak pwicak mamemapey.

¹⁰Caram e Tuhan bipu, ow kanim inim mamememey. Aramat ipic masirin, car op atomettewemceman.

¹¹Dojowow akatonokom. Caram cemew mamat arapok. Ow e ajowow cemew aatcesnew, adosa atakam asakamtiwcesnew, ar, “E Allah Jirmec pwicak ara,” inim cimin aecemes. Aram, “E Jirmec salah ara,” inim cimin atakam asakamtiwcemes. Car e Jirmec salah atakam asakamtiwcokom, car e Jirmec ji bwe ow opok. Car, e Jirmec salah ara, inim atakam basakamtiw ow aememcomokom.

¹²Jirmec atatitamef ipic, bare cowokut ara. Atakam basakamtiw ipicam cowokut ara. Aramat ipic ow bajortewnew, ow daniwis bwemtiwnew, inim fakas epcom. Inimas car cajowow salah atakam bwemsakamtiw asan opok.

¹³Jakaperey. E ca wun ow atakam: “Wownew, tonew, dar inim kota ajisoscomom. Dar erasan tahun cowok aemapcomom. Daram pok juw auwuamata aecomom. Dar masirin, e dapok arke akakayimcomom.” Inim aecomokom.

¹⁴Ca nat, e asep jofay aemcokomas camsom opok. Caram e cajiwneas camsom opok. Car amwin inim cimin ara. E amwin jipinnakap aneysapotomtopomcema. Wunam asarimanioscema.

¹⁵Ca nat, inim atakam botawji: “Tuhan akat aporcow, dar damir baf opok aemcomom. Akat aporcow, dar inim inim aemcomom.” Inim mameey.

¹⁶E cabi binip nat, “Nomsom awut,” inim bi binip aceceremtotormokom. Caram carma atawsicimamokom. E carma atawsicimamokomas, bare pwicak ara.

¹⁷Ow akatas bwem amsomnew, e nat ar e akatas bwem opok aemcesnew, bare ar dosa ow ara.